Home Parlamento Den apenas 100 dia ya Minister Bikker a logra dividi Cuerpo di...

Den apenas 100 dia ya Minister Bikker a logra dividi Cuerpo di Polis

47
0
SHARE
- Advertisement -

Parlamentario Robert Candelaria a adverti adelanta:

ORANJESTAD (AAN): “Si bo no ta sali for di e cuerpo di Polis, ta dificil pa compronde con e ta funciona. Si bo no ta compronde con e ta funciona, bo mester siña esey prome cu bo mishi cun’e pa bo no causa daño cu bo no por drecha despues.

Esey ta precisamente locual ta pasando aki”, asina ex-Alto Inspector di Polis y actual miembro di Parlamento pa Fraccion di AVP a reacciona despues di e reunion di sindicato SPA ayera unda miembronan a pasa un mocion di desconfianza contra e directiva.

“Esaki ta pasa ora e Minister no a purba pero tampoco a logra uni e organizacion policial y cu Polisnan dicidi asina, e no lo por logra net net nada cu su maneho”, asina Parlamentario Candelaria a splica.

Desde November e Gobierno nobo cu asignatura MEP-POR-RED a sinta y for di negociacion caba por a sinti un tension pasobra e partido mas grandi kier a tuma e cartera di husticia. A forsa y asina POR a bin logra haci e soño di Andin Bikker realidad pa un dia e por ta Minister di Husticia.

“Pero anhela ta un cos y maneha cartera di husticia ta henter un otro cos. Masha lihe e Minister nobo a ripara cu para den banda critica ta mucho mas facil cu maneha Bo mes y awo e por mira cu su unico logro ta di a dividi Polis den dos”, di acuerdo cu Parlamentario Candelaria.

E demotivacion den Cuerpo Policial ta grandi, mas cu nunca. Mayoria eyden ta sinti e metemento directo di Minister Bikker den maneho diario di e organizacion. Es mas, e ta permitiendo su colega di partido pa mete indirectamente tambe den e departamento, cu ta esencial pa democracia y mantencion di orden publico di nos pais. “Ta ki mishi cu ta negociando pa forsa nombra un Comisario sin pasa door di un proceso transparente? Ora a sinti resistencia, awo kier nombra Management Team, loke tampoco no ta un opcion pa Polis”, segun Parlamentario Candelaria.

Awor, pa culpa di Minister Bikker cu a bay negocia tras di porta cu sindicato y laga nan bay bende su maneho cu miembronan, cu awor e sindicato a perde confianza di su miembronan. E Parlamentario ta convenci cu esaki ta sosode ora politica mete den Polis. Aruba tin un Cuerpo Policial so y mester cuida esaki cu tur forsa pa e keda integro, eficiente y efectivo den combatimento di criminalidad y asina mantene un Aruba sigur pa nos pueblo y nos turistanan.

“Manera mi a bisa na mas ocasion, no por hunga politica den e organizacion aki. Minister mester haci tur lo posibel pa wanta politica pafo di Cuerpo y sindicato y laga Polis funciona segun liña di maneho cla y segun ley. Awor nos ta mira cu politica ta worde hinca den Polis, locual mi ta considera un inhusticia grandi pa nos Cuerpo y nos Pais”, asina Parlamentario Candelaria a subraya.

Na final el a bisa si cu “Mi ta contento cu Polisnan a lanta para pa inhusticia y pa e forma no profesional di anda di e Minister nobo. Nan tur conoce mi y sa cu e sistema di traha aki no ta forma parti di mi preparacion y experencia. Keda uni, pasobra ta solamente uni Polis por sigui proteha, defende y salvaguardia democracia di e pais aki, specialmente contra un Gobierno cu ta purba mete den delaster un asunto di Polis”.

- Advertisement -

DUNA COMENTARIO

Please enter your comment!
Please enter your name here