Home Parlamento Diabierna awor fraccion di MEP lo entrega Ley di screening na Presidente...

Diabierna awor fraccion di MEP lo entrega Ley di screening na Presidente di Staten

28
0
SHARE
- Advertisement -

Parlamentario Edgard Vrolijk:

ORANJESTAD (AAN) — Den conferencia di prensa di fraccion di Partido Movimiento Electoral di Pueblo (MEP), Parlamentario Edgard Vrolijk a hiba palabra.

El a referi na un caso internacional unda por a mira con ayera, e Minister di Relacionnan Exterior di Hulanda, mr. Halbe Zijlstra, a tuma su retiro pa algo cu el a gaña na aña 2006.

E Parlamentario a subraya cu esaki ta muestra di madurez politico, integridad y principio. Esaki ta netamente di lo cual ta carece na Aruba, y hasta den gobernacion a perde tur principio.

Vrolijk a remarca cu pesey e ta contento cu hunto cu su colega Rocco, nan a ranca sali, na Januari, cu e ley di screening pa minister. E ta haya cu e ley aki ta hopi importante pasobra e ciudadano mester tin etica di su mes. El a subraya cu na Aruba nos a perde tur extremo di etica, nos no ta worry cu nada mas. El a reitera e expresion di ex-minister di infrastructura “I don’t give a damn, mi ta bay cera como Minister”.

Vrolijk a subraya cu na lugar cu Parlamento a hunga su rol y bisa cu nan ta pone e “brother aki abao” e minister a bay Parlamento cu un ley na werki, tur cambia pa proteha e minister aki, anto e ta puntra si asina nos ta papia di integridad.

El a reitera cu esaki ta netamente e motibo pa cual e cu su colega Tjong a tuma e iniciativa pa traha di dje dia y nochi cu alma y cuerpo, pa keda cla cune y entregue na Presidente di Parlamento, pa e ley por cana su caminda, pa esaki no pasa nunca mas y ora e minister ta haci algo incorecto e mes duna honor na su persona y tuma su retiro y esaki ta hancra den e iniciativa di ley.

El a recorda e caso di ex-minister Paul Croes cu e mes mester a tuma su retiro y tambe awor como Parlamentario, e ex-minister mester a percura pa Paul Croes haya su ontslag.

Pero por a mira con el a goberna, con a dispidi placa di pueblo y sinberguenceria a drenta den tur caminda.

“Mi ta reitera cu etica y principio a bay perdi y nos tin cu trata awor pa bon di pueblo y pa su boluntad, hinca esaki den ley. Casonan manera ministernan cu conflicto di interes tambe tin cu cambia.

NOT.RED: E retiro di e Minister Zijlstra  di Hulanda, ta referi na e caso di su supuesto encuentro cu sr. Putin (Rusia), cual no a sosode.

Parlamentario Vrolijk a trece dilanti con ex-Minister di Salubridad tambe tabata doño di tur e boticanan y esaki no mester sosode mas.

Tur e aspectonan aki mester wak den futuro pa no ripiti y mester pone den e ley aki, el a reitera y a agrega cu Diahuebs awor cu nan ta bay keda cla cu e iniciativa di ley di integridad y screening, nan lo entregue na mr. Ady Thijsen, Presidente di Staten, Diabierna, y e ta spera cu no tin ningun obstaculo nan dilanti.

Pa fraccion di MEP esaki ta e prome stap den un rumbo pa e pais aki y si e mes mañan ta bira Minister e mester cumpli tambe cu e ley aki.

El a remarca cu esun cu kier goberna e pais mester ta limpi, nechi y asina aki gana confianza den pueblo pa vota, pasobra hopi hende a keda sin vota pa falta di confianza y MEP kier trece esaki bek den pueblo, cuminzando pa e ley aki. Muy pronto lo ehecuta e ley di partidonan politico tambe y e ley di Integriteit Kamer. “Locual nos a priminti y nos a campaña, nos ta cumpli cune tambe”, Parlamentario Edgard Vrolijk a expresa. El a conclui bisando cu nan ta trece prueba dilanti pa pueblo scoge y si despues pueblo kier scoge otro rumbo nan trabao como politico tambe ta caba na momento cu pueblo bay otro caminda. “Si nos kier bay den paso di integridad y bon gobernacion, nos ta sigui e caminda cu nos ta bay”!.

 

 

 

 

- Advertisement -

DUNA COMENTARIO

Please enter your comment!
Please enter your name here