ORANJESTAD (AAN): Diabierna mainta Hues a dicta sentencia den e caso penal cu Ministerio Publico a cuminsa contra e hoben Erick Arturo Minguel Schneider di 24 aña, kende ta un conoci di husticia.
Algun siman pasa tratamento di e caso a tuma lugar caminda Fiscal a exigi 14 aña di prison pa Minguel Schneider pasobra Fiscal ta haya cu intencionalmente Schneider a tira mata e hoben L. de Palm di 26 aña di edad.
SENTENCIA:
Diabierna mainta den sala di Corte tabatin un klas di e agente di Polis aspirante, kendenan a bay scucha casonan penal pa promer biaha.
Por a mira cu e sospechoso Schneider a presenta den Corte cu man y pianan geboei. Esey ta indicacion cu e ta worde considera peligroso.
Hues a bisa cu e ta haya legalmente proba cu Schneider, intencionalmente riba 21 Mei 2017, a tira L de Palm diferente biaha cu un arma di candela cu consecuencia cu L. de Palm a fayece net pafo riba e parkinglot di Olde Molen.
Hues a mustra cu contrario na loke abogado mr. Illes a bisa, e si ta haya e declaracion di e testigonan confiabel. Hues a bisa cu tin e testigo D. cu a bisa cu el a tende tironan, ora e tabata para na entrada di e club nocturno banda di e hotelnan grandi. E testigo D. a bisa cu el a mira dos hende cora bay. Seguridad di e club nocturno a bisa cu esun cu flanel blanco, ta esun cu a tira.
Polis a mobilisa y a detene G. cu tabata den un auto. G. a bisa Polis, cu el a tende tiro y el a mira Minguel Schneider cu un revolver.
Seguridad a bisa cu un rato promer e victima L. de Palm a worde saca di e club pasobra e tabata haci fastioso. El a mira Schneider cu un arma y a mira con e agresor a tira dos biaha riba L. de Palm cu tabata core bay. Ora L. de Palm a cay, Schneider a cana bay na dje y tira dos biaha mas di cerca riba L. de Palm.
Hues a sigui bisa cu un persona M. a bisa cu debi cu el a worde menaza door di amistadnan di Schneider, e no a bisa nada siendo cu el a mira e persona tira. Despues el a bisa cu ta Schneider a tira. Hues a mustra cu tin video di seguridad cu ta mustra cu Schneider tabata bisti cu flanel blanco cu jeans.
Hues a mustra cu Minguel Schneider a admiti di tabata eynan pero despues a bay cerca su amiga na beach. Hues a remarca cu no tin ningun prueba cu na momento cu e tiramento a sosode, Schneider enberdad tabata na beach. Hues no ta kere esaki. E ta haya E.S. culpable di asesinato.
CASTIGO:
Pa cu e castigo, Hues a bisa cu e ta tene cuenta cu seriedad di e caso. El a mustra cu Schneider a kita bida di un persona. Hues a tene cuenta tambe cu e sentencia cu e caso di asesinato na Café Capri. El a mustra cu Schneider tin carchi di castigo caminda den pasado caba el a yega di worde condena pa asalto arma.
Hues a condena Minguel Schneider na 12 aña di prison, kitando e tempo cu e ta sera den KIA. Hues tambe a aproba e demanda di daño di parti di famia di e fayecido cu ta algo mas di 9 mil Florin.
