Home Gobierno E prome cien dianan di gobierno cu enfoke riba pone e ser...

E prome cien dianan di gobierno cu enfoke riba pone e ser humano central

49
0
SHARE
- Advertisement -

Prome Minister mr. Evelyn Wever-Croes a defini:

ORANJESTAD (AAN) – E siman aki a habri cu e conferencia di prensa di Gobierno, tocante e prome cien dianan di gobernacion di Gabinete Wever-Croes.

A inicia cu un resumen duna pa Prome Minister mr. Evelyn Wever-Croes, sigui pa Minister di Finanzas y Cultura mr. Xiomara Ruiz-Maduro, Minister di Infrastructura y Medio Ambiente sr. Otmar Oduber, Minister Andin Bikker titular di Husticia y Migracion y Minister Rudy Lampe, encarga cu e cartera di Enseñanza, Ciencia y Desaroyo.

Prome Minister mr. Evelyn Wever- Croes a defini e prome cien dianan di gobernacion den termino general, kico a logra y kico por spera e tempo nos dilanti.

E dignatario, den su repaso a cuminza cu e hecho cu gobierno no a haya un traspaso debido for di e gabinete cu a baha, y actonan cu a stroba pa cuminza cu gobernacion nobo mesora, debi na sabotahe.

E mandatario a subraya cu esaki no a stroba su gabinete y e cien dianan aki ta tipifica den pone ordo riba e caos cu nan a haya y sorpresanan desagradable cu nan ta hayando te ainda, pero cu lo no desvia su gobierno di e rumbo cu nan ta hibando.

Despues di un periodo relativamente largo di formacion di gobierno entre e tres partido politico cu a forma coalicion, nan a yega conhuntamente na un vision y un meta. Esaki ta pone e ser humano central y trece bienestar den nos comunidad pa tur ciudadano.

Poniendo e ser humano central kiermen cu den tur decision cu wordo tuma e ser humano ta wordo poni den prome lugar.

“ Kico ta importante pa e ser humano? Den e cuadro aki, scucha e ser humano, papia cune y asina tuma decisionnan”, e dignatario a expresa.

PERIODO DI CRISIS:

Gabinete Wever-Croes ta cataloga e cien dianan aki como periodo di crisis. “E crisis di e traspaso cu a tuma lugar, crisis financiero, social cu apenas algun dia despues nos a tuma over por e bomb a explota y resultado tabata e dos angelito y despues di e dia ey tur hende tabata sa cu e problema social no por postpone mas.

Crisis cu Venezuela tambe, cu ta algo otro cu a tene nos hopi ocupa e ultimo lunanan aki, debi na e hecho cu segun Gobierno Venezolano nos di Aruba, desde 2016 no a haci suficiente pa stroba contrabando desde Venezuela, y nos a purba di yega na palabracion pasobra nos no a logra firma ningun documento, mi por bisa si cu pa e ciudadano di nos pais no tin mucho molester den esaki”, Prome Minister mr. Evelyn Wever-Croes a specifica.

Fuera di tur esaki gobierno su enfoke ta keda riba pone e ser humano central, e mandatario a reitera.

E mandatario a pone como ehemplo su ministerio, unda riba tema di energia nan a bin cu un iniciativa con pa atende cu e famianan humilde, cu debi na problemanan social no tin conexion di awa y coriente, pa nan yega lihe na e re-conexion di esaki.

Tambe a trece e servicio mas cerca di e ciudadano ora a habri un oficina di gobierno den e Distrito di San Nicolas.

Otro aspecto importante di e ministerio di asunto general ta restablece e confianza, credibilidad y bon nomber di Aruba tanto nacional como internacionalmente den Reino Hulandes, Venezuela, y demas pais.

E mandatario a subraya cu ta secreto publico cu Aruba su relacion cu Reino no tabata esun mihor, pero su gabinete ta trahando pa restablece esaki.

Ademas ta trahando pa restablece e confianza y credibilidad den e maneho presupuestario y di personal, cu ta un maneho cu ta cay directamente bao Ministerio di Asunto General.

El a acentua cu e gastonan di personal mester wordo controla y crea mas eficiencia y productividad den e Departamentonan Gubernamental, baha gasto den presupuesto, cu locual Prome Minister mes a cuminza cune, den su mesun presupuesto.

Otro aspecto ta inverti den e independizacion Institutonan estatal halto, den e caso aki Parlamento, Contraloria General, y Raad van Advies. Den esaki a atende cu vacantenan cu mester a yena pa nan por traha nan rapportnan y aworaki tur tin suficiente personal, y na raad pa por duna e consehonan necesario.

Awor Parlamento por pidi consehonan directamente na Social Economische Raad sin pidi gobierno su permiso prome. Pasobra gobierno kier pa Parlamento traha mas independiente y asina gana e confianza bek.

Finalmente, e dignatario a referi na integridad. E fundeshi a wordo poni pa bin cu e camara di integridad, pa locual Raad van Advies ta yudando, y tambe pa Instala e Buro Integriteit Aruba, locual ta bay haci hunto cu Curacao y Bonaire pa nan tin expertonan pa yuda e paisnan pa eherce control.

 

 

 

- Advertisement -

DUNA COMENTARIO

Please enter your comment!
Please enter your name here