Home Hudicial Fiscal a exigi 6 aña di prison pa sospechoso di asalto riba...

Fiscal a exigi 6 aña di prison pa sospechoso di asalto riba chofer di Van di compania di sigaria

122
0
SHARE
- Advertisement -

Ademas di a aproba e demanda di daño pa 50 mil florin

ORANJESTAD (AAN) – Ayera mainta seis sospechoso a presenta dilanti Hues pero despues cu Fiscal y un abogado a pidi pa pospone e casonan, a resta tres sospechoso. E otro tres nan caso lo bin dilanti 4 Mei 2018. Di e tres cu nan caso a wordo trata, un a haya castigo basicamente igual na loke el a sinta caba cu un parti condicional y un otro 20 luna di prison.

E dosnan aki tabata envolvi den casonan di ladronicia mas tanto. E ultimo, Fiscal a baha pisa riba dje. Fiscal, teniendo cuenta cu e sospechoso ta un residivista cu un carchi di castigo largo, a exigi 6 aña di prison y tambe a aproba e demanda di daño pero a reduci esaki na 50 mil florin.

E grupo di hombernan sospechoso cu ayera mainta a presenta dilanti Hues ta: T.B.(21), I.V.M., J.U.F., A.T.(24), L.W. y J.W.

POSPONE TRES CASO

Despues cu Fiscal a lesa e serie di acusacionnan contra cada un di e sospechosonan, Fiscal a bisa cu e kier pidi pospone caso contra I.M. y J.U.F. El a splica cu Polis a haya un huls di un bala cu kier laga NFI investiga y tambe algun material. Abogado mr. Carlo y mr. Maldonaldo no tin nada contra esaki. A palabra 4 Mei 2018 pa 9’or di mainta. Abogado mr. Zara a pidi pa pospone e caso di L.W. pasobra el a haya documentonan di e caso laat. E tabata kier haya tempo pa studia e caso y papia cu su cliente. Hues a pospone e caso tambe pa 4 Mei 2018 pa 9’or di mainta.

INTENTO ASALTO

Hues a cuminsa cu e sospechoso T.B., kende ta wordo acusa di intento asalto riba 30 Augustus 2017 contra e homber L. T.B. a wordo deteni pa e caso di ladronicia di Weg Seroe Blanco caminda e tabata warda den auto pa otronan I.M. y J.U.F. Durante interogacion el bisa cu nan tambe a bay na un cas na Ponton caminda el a hiba I.M. y J.U.F.

Nan tabata sospecha cu e doño di e caso, L., tin hopi placa. E atraco no a sigui pasobra e persona no a presenta. I.M. a admiti esaki. Hues a bisa cu den auto cu T.B. tabata stuur, a haya cellular di J.U.F. caminda tabatin potretnan saca di L., cu tabata e persona cu nan kier a haci e asalto arma. Hues a puntra kico T.B. su funcion tabata. Segun T.B. e mester a hiba nan den auto. El a bisa cu I.M. a pidi’e pa hiba nan un siman promer. El a bisa cu e lo haya placa di loke nan haya. E mester a vigila tambe si no tin hende ta bin.

ASALTO ARMA

Hues a sigui cu e caso contra J.W. y J.U.F. kendenan ta wordo acusa cu dia 18 Augustus 2017, a haci un asalto arma riba e chofer di Van di Superior Tobacco na un restaurant na Paradera. Door cu J.U.F. su caso a keda posponi, Hues a sigui cu J.W. Hues a mustra cu e empleado a bisa cu el a bay bende 5 slof di sigaria na e restaurant. Ora el a bolbe e Van, y a bay pa habri e porta, tres homber a atak’e di sorpresa. Tur tres a cuminsa maltrat’e te cu el a cay. Un a kita yabi di e Van, otro a kita e placa di venta for di su man y otro a coy cartera for su carson. Nan a bay cu e Van di Superior Tobacco. Nan a coy e chofer su IPhone for di e Van.

Ta asina cu den e Van tabatin 777 slof di sigaria y un caha di placa. Despues Polis a haya e Van caminda a constata cu a bay cu 78 slof. Abogado cu Superior Tobacco a demanda algo mas 81 mil florin cu ta encera e slofnan y placa cu tabata den e caha di placa.

Hues a bisa cu segun e raport di Polis, tin testigo cu tabata den un auto ta warda su yiu muher, a mira con e tres hombernan a ataca e empleado. El a reconoce un di nan como J.W., kende e conoce pa hopi tempo. Ademas di esey, Recherche a haya imagennan di e camera di seguridad di e restaurant cu a filma tur loke a sosode. Riba camera Recherche reconoce J.W. y J.U.F.

Den Corte J.W. a bisa cu e no tin nada di haci cu e caso aki.

Hues a remarca cu den cellular di J.W. a haya yamada cu J.U.F. a haci caminda ta papia cu si e kier participa den asalto. J.W. a bisa Hues cu ta bou presion di Recherche el a bisa esaki y otro cosnan pero no ta e berdad. Tambe el a bisa cu e ta haci uso di su derecho di silencio.

Hues a pidi J.W. bay dilanti pa Hues mustra riba computer imagennan di camera di seguridad caminda ta mira e tres asaltantenan. Hues a puntr’e si e no ta un di e asaltantenan. J.W. tabata sacudi cabez cu no. Ariba pregunta di J.W. su abogado mr. v.d.Biezen, el a bisa cu e dia ey e tabata henter dia na cas.

Hues a bisa cu ora di detencion di J.W. riba 15 September 2017, a haya un arma di candela y el a bisa cu e arma ta di J.U.F.

HORTA SUPERMERCADO

Hues mustra cu J.W. tambe ta envolvi den ladronicia for di un supermercado. Polis a yega na e supermercado y a mira dos persona riba dak y nan baha y core bay. Durante persecusion a detene J.W. El a admiti na Polis cu e tabata horta y a bisa cu e tabata su so. Hues a remarca cu Polis a mira dos persona pero J.W. ta bisa cu e tabata su so. Hues a puntr’e ken e otro persona ta y J.W. a bisa cu e ta haci uso di su derecho di silencio. Ta asina cu nan a kibra dak di e supermercado y a kibra e caha fuerte. Nan a core bay lagando e dos tas atras yen yen di placa.

Ta asina cu e doño Chines di e supermercado a demanda daño cu ta algo mas di 5800 florin. E doño a splica Hues cu esey ta gastonan pa drecha e dak di e supermercado cu nan a kibra y tambe e caha fuerte cu nan a kibra.

LADRONICIA CAS

Hues a sigui cu A.T., kende ta wordo sospecha di ladronicia for di un cas na Bakval. Polis a sorprende A.T. y L.W. cu a horta na e cas. Door cu e caso di L.W. a keda posponi, a sigui cu e caso contra A.T. Hues a bisa cu ta parce di tin un tercer persona cu a participa den e ladronicia aki. Hues a puntra A.T. ken e persona aki ta. A.T. a bisa cu ta berdad pero e no ta bisa nomber pasobra e no kier problema cu ningun hende. Hues a mustra cu A.T. a bisa Polis cu ta L.W. a pidi’e pa bay horta y cu e lo ricibi placa. L.W. a keda den auto warda mientras cu A.T. y otro a forza e sliding door. Segun A.T., el a coy dos labtop y no sa kico e otro a coy. Polis a yega sorprende nan. Hues a bisa cu doño di e cas a haci demanda di mas cu 9 mil florin.

Hues a mustra cu T.B. ta detene desde 15 Augustus 2017. El a bisa cu ta promer biaha cu T.B. ta cay sera. Pa loke ta A.T., Hues a mustra cu e tin carchi di castigo cu ta mustra cu na 2011 a condena A.T. pa incubrimento di cosnan horta. Ta asina cu desde 4 September 2017 e ta sera.

Hues a bisa cu J.W. ta deteni desde 15 September 2017. Hues a mustra cu e carchi castigo di J.E. tin 11 caso ladronicia y hasta un caso di atraco cu violencia. Na 2015, J.W. a wordo condena pa posecion di arma y na 2016 el a sali for di KIA.

EXIGENCIA FISCAL

Fiscal a bisa cu e ta haya legalmente proba e acusacionnan contra e trio. Fiscal a cuminsa cu T.B. Fiscal a bisa cu T.B. di su mes a splica diferente otro caso entre otro e plan di asalto arma na un cas na Ponton. E otro sospechoso I.M. a confirma esaki. I.M. a bisa cu ta J.U.F. ta esun cu a bin cu e plan y cu I.M. tabata arma. A haya cellular di J.U.F. den e auto cu T.B. tabata stuur, caminda tin yamadanan cu splica di e asalto arma y a palabra cu lo bay su siguiente siman atrobe. El a saca tambe potretnan di e homber cu ta biba na e cas.

Fiscal a sigui bisa cu T.B. a admiti su culpabilidad. Fiscal ta haya cu aki por papia di un asalto arma realisa. Na opinion di Fiscal, e hecho cu e doño di e cas, L., no a presenta, no ta haci otro. Fiscal ta haya T.B. complice di e asalto arma. Tambe Fiscal ta haya T.B. complice di e ladronicia na Weg Seroe Blanco, caminda el a wordo deteni mesora. Fiscal a mustra cu I.M. a admiti di a horta hunto cu J.U.F. y cu T.B. a hiba nan.

Pa cu e castigo, Fiscal a bisa cu e ta tene cuenta cu e hecho cu ladronicia ta un caso hopi serio. E ta causa hopi angustia pa e habitantenan cu no ta sinti nan mes sigur den nan propio cas. Fiscal a bisa cu tambe e ta tene cuenta cu si T.B. no a papia di e asalto arma, lo no a haya sa di esaki. Fiscal a exigi 25 luna di prison di cual 5 luna ta condicional cu 2 aña di prueba. Tambe Fiscal a bisa Hues cu e ta aproba e demanda di daño pero ta exclui e joyas pasobra no tin recibo pa determina e balor di e joyas. El a pidi Hues pa pone e medida pa T.B. paga. E suma cu T.B. mester paga di daño ta 2647 florin.

Pa loke ta A.T., Fiscal ta hay’e culpable di dos ladronicia pasobra na Bakval nan a drenta den dos apartamento. Fiscal a mustra cu A.T. a admiti y a papia di e otro sospechoso pero no kier papia di e tercer sospechoso. Fiscal ta haya cu A.T. ta complice di e dos ladronicianan. El a tene cuenta cu Reclasering a señala cu A.T. facilmente ta wordo influencia pa haci malo. Fiscal ta kere cu ta bon Reclasering guia A.T. El a exigi 9 luna di prison di cual 4 luna ta condicional y 3 aña di prueba y bou guia Reclasering. Fiscal a aproba demanda di daño caminda A.T. lo mester paga 9409 florin y Fiscal a pidi Hues pa pone e medida pa paga.

Pa loke ta J.W., Fiscal a bisa Hues cu e ta haya J.W. culpable di ladronicia di e supermercado y e asalto arma riba e chofer di e Van di Superior Tobacco. Fiscal a mustra cu mas o menos 70 mil florin na balor di sigaria a wordo horta. E chofer a wordo maltrata pa tres asaltante. Un testigo a reconoce un asaltante como J.W. Recherche riba camera di seguridad a mira con e asalto arma a sosode. Recherche a reconoce J.W. y J.U.F. como dos di e asaltantenan. Tin yamadanan riba cel di J.U.F. cu ta papia J.W. caminda nan ta papia di e asalto arma.

Na opinion di Fiscal tin suficiente prueba cu ta J.W. y J.U.F. ta envolvi. Dia di J.W. su detencion na su cas, a haya un arma di candela. E ta envolvi den ladronicia na supermercado caminda a kibra dak y caha fuerte. El a wordo sorprendi pa Polis. A haya dos tas yena cu placa, 2 pata di cabra.

A mira dos persona pero J.W. ta bisa cu e tabata su so. Fiscal a bisa cu pa cu e castigo e ta tene cuenta cu e carchi di castigo largo cu J.W. tin caminda tin casonan di ladronicia, atraco cu violencia. Fiscal a mustra cu na 2015 a condena J.W. na 18 luna di prison pa posecion di arma. El a exigi 6 aña di prison. Fiscal a bisa cu e ta reduci e demanda di daño di Superior Tobacco 50 mil florin cu ta e maximo segun ley penal. El a pidi Hues pa impone medida pa paga. El a aproba e demanda di daño di e supermercado cu ta mas cu 8500 florin.

SENTENCIA

Despues cu a scucha e abogadonan, Hues a sera tratamento di e caso y a dicta sentencia di biaha pa A.T. y T.B. Hues ta haya legalmente proba e acusacionnan y ta haya e castigo exigi pa Fiscal na su lugar. Pa A.T. esey ta nifica cu e ta haya libertad pero mester percura pa paga e daño. Pa loke ta e caso contra L.W., Hues a keda di studia esaki y dia 9 di Maart 2018 lo tin sentencia.

 

- Advertisement -

DUNA COMENTARIO

Please enter your comment!
Please enter your name here