Home Hudicial Fiscal ta usa mensahenan di whatsapp como prueba siendo cu ningun hende...

Fiscal ta usa mensahenan di whatsapp como prueba siendo cu ningun hende a mira e tiramento

318
0
SHARE
- Advertisement -

Abogado di sospechoso di tiramento ta señala

ORANJESTAD (AAN)  – Abogado mr. Bryson ayera mainta den Corte a reclama e hecho cu Fiscal ta exigi 10 aña di prison pa e sospechoso J.H. cu ta promer biaha cu e ta cay sera, siendo cu den un caso recien contra un residivista, a condena esaki na 8 aña di prison pa un caso similar di tiramento. Tambe el a cuestiona e hecho cu Fiscal ta usa como prueba, mensahenan di whatsapp siendo cu esun cu a manda e mensahenan no a mira nada y ningun otro hende no a mira tampoco.

DEFENSA DI ABOGADO

Ayera mainta despues cu Fiscal a exigi 10 aña di prison pa e sospechoso J.H.(22) pa intento di asesinato, abogado mr. Bryson a cuestiona Fiscal.

Mr. Bryson a bisa Hues cu for di procesverbaal tin tres indicacion. E scooter cu su helm, potret di J.H. riba whatsapp y e hecho cu nan ta yam’e “steroid”. E mama a bisa cu su yiu a wordo tira. Mr. Bryson a remarca cu no a haya solamente DNA di J.H. ariba e helm di e scooter sino a haya DNA di otro dos y esey por mustra cu tin otro dos persona cu por tabata riba e scooter na momento di e tiramento.

NINGUN HENDE A MIRA

E abogado a pidi atencion di Hues pa paga tino cu e declaracion di e dama P. cu ningun hende reconoce J.H. como esun cu a tira. A reconoce un hende cu rabo y ta e otro sospechoso A.F. tin rabo. No tin ningun hende cu ta mustra cu ta J.H. a tira.

E abogado a mustra cu ta A.F., despues di e incidente, a manda mensahenan riba whatsapp pero A.F. no tabata presente na e incidente. Con el a haya esakinan, no ta conoci. En todo caso e mes no a mira. Segun ley, no por use como testigo.

POLIS A FAYA

E abogado a sigui bisa cu e ta haya cu Polis por a haci mas mihor investigacion. CID a haya informacionnan tocante e tiramento y Polis no a bay check. E abogado a mustra cu for di 19 Februari 2017, Polis por a bay check J.H. si su heridanan di tiro ta fresco of si ta di December 2016. Dia 26 Februari 2017, ora cu a bay haci investigacion tambe a keda sin check. E abogado ta conclui cu por tin sospechoso riba J.H. pero no tin pruebanan contra J.H. Tur prueba ta a base di declaracion di hendenan cu no tabata presente.

RESIDIVISTA TA HAYA MENOS CASTIGO

E abogado a sigui bisa cu e pregunta ta si tin suficiente prueba pa bisa cu J.H. premedita a bay tira. Na opinion di mr. Bryson, tin solamente mensahenan di whatsapp di A.F. pero e mes no tabata presente ora cu e tiramento a sosode.

Pa loke ta e exigencia di castigo, e abogado a bisa Hues cu e ta haya e exigencia di Fiscal demasiado halto. El a mustra cu recien tabatin un caso contra un residivista pa intento di asesinato caminda el a wordo condena na 8 aña di prison y Hof a confirma esaki. E abogado a bisa Hues cu aki ta trata di tiramento for di auto riba un cas cu ta similar na loke ta sospecha J.H.

E abogado a remarca, con por ta cu pa un residivista cu a tira ta duna 8 aña di prison y pa un first offender ta bay exigi 10 aña di prison. E abogado a remarca cu Fiscal ta bisa cu J.H. no ta responsabilisa su mes pero si J.H. no a haci’e, e no por bay responsabilisa su mes.

E abogado tambe a reclama na Hues e hecho cu e procesverbaal oficial a yega 1 siman promer di e caso. Esaki a dificulta abogado pa prepara e caso bon.

Hues a tene cuenta cu loke mr. Bryson a trece padilanti y a bisa cu dia 16 di Maart 2018 lo tin sentencia.

 

- Advertisement -

DUNA COMENTARIO

Please enter your comment!
Please enter your name here