Home Parlamento Gobierno a perde caso di Lotto pero Oficina di abogado di Evelyn...

Gobierno a perde caso di Lotto pero Oficina di abogado di Evelyn a gana

90
0
SHARE
- Advertisement -

Parlamentario Dowers:

ORANJESTAD(AAN): Miembro di fraccion di AVP, Parlamentario drs. Arthur Dowers, a mustra riba un hecho historico cu e Gobierno nobo di Aruba a logra y e hecho cu a yega na un “dieptepunt” den democracia riba e isla aki.

E parlamentario a bisa cu por a scucha y lesa con Hues a bati riba cabes di Evelyn Wever Croes y tambe Andin Bikker, kende como hurista lo mester percura pa tur cos bay bon den Gobierno manera cu den pasado semper di dje ora cu e tabata Minister.

Parlamentario Dowers a mustra cu e ta haya straño di mira un Minister di Husticia cu den pasado a bringa cu alma y cuerpo contra SETAR.

E no ta mira cu Bikker ta bringa awor, cu e ta den Gobierno, cu e mesun fervor pa Aruba su estado di derecho. E ta bisa esaki pasobra Gobierno un biaha mas ta perde un caso den Corte. “Nan ta bay den historia como Gobierno, y cual lo ta un logro hopi grandi pa señora Evelyn Wever Croes, cu a perde mas tanto caso den e prome 100 dianan di Gobernacion. Esey ta e record cu nan tin.”

Pa evita cu wega politiconan, e Parlamentario a mustra, ta bon pa duna un splicacion na pueblo con cla y raspa Hues a papia den e veredicto cu el a duna. Hues a bisa nan cu e pais aki no ta un republica di banana. Tin reglanan cu ta worde stipula den e statuutnan y pa ley, y tambe decisionnan di Corte Supremo cu ta bisa con pa actua cu hendenan cu ta den un directiva nobo. Hues a splica Gobierno cu no pasobra tin un Gobierno nobo y un persona a worde nombra door di un otro persona den pasado, por considera esaki un nombramento politico.

Esey no ta nifica cu como Gobierno nobo bo tin derecho di mand’e cas. Tambe, e ta bisa, cu por lesa den e sentencia cu Gobierno a nenga di papia cu e directiva y Hunta di Supervision di Lotto, pa cual nan no sa capacidad di e hendenan, no sa di e maneho cu e organizacion ta hibando y no sa si nan ta dispuesto pa sigui e maneho cu Gobierno kier hiba.

“Mi ta kere cu e sentencia aki ta papia palabra hopi cla y mi ta kere cu den e siguiente caso e aspectonan di Bon Gobernacion lo keda para central,” Dowers a sigui mustra.

El a agrega cu e sentencia aki ta mustra cu Hues ta bisa cu no solamente mester pone e normanan di Bon Gobernacion den Gobierno pero tambe den maneho pa cu e institutonan di Gobierno.

Dowers a sigui bisa cu e ta sinti cu e Gobierno aki no tin gevoel.

“Mi tin cu bisa si, cu Gobierno a perde, pero Evelyn Wever Croes un biaha mas a gana, pasobra ta su oficina di abogado a defende e caso aki, pasobra nan ta cobra placa bruto. Ta bon pa den cuadro di transparencia mustra nos cuanto e famia di Evelyn Wever Croes a cobra pa hiba e caso aki.

E ultimo dianan aki Evelyn Wever Croes a papia hopi di baha gasto, cu e ta persigui diferente hende cu e ta bisa ta liga na AVP. Pesey mi ta spera e saca e cuenta aki y mustra cuanto placa pueblo mester bay paga pa perde un caso, pasobra nan no tin e decencia pa respeta reglanan di bon maneho y gobernacion di organizacionnan,” segun e Parlamentario di AVP a declara.

Dowers a bisa tambe cu ta bon defini cu e stichting aki no ta parti di Gobierno y a haci esaki pa nan por traha di un forma independiente. Di otro banda, el a bisa cu no mester lubida cu tempo cu MEP a bandona Lotto, cu cambio di Gobierno, e fundacion aki tabata practicamente bancarota, sacando miyones di Florin pa probecho di hendenan cerca di nan.

“Pesey e tempo ey mester a core cu nan pa bini cu un directiva cu a salba e organizacion.

El a worde salba tambe. E prijs cu mester a paga pa salb’e ta un poco halto, pero niun hende kier a yuda ora cu nan a mira cu e ta bancarota. Awor cu cos a drecha atrobe ta mira yen di cayman na boca di riu, of ta bula manera bij rond buscando e honing riba e flor. Pero Hues a pone un stop na esaki, pasobra e honing mester bay pa deporte, no den saco di hendenan liga na partido MEP,” sr Dowers a mustra.

 

- Advertisement -

DUNA COMENTARIO

Please enter your comment!
Please enter your name here