Home Hudicial Hoben di 19 aña condena na 8 aña di prison pa tiramento

Hoben di 19 aña condena na 8 aña di prison pa tiramento

202
0
SHARE
- Advertisement -

El a tira un homber den pia na San Nicolas y riba un cas cu hende aden na Pos Chiquito

ORANJESTAD (AAN) – Ayera mainta e hoben E.L.(19) a presenta dilanti Hues pa scucha su sentencia. Fiscal luna pasa a exigi 12 aña di prison. Fiscal ta haya cu E.L. ta culpable di intento di asesinato ora el a tira e homber den su pia. Tambe e ta haya E.L. culpable di intento di mata ora el a tira riba un cas na Pos Chiquito.

Fiscal tambe a bisa cu E.L. anterior tabata sera pa caso similar esta posecion di arma di candela y tiramento. Hues no ta haya E.L. culpable di intento di asesinato pero si intento di mata. Tambe Hues ta haya E.L. culpable di a menaza cu morto y a tira riba cas na Pos Chiquito. El a condena E.L. na 8 aña di prison.

EXIGENCIA FISCAL

Dia 12 di Januari 2018, tratamento di e caso a tuma lugar caminda Fiscal a bisa cu aki ta trata di un hoben di 19 aña y tin varios caso serio. Na opinion di Fiscal, E.L. a scoge un forma di biba di ta forma parti di un gang cu tin problema cu otro gangnan. E sospechoso ta bisa cu no tabata su intension pero ta e mes a scoge pa forma parti di gang di Santa Cruz.

E victima a wordo tira den pia parti ariba y mester a wordo opera. E bala cu a saca for di e pia di e victima posiblemente ta procedente di e arma cu a haya na E.L. su cas. Fiscal ta considera e tiramento aki un intento di asesinato.

E otro caso di menaza cu cuchiu, E.L. ta bisa cu no ta asina. E.L. ta admiti di a menaza e homber E. pero no a usa un cuchiu. Fiscal a pidi Hues declara E.L. liber di menaza cu cuchiu.

E otro caso di posecion di arma di candela, E.L. ta bisa cu e arma no ta di dje. Fiscal a bisa Hues cu esey no ta haci diferencia pasobra E.L. tabatin e arma. Un dia promer 27 Juni 2017 a mir’e cu un arma y tin mas testigo cu a bisa cu a mira E.L. cu arma mas biaha. E ta bisa cu e arma ta di un persona pero no tin ningun indicacion. Fiscal a mustra cu tin indicacion fuerte cu a usa e arma ey pa tira e victima L. Esey ta mustra cu E.L. tabatin e arma.

Dia 27 Juni 2017 a tira riba un cas na Pos Chiquito. A check e tiro y si tabatin un hende sinta den direccion di e bala esaki lo por a herid’e na schouder of cabez. Fiscal a bisa Hues cu e huls cu a haya tin indicacion fuerte cu esaki ta di e arma cu a haya na cas di E.L.

Tin diferente declaracionnan cu ta mustra otro cu loke E.L. ta bisa. E tabata den auto na Pos Chiquito y Fiscal ta kere cu ta E.L. ta esun cu a tira. El a mustra cu tabatin hende den cas y esey ta haci cu Fiscal ta cualifica esaki un intento di mata premedita.

Pa cu e castigo, Fiscal a bisa cu e ta tene cuenta cu anterior a condena E.L. caba pa un tiramento na Pos Chiquito.

Ta hechonan hopi serio y ta haya E.L. un residivista hopi jong. El a mustra cu na April 2017, E.L. a wordo laga liber y den algun luna el a haci tur e delitonan aki. Fiscal a exigi 12 aña di prison, kitando e tempo cu e ta sera den KIA.

SENTENCIA

Ayera mainta Hues a bisa cu e ta haya legalmente proba intento di mata, menaza di morto. Tambe Hues ta haya proba posecion di arma di candela y intento mata. Hues a sigui bisa cu e no ta haya proba intento asesinato, manera Fiscal a bisa. Hues no ta haya cu aki e sospechoso E.L. a actua premedita y pesey no por papia di intento di asesinato sino intento di mata.

Pa cu e castigo Hues a bisa cu e ta tene cuenta cu E.L. a tira e homber L. den pia. Despues E.L. a bay tira riba un cas caminda habitantenan tabata den cas. Hues a bisa cu esaki ta mustra cu dos biaha E.L. a purba mata hende. Hues ta haya cu E.L. a causa hopi inseguridad den comunidad. Tambe el a mustra cu E.L. a tira na lugar publico.

Na opinion di Hues, e victimanan lo keda afecta pa basta tempo. Hues a mustra cu e ta tene na cuenta tambe cu anterior caba a condena E.L. pa arma y tiramento.

Hues a tene cuenta cu e edad hoben di E.L., esta 19 aña y cu el a areprenti di a tira riba e persona. Hues a ordena cu e auto confisca lo wordo debolbe y e cellularnan confisca lo wordo debolbe.

Hues a condena E.L. na 8 aña di prison, kitando e tempo cu e ta sera den KIA.

Manera ta conoci, tanto Fiscal como e acusado tin e derecho di apela. E sospechoso sigur lo no bay apela. Tempo lo mustra si Fiscal lo apela e sentencia aki of no. Si Fiscal apela, Corte Superior cu tres Hues lo bay evalua e caso complete y dicidi si e castigo ta na su lugar of si ta subi esaki.

- Advertisement -

DUNA COMENTARIO

Please enter your comment!
Please enter your name here