Home Hudicial Hues a pospone caso pa Polis bolbe check mensahenan di Whatsapp

Hues a pospone caso pa Polis bolbe check mensahenan di Whatsapp

139
0
SHARE
- Advertisement -

E sospechoso di tiramento a bisa cu no ta asina

ORANJESTAD (AAN): E caso penal cu Ministerio Publico a cuminsa contra e sospechoso A.F. a worde posponi. Esaki pa motibo cu na opinion di e sospechoso, loke Hues ta lesa cu ta A.F. a manda como mensahe riba whatsapp no ta asina.

Segun A.F., ta e Venezolano “Pinocho” a mand’e e mensahenan. Ademas di esey, abogado di A.F., mr. Carlo, a cuestiona e hecho cu net e parti cu ta mustra kende ta esun cu a tira, Polis a laga afor den e traduccion di combersacionnan.

TIRAMENTO:

E acusacionnan cu Fiscal a presenta den sala di Corte contra A.F. ta cu riba 14 di Februari 2017 den careda di 2’or di marduga, A.F. a tira riba e hombernan A. y K. Fiscal ta considera esaki intento di asesinato. Tambe e ta acusa A.F. di tabatin un arma di candela ilegal.

TA DEN GANG OF NO?

Hues a bisa cu A.F. ta forma parti gang di Madiki. A.F. a bisa Hues cu antes, mas o menos na 200, e tabata forma parti di gang pero awor no mas. El a bisa Hues cu nan ta simplemente amigonan cu ta sinta hunto. Hues a remarca cu esaki ta straño pasobra constantemente tin tiramento entre e dos gang di Madiki. A.F. a bisa Hues cu ta berdad cu tin dos gang pero e no ta pertenece na ningun gang.

TIRAMENTO:

Hues a bisa cu A.F. a tira riba cas di e dama H.A. y e homber K. A.F. a remarca cu no ta berdad y cu e tabata hunto cu e otro sospechoso J.H. y cu un tal Venezolano “Pinocho” a tira. Hues a mustra cu 13 Februari 2017 e homber B.A. a tira riba dje y riba otronan cu tabata para dilanti un bar.

A.F. a bisa cu ta berdad. Segun A.F. ta nan tin problema cun’e pero e no. E no tin problema y no tin rabia. El a bisa Hues cu su intension ta pa bay biba na Hulanda. A.F. a bisa cu K. a bay papia cun’e despues cu B.A. a tira y a bisa cu e no kier tin problema cun’e y cu ta B.A. a tira.

MENSAHENAN RIBA WHATSAPP:

Hues a mustra cu segun e raport di Polis, A.F. lo tabata manda mensahe cu e Venezolano Pinocho y cu A.F. a bisa cu e tabata rabia cu nan a tira riba dje. El a bisa su siguiente dia 14 Februari 2017, cu el a tira riba e cas di A.

E sospechoso A.F. ta para riba cu e no a manda e mensahe ey.

Abogado mr. Carlo a pidi Hues pa lesa esaki for di e procesverbaal y na Papiamento. Hues a bay lesa esaki y abogado mr. Carlo a remarca cu net e text tocante esun cu a tira, no ta para den e procesverbaal. E abogado a bisa cu Hues a lesa loke e Recherche a conclui.

HUES KIER CLARIDAD:

A surgi discusion entre Fiscal y abogado mr. Carlo ariba e forma con e whatsapp a worde traduci. E abogado a bisa Hues cu 16 Februari 2017, o sea un siman promer cu e caso, el a haya e procesverbaal oficial. El a remarca cu si Fiscal no ta haci su tarea bon esey no ta su problema.

E ta haya cu lo ta na su lugar cu tur e traduccion lo ta den e procesverbaal. Hues ta haya cu lo ta bon pa pospone e caso pa asina pone e parti aki den e procesverbaal. Hues ta haya cu si e abogado tin duda, lo ta mihor pospone e caso. E abogado a papia cu e sospechoso y nan a bay di acuerdo pa pospone e caso.

E abogado a splica Hues cu A.F. ta bruha. E cel for di cual ta referi cu a saca e mensahenan, no ta esun cu a confisca di dje na su cas. Esey ta un otro cel cu durante un otro detencion relaciona cu pelea a confisca.

A.F. a bisa Hues cu ta e Venezolano “Pinocho” a mand’e e mensahe despues di a scucha nan combersacion tocante tiramento.

Hues a bisa cu e ta haya cu lo ta mihor pa describi tur combersacion pasobra loke ta para no ta cuadra cu loke A.F. ta splicando. Fiscal a propone 1 Juni 2018 pa 10’or lo sigui cu tratamento di e caso. Abogado mr. Carlo a bisa cu e lo ta desea di por haci preguntanan si e ta haya necesario. Hues a bisa cu pa medio April 2018 e procesverbaal mester ta cla y si abogado kier scucha e agentenan dilanti Hues Comisario esey ta posibel.

 

- Advertisement -

DUNA COMENTARIO

Please enter your comment!
Please enter your name here