Home Hudicial Huez a atende caso di Homber cu a maltrata su mama y...

Huez a atende caso di Homber cu a maltrata su mama y padrastro

63
0
SHARE
????????????????????????????????????
- Advertisement -

Hues a conden’e na castigo combina y bou guia di Reclasering

ORANJESTAD (AAN): Fiscal a condena e hecho cu e homber acusado di inicial J.B. (30 aña) ta bay asina leu di maltrata su mama y su padrastro.

El a bisa cu esaki ta e cos mas baho cu un yiu por haci contra su mama y su padrastro. Hues a bay di acuerdo cu e exigencia di Fiscal cu ta castigo combina pero a pone acerca cu J.B. mester cay bou guia di Reclasering.

ACUSACIONNAN:

Diahuebs mainta J.B. a presenta den sala di Corte acompaña pa dos abogado esta mr. Zara y mr. Kock. Cada abogado a atende un di e acusacionnan cu Fiscal a presenta. En total Fiscal a presenta dos acusacion. Den sala di Corte tambe tabata presente e mama di J.B. y e padrastro, kendenan ta e victimanan di maltrato. Tambe e homber G. cu J.B. a maltrata cu boter.

E promer acusacion ta cu J.B. riba 6 Februari 2017 a maltrata su mesun mama y su padrastro. El a dal su mama un mokete den wowo mientras cu e padrastro tambe el a dal un mokete. Segun e acusacion di Fiscal, J.B. a dal e padrastro cu den su cara cu e cabo di un cuchio cu J.B. tabatin den su man.

Tambe Fiscal a acusa J.B. di a maltrata e homber G. riba 7 October 2017. J.B. a dal G. diferente biaha cu un boter na su lomba y cabez. Tambe Fiscal ta acusa J.B. di a destrui un television y un porta di aluminium na cas di G.

MALTRATO CU BOTER:

Hues a cuminsa cu e caso di 7 October 2017 y a bisa cu segun e raport di Polis, e homber G. a haci denuncia na Polis contra J.B. pa a maltrat’e. J.B. a tira cos den su cura. Nan ta bisiña di otro. El a mira J.B. core bay den mondi. G. a saca potretnan di e cosnan cu a tira den su cura. Un television cu tabata den su veranda a worde destrui y e porta di aluminium tambe a worde kibra.

Hues a puntra J.B. kico a pasa. Segun J.B. el a haya un caha completo y algun six pack di cerbez den su cura y a tira nan back den cura G. El a bisa cu tabatin varios confrontacion. Segun J.B. ta G. a tira esakinan den su cura. E ta kere cu e dia ey ta e boternan so el a tira. Hues a remarca cu den procesverbaal e no ta mira potret di television y porta di aluminium kibra. Tambe el a bisa cu di Polis tampoco e no ta mira relato riba television y porta kibra.

Segun J.B. for di 2016 e bisiña G. ta blo provoca problema. Pa loke ta e incidente di 7 October 2017, Polis a bisa cu G. tabata burachi y a bis’e pa bay drumi. G. a rabia pasobra el a bisa cu ta el a worde maltrata.

DEMANDA DI DAÑO:

Hues a mustra cu segun e victima G., door di e maltrato e no por a traha. G. den Corte a bisa Hues cu J.B. ta gaña y tur dia e ta droga. G. a bisa Hues cu e miembro di Recherche a haya tur e potretnan. E no sa di con no tin e potretnan den e documentonan di Hues.

El a presenta demanda di daño contra J.B. El a splica Hues cu door di e maltrato, su man a keda blauw y dolor. Hues a bisa cu G. ta demanda 800 Florin na daño material y 500 Florin pa e dianan cu e no por a traha. En total 1300 Florin.

MALTRATO MAMA Y PADRASTRO:

Hues a sigui cu e caso di 6 Februari 2017, caminda J.B. a maltrata su mama y padrastro. J.B. a admiti den Corte cu el a haci esaki. Hues a puntr’e kico a pasa. Segun J.B. su mama a persisti cu e mester yama su partner padrastro. E ora ey a surgi discussion y J.B. a dal su mama y despues a dal su padrastro cu e cabo di cuchio y un sker di corta mata. Na opinion di J.B., su mama kier insisti riba algo cu e no kier acepta.

Hues na dado momento a pidi e padrastro A., pa duna declaracion como testigo. Hues a puntr’e si ta berdad cu J.B. a dal’e cu un cabo di cuchio na su cara. Hues a haci esaki pasobra ta J.B. so ta papia di esaki. E padrastro a bisa Hues cu no ta berdad cu J.B. a dale cu cabo di cuchio y sker di corta mata. Segun e padrastro A., ta mokete J.B. a dal’e.

Hues a mustra cu e mama a mustra cu J.B. no ta traha y ta keda dianan sin bay cas y despues ta drenta cas y come tur cos di come. El a admiti di usa marihuana. Reclasering den su raport mustra cu J.B. ta usa droga y tin problema sikico. Mayornan a haya informacion pa pone J.B. bao curatela pero nan tin miedo pa haci esaki.

Segun J.B. el a bay rehabilita na Santo Domingo. Hues a remarca di 2013 y 2017 J.B. mester a keda na clinica pa rehabilita pero el a keda 3 luna so y despues a bay keda cerca su abuela. Despues di e abuela a dicidi mand’e back Aruba. J.B. a bisa cu na clinica a dicidi cu e no mester keda interna. Actualmente e ta bibando den un cuarto na cas di su mama. Hues a mustra cu Reclasering ta haya cu J.B. no kier drecha y e chens tey cu e lo por bolbe bira violento. Nan ta haya cu mester obliga J.B. pa haya tratamento den un clinica.

Hues a mustra cu segun documentonan, pa e caso di maltrato el a keda 10 dia sera y pa e caso di maltrato di G., 26 dia sera. Ta promer biaha cu e ta cay sera.

EXIGENCIA DI FISCAL:

Fiscal a bisa Hues cu e ta haya e caso di 7 October 2017 proba, esta maltrato. Pa loke ta destruccion di television y porta di aluminium no por prueba. Fiscal ta haya cu Polis a faya di traha raport di esaki y pone potretnan. E ta haya cu mester declara J.B. liber di destruccion.

Pa loke ta e caso di 6 Februari 2017, Fiscal ta haya proba cu excepcion di maltrato cu e cabo di cuchio y sker di corta mata. Na opinion di Fiscal, tanto e padrastro A. como e mama mes ta bisa cu esey no sosode pero si cu J.B. a dal e padrastro A. mokete. Fiscal ta haya cu J.B. no kier haya ayudo. E ta preocupa pa cu esaki. Den un aña tin dos caso di maltrato. Kere cu mester impone castigo condicional halto pa pone presion pa cambia su actitud. Haya cu J.B. mester tin berguenza pa maltrata su mama y padrastro.

Esey ta e cos mas baho cu un yiu por haci. El a exigi 3 luna di prison di cual 2 luna ta condicional cu un tempo di prueba di 2 aña. E ta haya cu no por aproba demanda material pasobra no por prueba cu J.B. a causa destruccion. E ta haya cu G. a prueba suficiente cu a sufri daño 500 Florin y cu J.B. mester paga. El a pidi Hues pa impone e medida pa J.B. paga sino e lo mester bay 10 dia sera.

SENTENCIA:

Hues despues di a scucha mr. Zara y mr. Kock a sera tratamento di e caso y a dicta sentencia di biaha. Mr. Zara ta haya cu no por prueba cu ta J.B. a maltrata G. y ta haya cu no mester pone J.B. paga e daño di 500 Florin. Mr. Kock a bisa cu ta un hecho cu J.B. a maltrata su mama y padrastro. E abogado ta haya cu tin un situacion fastioso cu J.B. E abogado ta haya cu e conseho di Reclasering ta na su lugar esta tratamento obligatorio.

Hues ta haya J.B. culpable di a maltrata su mama y padrastro. Tambe cu J.B. ta culpable di maltrato pero no cu e kier a causa herida severo. Hues a sigui bisa cu J.B. a maltrata G. door di manda boter riba dje. Hues no ta haya proba destruccion di television y porta di aluminium.

Pa cu e castigo, Hues a tene cuenta cu ta promer biaha e ta cay sera y tambe cu Reclasering ta preocupa cu J.B. no kier guia. Hues su decision ta cu e ta confirma exigencia di Fiscal y cu e condicional special cu J.B. ta cay bou guia di Reclasering y cu J.B. mester sigui tur conseho di Reclasering durante 2 aña. Hues a confirma e demanda di 500 Florin y cu si J.B. no paga, e mester bay 10 dia sera.

 

- Advertisement -

DUNA COMENTARIO

Please enter your comment!
Please enter your name here