Prome Minister Evelyn Wever-Croes:
ORANJESTAD (AAN) – Den conferencia di prensa di Gobierno, Prome Minister sra. Evelyn Wever-Croes, a comparti un bon decision cu hunto cu e companianan di utilidad ELMAR y WEB a wordo tuma, pa soluciona e situacion di e famianan den nos comunidad, cu pa motibonan financiero ta sin awa y electricidad te ainda.
Den e decision aki tambe Departamento di Asunto Social, lo hunga un rol hopi importante.
E mandatario a señala cu gobierno su mision ta pa baha e gastonan di awa y coriente, haci e prijs mas accesible pa tur famia y pa percura pa tur ciudadano den nos Isla tin acceso na ambos servicio.
“Naturalmente, esaki ta algo facil pa bisa pero mas dificil pa haci, mirando cu tin miles di famia cu no tin awa ni coriente”, e promer mandatario a expresa.
El a agrega cu varios biaha e tema aki a wordo delibera den Conseho di Minister. El a anuncia ayera, cu hunto cu WEB, ELMAR y Utilities, a yega na un solucion pa famianan cu no tin conexion di ambos servicio aworaki.
E dignatario a declara cu danki na e contribucion di WEB y ELMAR, gobierno lo institui un fondo financiero cu ta wordo regla door di e companianan, cu ta bay cay bao supervision di e Seccion di Guia di Famia na Departamento di Asunto Social, di manera cu un famia cu no tin conexion di awa y coriente aworaki, acerca DAS.
“E famia ta pasa den un proceso di screening, pasobra si e ta un famia cu ta pasando den problemanan social aworaki, y e mester di ayudo lo haya esaki unda e ta haya conexion mesora; un tipo di meter prepaga, un areglo di pago cu facilidadnan hopi amplio pa e suma cu e tin habri”, e dignatario a declara.
E mandatario a subraya cu importante ta pa e famia concerni haya su reconexion di awa y coriente. El a indica cu ta miles di famia tin na Aruba cu ta biba den scuridad.
“Esaki a tene nos semper hopi preocupa y molestia. Nos a drenta y nos a bisa esaki ta prome cos cu nos kier traha riba dje”, e dignatario a expresa.
El a agrega cu esaki ta pa den tur cas, tur mucha, tur adulto y tur hende grandi cu ta biba na Aruba, independiente di su situacion financiero, specialmente awa y coriente nan tin derecho riba dje y mester percura pa nan haye.
“Esaki ta un decision cu Conseho di Minister a tuma e siman aki, y nos ta den proceso di ehecucion y pronto nos lo anuncia e prome famianan cu ta bin na remarca pa esaki y por yega na Departamento di Asunto Social, pasa den e proceso di screening pa nan check cu ta hendenan cu enberdad tin mester di ayudo pasobra nan ta den problemanan financiero y social, anto e ora ey mesora nan haya un meter prepago, pa haya conexion inmediatamente”, Prome Minister a duna di conoce.
E dignatario a agrega cu pa e debe habri hunto cu e fondo di ELMAR y WEB yega na e areglo di pago. Kiermen, e famianan concerni no tin cu bay Elmar of Web, pero e ta wordo administra door di e Departamento di Asunto Social.
