Home Enseñanza “Idioma ta e centro di alma y e curpa di un nacion!”

“Idioma ta e centro di alma y e curpa di un nacion!”

20
0
SHARE
- Advertisement -

Parlamentario Sue Ann Ras relaciona cu dia internacional di lenga materno:

ORANJESTAD   (AAN) – Diaranson awo, esta 21 di februari, ta conmemora e Dia Internacional di Lenga Materno. Idioma ta e centro di alma y e curpa di un nacion y ta e wes’i lomba mes di e pueblo.

“E idioma cu nos ta papia y cu nos a siña di chikito, ta e parti obhetivo di nos sociedad, ta refleha nos modo di ta y ta representa e imagen cu nos a crea” Parlamentario pa partido MEP, Sue Ann Ras a bisa na e ocasión aki.

E ta recorda cu  ta desde aña 2000, UNESCO a proclama 21 di februari como Dia Internacional di Lenga Materno pa promove diversidad linguistico, educacion multilingual y incentiva tur sociedad pa tin un miho conocemento di e tradicionnan cultural.

“Y e aña aki, nos idioma Papiamento ta celebra 15 aña como nos idioma oficial, band’i Hulandes.” Ras a continua bisando.

IDIOMA MATERNO

E importancia di un idioma materno ta hopi mas grandi cu nos ta imagina. Lenga ta sistema y medio di comunicacion di un grupo humano. Aunke den actualidad tin un numero creciente di famila cu mas di un lenga, e concepto di lenga materno ta sigui tin valides universal.

E expertonan di educacion ta consider’e como e base di pensamento y di comunicacion intrapersonal y p’esey mes di sumo importancia den enseñansa. Na Aruba ta comproba cu nos mucha-, hoben- y adultonan tin deficiencia cu idioma materno y consecuentemente, no tin un bon dominio di otro idioma riba nivel academico.

GARANTIA HURIDICO

“Sin e garantia huridico di 2003 di nos idioma materno, nos sociedad ta incompleto y nos no por ta sociedad unda cu libertad ta goberna, sino unicamente eskema politico cu ta establece e relacionnan di poder cultural y di dominacion linguistico. E afirmacion di derecho pa uza nos propio idioma den ambito priva y publico ta un exigencia ineludibel pa e construccion di un sociedad democratico” Ras a sigui bisa.

Ora nos ta papia di lenga materno, necesariamente nos ta referi na cultura, identidad di su hendenan y su educacion. P’esey mes ta di sumo importancia pa nos sigui lucha pa e revitalizacion di lenga Papiamento y nos cultura pa involucra y/of elabora y ehecuta diverso proyecto, via educacion y conscientisacion.

Segun Ras, hopi biaha nos ta scucha con nos propio hendenan ta considera nos idioma como uno inferior y sin balor. Ainda falta pa emprende un berdadero cambio cultural y linguistico. Un cambio berdadero pa yega na harmonisacion y comprension nacional y educacion cultural.

“Lenga materno tambe ta referi na e lenga cu uno conoce miho y e lenga adkiri di forma natural sin intervencion pedagogico. E importancia di lenga materno ta, cu e merece gran reflexion y atencion. Lenga ta un rikesa cultural incalculabel y ta trata nada menos cu di un forma unico di interpreta e realidad, un bon cultura cu ta unifica identidad, integracion social y comunicacion” Parlamentario Ras a finalisa bisando.

 

- Advertisement -

DUNA COMENTARIO

Please enter your comment!
Please enter your name here