Home Comentario Indecision riba intencion di voto na Costa Rica debi na religion!

Indecision riba intencion di voto na Costa Rica debi na religion!

8
0
SHARE
- Advertisement -

Comentario:

Skirbi pa Mercedes Monge

Mi a keda contento y gradici cu dos yamada cu mi a ricibi di dos ciudadano Arubiano, cu a expresa palabranan di solidaridad pa mi pais di origen cu ayera, Diadomingo 4 di Februari, a convoca e pueblo na su eleccion presidencial 2018.

Bunita ta cu nan a laga sa cu nan lo keda pendiente di e resultado pasobra nan tin motibo pa stima Costa Rica, y mi a keda masha gradici pa e concepto cu nan tin di e “Ticonan” residente na Aruba, entre nan mi mes persona.

Un di e dos ciudadanonan aki a puntra mi ta ken mi ta kere cu lo gana. Contesta cu mi no por a duna. Lamentablemente, tin asina tanto incertidumbre cu e pueblo votador den un porcentahe haltisimo a mustra intencion di voto, pero sin sa pa ken.

Mi ta spera cu lo NO tabata tin un abstencionismo halto, pasobra di eherce e derecho di voto e sobrevivencia di nos DEMOCRACIA ta depende.

Respetando cada opinion, eherce e derecho y obligacion sagrado di voto, dificilmente nos democracia por zinc. Keda sin vota, ta e gran peligro.

Ta kico ta e motibo principal cu a surgi un controversia sin precedente? Tristo mi ta bisa. Segun un analisis di un politico experto na Costa Rica, no ta e costo halto di bida, ni e desempleo cu a crece, ni e porcentahe di homicidionan cu (aunke ta e caso den mayoria di pais Latino) a yega na un limite desconoci pa nos pueblo te ainda un decada prome. No, ni sikiera e crisis fiscal, economico y financiero cu tambe nos hermoso pais ta pasando den dje.

E motibo cu a trece un cambio radical den e intencion di voto ta cu e actual Gobierno a bay di acuerdo cu un mandato di un institucion di ONU pa ehecuta e derecho di matrimonio homosexual.

Costa Rica ta un pueblo eminentemente catolico, pero tambe a surgi miles di secta religioso, y un di nan ta encabeza pa Fabricio Alvarado, e candidato di e partido Restauracion Nacional, presente pa prome biaha den e eleccionnan aki.

Alvarado a para firme contra e matrimonio homosexual pero alavez a mustra su aversion na e catolicismo. E ta critica e santonan, e ta diaboliza nos Virgen de Los Angeles, y a denigra nos custumber y tradicionnan religioso, cu nunca a haci ningun hende daño. Pero solamente pa motibo di su promesa di no pasa e ley di Matrimonio Gay, hasta un mansa catolico a dicidi di siguie te hibe na cabes.

Costa Rica tin hopi desaroyo positivo, excelente sistema di educacion, un pais sin arma, un pais cu for di 1948 no tin ehercito, un pais cu a conoce presidentenan hopi capaz, cu a sa di goberna y desaroya progreso, y un calidad di medicina cu hopi otro pais na America Latina no tin.

Cu a surgi corupcion? Si. Na cual pais no? Cu nos mester di un presidente capaz pa combati esaki? Sigur! Pero e cualidadnan aki no ta don Fabricio precisamente tine. El a uza e homofobismo cu tin den e pueblo hincando religion y su iglesia den politica. Ki peligro! Mi ta stima mi pais den cual mi a nace, wordo educa y forma pa mi mayornan y un sistema di educacion tremendo. Y kico cu pasa, semper mi lo ta orguyoso di ta di e pais cu e democracia mas bieu di America Latina cu tanto a duma mi. COSTA RICA!

- Advertisement -

DUNA COMENTARIO

Please enter your comment!
Please enter your name here