Home Economia Ir. Edwin Jacobs: “Sin migracion no tin futuro”

Ir. Edwin Jacobs: “Sin migracion no tin futuro”

31
0
SHARE
- Advertisement -

Durante foro economico academico na U.A:

ORANJESTAD (AAN) — Siman pasa, Diaranson, den aula di Universiad di Aruba a tuma lugar e di dos Foro Economico Academico. Durante e foro aki, un panel di expertonan a elabora riba e tema di envehecimento di nos poblacion y su impacto riba e industria di turismo.

Sr. Edwin Jacobs, director di Banco di Seguro Social, SVb, a forma parti di e panel a base di e su conocemento riba e materia di envehecimento y seguridad social.

Durante e foro sr. Jacobs a trece un ponencia cu a hala basta atencion y cual ta e motibo tambe pa nos redaccion acerca sr. Jacobs pa e por splica mas riba e ponencia aki.

Siguientemente ta sigui e entrevista cu sr. Jacobs y nos redaccion.

DIARIO: Sr. Jacobs su ponencia den e foro a hala hopi atencion, esta e ponencia cu sin migracion Aruba no tin futuro. Sr. Jacobs por splica a base di kico sr. Jacobs ta yega na e conclusion aki?

Ir.Jacobs: “Prome cu mi por yega na e punto aki mi ta considera necesario pa elabora un poco mas riba e proceso di envehecimento di nos poblacion. Na Aruba nos no ta conciente completamente ainda, cu nos poblacion ta encontra su mes den un fase sumamente avanza di envehecimento. Y por lo tanto, no tin un consenshi tampoco di e impacto cu e proceso aki tin y lo bay tin riba nos comunidad, den tur aspecto, pero principalmente e aspecto fiscal-financiero.

A base di nos indicadornan di envehecimento, nos poblacion na e momento aki por wordo clasifica den e top cinco di poblacionnan mas enveheci den nos contintente”.

DIARIO: Y kico esaki ta implica pa futuro di nos isla?

Ir. Jacobs: “Eynan nos mester yega, haci un calculo di e impacto. Pa cu esaki, nos a cuminza na studia kico ta e impacto si cera fronteranan di e isla y no permiti personanan drenta ni sali. Aki nos mester tene cuenta cu un indicador importante esta, e tasa general di fecundidad. Esaki ta e promedio di yiu cu hendenan muher entre nan 15 y 49 aña di edad ta haya durante nan bida. Ta calcula cu na un tasa di 2,1 un poblacion den tempo lo keda cu e mes un grandura. Bao e 2,1 aki, un poblacion den tempo lo bira chikito. Na e momentonan aki e tasa aki na Aruba ta alrededor di 1,7 pa 1,8. Esaki ta nifica cu den tempo, si cera fronteranan di Aruba, e poblacion riba nos isla lo stop di crece y lo cuminza bira chikito.

Pues, ora nos studia con nos poblacion lo evoluciona den caso cu no tin migracion, den e caso aki di 2015 pa 2035, nos ta constata cu e aumento anual ta bay bira cada aña mas chikito. E poblacion di 60 aña of mas ta bira mas grandi. Y e forza laboral di nos poblacion ta bay ta birando mas reduci. Si no bin cambio den maneho ni den structura di nos economia, ta nifica cu menos hende lo produci na nos GDP. Pues, nos economia lo decrece den e periodo 2015-2035”.

DIARIO: Ki impacto e poblacion di 60 plus lo tin pa nos comunidad?

Ir.Jacobs: “Ta natural cu ora un persona su edad ta subiendo, e tin mas necesidad di servicio medico. Ademas, ta yega e edad caminda e ta bay cu pension di behes. E dos impactonan aki ta loke tin peso financiero pa henter comunidad. Pues, nos ta premira cu a base di envehecemento di nos poblacion, nos gastonan colectivo, esta gastonan di seguridad social y gastonan di administracion publico, gobierno, lo aumenta e proximo añanan. Si asumi cu no tin cambio den maneho cu lo conduci na control di aumento di e gastonan aki. Ademas cu lo sigui financia e deficit den sector colectivo cu fianza, e debe publico lo pasa di 82% di e GDP na 2015 pa un 284% di e GDP na 2035. Mester tene na mente cu esaki ta ora studia e poblacion sin migracion, pues e GDP lo baha den dicho periodo”.

DIARIO: Y aki ta unda migracion ta bira un necesidad?

Ir. Jacobs: “Corectamente. Pa financia nos cuentanan den futuro, ta indispensable impulsa crecemento economico, irespecto cambio den nos structura di economia. Nos poblacion mes no tin suficiente reserva na forza laboral pa mantene nos nivel actual di produccion, corda pa impulsa crecemento. Pa por mantene y crece, importacion di trahador ta indispensable. Sin crecemento economico e reto ta mas grandi ainda pa cumpli cu nos cuentanan colectivo di futuro y por lo tanto e reto ta mas grandi tambe pa mantene nos nivel di bienestar. Pa tal motibo mi ta yega na mi ponencia”.

DIARIO: Finalmente, kico tabata e meta cu sr. Jacobs a desea di logra cu un ponencia asina?

Ir. Jacobs: “Mi ta constata cu tin un falta di conciencia riba e tereno aki. Mi ta spera cu un ponencia asina aki por pone nos cuminza realiza kico por ta spera nos y mas cu tur cos, cuminza prepara nos mes pa asumi e retonan aki. Basicamente esey tabata loke mi tabata desea cu e ponencia aki”.

Nos redaccion ta gradici sr. Jacobs pa su cooperacion y ta spera cu redaccion tambe a cumpli cu su tarea di informa comunidad riba un topico cu poco biaha nos ta para keto riba dje.

 

- Advertisement -

DUNA COMENTARIO

Please enter your comment!
Please enter your name here