Home Salud Ir. Edwin Jacobs ta informa tur loke mester sa tocante AO di...

Ir. Edwin Jacobs ta informa tur loke mester sa tocante AO di dos aña pa e mesun malesa

24
0
SHARE
- Advertisement -

Den entrevista cu Director di SVb:

ORANJESTAD (AAN) – Den entrevista cu Matutino DIARIO, Ir. Edwin Jacobs, director di Sociale Verzekeringsbank (SVb), a splica mas tocante e seguro di malesa, en especial e asunto di dos aña cu por notifica AO pa e mes un malesa.

A abase di e ley di malesa, e trahador den sector priva bao e salario maximo di 70.200 florin pa aña, tin derecho riba un compensacion di 80% di sueldo diario den caso cu e no por traha pa motibo di  un malesa cu ta strobe den haci su trabao. E trahador naturalmente mester ta inscribi na SVb como asegurado.

Tocante e tema di dos aña di AO, Ir. Jacobs a splica lo siguiente:

“E ley di malesa no ta duna e posibilidad pa compensacion ilimita na e asegurado. E ley di malesa ta prescribi cu pa malesa di e mesun origen, e persona por notifica AO durante un periodo di dos aña, cuminsando desde e prome dia cu a notifica AO pa dicho malesa. Aki ta importante pa splica kico e dos añanan aki ta encera. Un ehempel seguramente lo clarifica esaki. Laga nos bisa cu un trahador ta notifica AO pa un malesa di curazon pa prome biaha dia 26 di januari 2017. Aplicando e regla di dos aña, ta nifica cu SVb lo paga compensacion pa dianan AO relaciona cu malesa di curazon, te cu dia 25 di januari di 2019. E cantidad di dianan AO por ta un luna, pero por ta dos aña tambe. Pues e dos añanan ta un solo periodo di 24 luna.”

“Nos ta mira cu den practica tin hende ta confundi y ta pensa cu pa e mesun tipo di malesa nan tin derecho riba dos aña di compensacion. Esta 24 luna di pago di dianan AO. Esaki no ta asina. Si e dos añanan di AO cay pareu cu dos aña di calender, e ora si ta papia di dos aña”.

Ir. Jacobs a ilustra e regla aki den un otro ehemplo mas concreto. “Un trahador asegura ta sufri di un ataca di curazon leve dia 26 di januari 2017 y ta notifica AO na SVb. A base di su condicion medico, e trahador tabata AO durante 30 dia. E prome tres dianan di trabao ta pa cuenta di e dunador di trabao.

E resto di dianan di trabao den e periodo di 30 dianan ta keda compensa pa SVb y e dunador di trabao ta pone 20% acerca pa e yega 100%. E siguiente biaha cu e trahador notifica AO pa motibo di malesa di curazon ta dia 3 di februari 2019.

Mirando cu e periodo di 2 aña ta caba di 25 di januari 2019, pa e AO desde 3 di februari 2019, SVb lo no paga esaki nan”, Director di SVb ta splica.

Generalmente e regla di dos aña ta hunga un papel  ora ta trata di malesanan cronico, por ehemplo diabetes y malesanan cardiovascular. Un  bes cu e malesanan aki manifesta nan mes den un persona nan no ta desaparece. Nan ta malesanan progresivo den caso cu no keda cuida adecuadamente.

Ademas nan ta bira origen di mas otro malesa den e curpa. Mirando cu malesanan cronico ta presentado na edadnan mas hoben, sigur e regla di dos aña aki lo afecta mas trahador y na edadnan mas hoben tambe. “Ta importante pa e trahador ta conciente con su salud por afecta su capacidad di gana un salario pa asina e por biba. Na momento cu tin e conciencia ey, e trahador mester cuminsa na preveni.

Ir. Edwin Jacobs a menciona cu estilo di bida ta hunga un rol importante den desaroyo di malesanan cronico. Y estilo di bida ta den man di cada persona.

“Come malo, drumi malo y consumo di tabaco y alcohol ta den man di cada persona. Y esaki ta factornan cu ta hunga un papel den aparicion di malesanan cronico. Mescos tambe nan ta hunga un rol den empeora e malesanan cronico. Prevencion ta keda e prome conseho y den caso cu e malesa cronico aparece, e conseho ta pa cuida y cumpli cabalmente cu medicamento y cambia e estilo di bida cu a yuda ocasiona e malesa cronico”. Te asina leu nos entrevista cu director di SVb.

 

- Advertisement -

DUNA COMENTARIO

Please enter your comment!
Please enter your name here