Home Comentario Ley di cacho no ta funciona y esnan brabo y cu doño...

Ley di cacho no ta funciona y esnan brabo y cu doño por sigui morde numa den bario

32
0
SHARE
- Advertisement -

Mientras cu AZV no ta cubri gasto envolvi:

ORANJESTAD (AAN) – Ta increible e cantidad di cachonan brabo cu apesar di tin doño, ta cana riba caya y ta morde hende, hopi di nan ta mucha, mientras cu e ley no ta funciona.

Tin doñonan di cacho cu no ta worry mes si nan cacho ta morde un bisiña, por ehemplo. Ora un victima tin cu bay poli pa haya atencion, tin doñonan cu ni sikiera ta habri porta di su cas ora tin e reclamo.

Un famia, por ehemplo, ta haya su mes bayendo Eerste Hulp cu un yiu cu a worde mordi y cu no ta e prome pero tabata tin mas caba den e rij su dilanti, y varios keho cerca polis, pero ni mas cu nan mes ta bin papia cu e doña nada, ningun cambio ta sosode, e cacho ta sigui bay pafo pasobra ni sabiendo cu e ta brabo e ta worde sikiera mara no obstante tur hende sa cu e ta bula cura.

AZV no ta paga pa e gastonan di un persona sea adulto of menor, cu ta haya un mordi di cacho. E victima of su mayor ta bay polis cu e papelnan di poli cu ta describi con e situacion di e persona ta y ki remedi a receta.

Tin casonan si cu polis ta pasa e caso pa polis di bario, y generalmente si por confirma cu e cacho tin doño e gastonan di poli ta bay pa e persona aki.

Pero no den tur caso e persona ta haci caso di e recomendacionnan di polis. Ketobay ta sigui laga e cacho subi caya y morde hende na su smak.

Esaki ta un actitud nada civico. Ningun consideracion pa e vecindario, no importa si tin mucha chikito cu por worde mal mordi tampoco. Muchanan cu no por bay hunga pafo pasobra nan tin miedo cu e cacho cu tin dos of tres cas pariba of pabao di nan, ta esun cu ta manda den henter e area.

Pero bay wak si un hende hostina y harta di e situacion ta maltrata e cacho hasta pa defende su mes? E ora ey si tin ley cu ta funciona, pero contra dje. Lamentablemente, esaki ta pasando den casi tur distrito na Aruba, unda tin hopi persona atemoriza pa motibo di cacho, no di caya, pero rey di cas.

Despues, e cachonanan brabo aki diripiente ta worde benta den cualkier tereno ora su doñonan mes ta cansa di dje, anto bay morde hende sin cu tin ken para responsable pe tampoco! Esta un dushi bida!!!!

 

- Advertisement -

DUNA COMENTARIO

Please enter your comment!
Please enter your name here