ORANJESTAD(AAN): Segun Ricky Croes hefe di Douane, THC ta e substancia activo di marihuana. E substancia activo eynan, si e bin den cualkier otro producto, naturalmente e ta worde considera como marihuana.
Pasobra esey ta loke ta prohibi. E Cannabis ta prohibi. E parti di Cannabis cu ta THC, ta e substancia cu ta traha den dje, cu ta haci hende halto, esey ta e parti cu nan ta uza tambe como medicinal.
Hopi hende ta bisa cu ta un inguente medicinal e ta. Pero pa motibo cu ta hinca den nos ley cu e ta prohibi, nos mester kit’e for di nan y lag’e cana su caminda legal, den e sentido hudicial.
E remedi:
Croes a indica cu tin cu traha cu nos leynan. Naturalmente ta yama officier van Justitie y nan ta tuma over. E caso ta sigui e ora. Douane ta haci su trabao. E tin su stopfunctie. Stop’e na aeropuerto of cualkier otro luga. Si el a bin den container por ehempel, ta stop esey y ta worde pasa di biaha pa e instancia cu ta sigui cu investigacion of pa e yega te na e momento cu ta pone boet, encarcela, etc.
Un turista a bin cu e mangel pa propio uzo. Esnan cu bin cu esaki como remedi pa propio uzo, no ta bin na remarca. Douane ta tume como ilegal y no mag drenta. No tin necesidad di panico ainda, pasobra Douane ta haciendo su trabao manera mester ta.
Biniendo back riba e parti unda cu Douane lo ta mas flexibel cu turistanan Mericano, Croes a comenta cu e ta pone enfasis riba e parti caminda cu Douane ta traha cu risico. Ta menciona e ora depende di unda e vuelo ta bin, ken ta bin riba e vuelo, ki risico e tin. Riba esey Douane ta bay controla, basa riba autoridad cu Douane tin y e necesidad cu tin pa controla.
Douane ta haciendo un bon trabao, Croes a comenta. Tabata tin mas catch. Hopi biaha nan ta haya azetanan di Marihuana cu ta bin di Colombia. Tabata tin otro productonan cu nan a confisca, cu esaki no ta e prome. Kisas esaki a sali den publicidad y a sali na un manera bon. E no tabata un mal intencion di pon’e eynan. Tabata pa avisa e hendenan pa tene cuenta.
No solamente pa Aruba. Douane a haci su trabao y ta haciendo su trabao, pero ta bon tambe pa e hendenan cu ta biaha bay Merca hopi, tene cuenta unda nan ta bay, cu eynan e oportunidad tey pa por hay’e.
Si bay wak riba diferente website cu tin na Merca cu ta bende esakinan, berdad ta, cu nan ta puntra prome si un hende tin 21 aña. Esey ta duna indicacion caba cu na Merca e por ta legal, pero cu nan ta mar’e tambe na un edad, of na un edad minimo, Croes a splica.
