Intestino di victima tabata for di barica y sospechosonan deteni
ORANJESTAD (AAN): — Dos caso relaciona cu hincamento a tuma lugar diasabra ultimo. Uno a tuma lugar na Santa Cruz y e otro na San Nicolaas durante oranan di anochi.
Ambos ta caso di hincamento y tin persona herida cu a wordo transporta cu urgencia pa Dr. Horacio Oduber Hospital .Ademas tin aresto a tuma lugar. Segun e recorte policial riba ordo di comandante patruya a bay asisti unidad di Santa Cruz na Rowgini’s (bringamento).
E persona cu a reporta a indica cu esnan involvi ta na un adres na Macurima. Na caminda pa e na altura di Rowigini’s na altura di e cas di e conocido rumanan Boekhoudt , patruya a wak hopi glas y boter kibra riba caminda. Yegando na e adres e señora di inicial R. a declara cu su yiuhomber y amigo di su yiu homber a wordo maltrata pa un grupo di mucha homber entre nan e conocido T. y M. Boekhoudt cu a wordo señala pa e dos victimanan. E otro mucha hombernan cu a maltrata no ta conoci.
E homer J. Dirksz tabata tin hinca na barica y tabata keha di masha hopi dolor di barica. E mucha homber di inicial T. a lesiona un dede di su man robez y parce cu el a kibra .
A solicita presencia di ambulans pa atende e dos victimanan.Recherche riba warda a wordo poni na altura. Ambulans a presenta y a atende Dirksz y na prome instacia a mustra manera cu e hinca lo a yega ten a su tripanan pero mester a hasi e testnan prome pa comproba esaki. Tromp a bay cu e famia na Dr. Horacio Oduber Hospital. Tur informe a wordo pasa pa recherche.
Mientras tanto cu urgencia tambe patruya San Nicolaas a wordo dirigi pa atende un caso grave di hincamento.
Parce cu un persona en berdad a wordo hinca hasta ta meciona cu su intestino ta colga pafor. Ambulans a wordo dirigi , Comisario Trudy Hassel , recherche tecnico, vocero di polis y Slacht Offer Hulp a wordo poni na altura.
Mientras tanto patruya a presenta y polis a wak un homber victima drumi na suela y e tabatin un hinca den barica y enberdad su shirishiri tabata pafo. Patruya mesora a solicita cu urgencia presencia di ambulans.
E victima a resulta di ta e homber di inicial P. E no tabata papia pero si tabata na tino.
Na su cara polis por a nota cu e homber tabatin bastante dolor.
E homber di inicial G. a bay papia cu e victima pa asina calm’e sperando riba yegada di e ambulans . E victim P. tabatin un cerbete blanco riba e herida poni probablemente esaki lo a wordo poni pa esnan cu a yega pa duna e victima yudanza.
E homber di inicial C. parce ta amigo di e victima y el a declara cu un grupo di mucha homber a yega y tur tabata busca problema. P. a bay stopnan y e ora ey el a keda herida.
- no por a bisa kico exacto a tuma lugar, pero e persona cu tabata yudando, di inicial G., a declara cu tabata trata di banda di S. Hazel cu semper ta den sercania di e localidad di Weg Fontein Mini Market ta circula cu esnan involvi.
E no a wak ken a maltrata P. pero si tur cu tabata meti den bringamento. Un agente policial no riba sevicio e momento ey a duna descripcion di un di esnan meti cu lo tin cabey rasta y cu e ta color scur y bisti cu camisa preto . E homber aki ta cana cu un otro homber bisti cu caminsa blanco.
Informe a wordo suministra na central di polis y otro unidadnan di San Nicolas. Anochi pa cinco pa 10’ or na altura di Sint Maarten straat 22, e sospechosonan C.Hazel y S.Hazel a wordo deteni.
Ambulans a presenta mientras tanto y e victima P. a wordo transporta pa hospital.
Durante investigacion a presenta un homber cerca e agente y el a indica cu e homber cu e momentonan ey a caba di cruza caya tambe tabata involvi den pelea.
Segun e homber e ta desea di keda anomino E personal di trafico cu a yega pa reforza a detene pa 10 pasa di 10 e homber sospechoso J. Maduro..
Tur sospechoso a wordo transporta pa warda di San Nicolaas y nan a keda presenta dilanti fiscal auxiliar. Tambe recherche tactico y tecnico y Slacht Offer Hulp a acudi na warda.
