Home Social Mensahe di su Santidad Papa Francisco pa Cuaresma

Mensahe di su Santidad Papa Francisco pa Cuaresma

13
0
SHARE
- Advertisement -

2018 “Maldad lo plama asina tanto cu amor di hopi hende lo fria” (Mt 24,12) Mi rumannan stima: Un biaha mas Pasco di Señor ta acerca. Cada aña, pa prepara nos pa ricibie, Dios den su Providencia ta ofrece nos e Cuaresma, “signo sacramental di nos conversion” (1), cu ta anuncia y realiza e posibilidad di bolbe na Señor cu henter nos curazon y cu henter nos bida.

Manera tur aña, cu e mensahe aki mi kier yuda henter Iglesia biba cu gozo y cu berdad e tempu di gracia aki; y mi ta hacie inspira pa un expresion di Hesus den Evangelio di Mateo: “Maldad lo plama asina tanto cu amor di hopi hende lo fria” (Mt 24,12). E frase aki ta den e discurso cu ta papia tocante fin di tempo y cu a tuma luga na Jerusalem, riba Sero di Oleifi, precies caminda e pasion di Señor lo a cuminza.

Hesus contestando un pregunta di un di su discipulonan, ta anuncia un gran tribulacion y ta describi e situacion den cual e comunidad di fielnan por haya nan mes: confrontando acontecimentonan doloroso, profetanan falso lo engaña hopi hende hasta menasando di paga (fria) e caridad den nan curazon, cu ta centro di henter evangelio. Profetanan falso Laga nos scucha e pasashi aki y puntra nos mes: ki forma e profetanan falso ta tuma? Nan ta manera “encantador di colebra”, o sea, nan ta probecha di e emocionnan humano pa esclaviza e personanan y hiba nan caminda nan kier.

Cuanto yiunan di Dios ta laga nan mes keda fascina pa placernan di un momento cortico, cu ta confundi cu felicidad. Cuanto homber y muhe ta biba den trans pa ilusion di placa, cu en realidad ta hasi nan esclavo di ganashi of di interes meskiña. Cuanto hende ta biba pensando cu nan ta suficiente pa nan mes y ta cai preso di soledad! Otro profetanan falso ta e “charlatannan” cu ta ofrece solucionnan facil y direct pa sufrimentunan, remedinan cu sinembargo ta resulta completamente inutil: cuanto hoben na ken nan ta ofrece e remedi falso di droga, di un relacion di “usa y tira afo”, di ganashi facil pero deshonesto.

Cuanto ta laga nan mes keda cautiva pa un bida completamente virtual, den cual e relacionnan ta parse mas fasil y rapido pero cu despues ta resulta drama estafadornan aki no solamente ta ofrece cosnan sin valor sino cu nan ta kita loke ta mas valioso: manera dignidad, libertad y e capacidad pa stima. Ta e engaño di nos banidad, cu ta hiba nos na gaba nos mes, te hasta ta hasi nos mes ridiculo, y e ridiculo no tin manera di bolbe atras.

No ta un sorpresa: semper demonio, cu ta “mentiroso y tata di mentira” (Hn 8, 44), ta presenta e malo como bon yloke ta falso como berdadero, pa confundi curazon di hende. Pesey cada un di nos, ta yama pa diserni y samina den nos curazon si e ta sintie menaza pa e mentiranan di e profetanan falso aki. Nos mester siña pa no keda den e superficialidad inmediato, pero pa reconoce kico lo por laga un marca bon y duradero den nos curazon, pasobra e ta bin di Dios y realmente ta pa nos benefisio.

Un curazon frieu Dante Alighieri, den su descripcion di fierno, ta imagina diabel sinta riba un trono di ijs (2); e ta biba den un aislamentu congela y sin amor. Laga nos puntra nos mes anto: con por ta cu caridad por bira frieu den nos? cual ta e señalnan cu ta indica cu amor ta core risico di paga den nos? Loke ta paga caridad ta prome cu tur cos e ambicion pa placa, “raiz di tur malo” (1Tim 6,10); Na esaki ta sigui e rechazo di Dios, y pesey, no kier buske consuelo cerca dje, mas bien prefiriendo di keda cu nos desolacion, prome cu sinti nos mes conforta pa su Palabra y su sacramentonan (3). Tur esaki ta transforma den violencia cu ta dirigi contra esnan cu nos ta considera un menaza pa nos “seguridad”: e yiu cu tin cu nace, e anciano enfermo, e migrante, e extranhero, pero tambe e prohimo cu no ta coresponde na nos expectivanan.

Creacion tambe ta un testigo silencioso di e enfriamento di caridad: mundo ta venena door di desperdicio tira pa negligencia y interes; laman, tambe contamina, lamentablemente mester cubri restonan di tanto naufrago di migracionnan forza; shelu -cu den plan di Dios ta crea pa canta su gloria- ta keda yena cu mashinnan cu ta laga instrumentonan di morto cai riba tera. Amor por fria tambe den nos comunidadnan: den e Exhortacion Apostolico Evangelii gaudium mi a trata na describi e señalnan mas evidente di e falta di amor aki, esakinan ta: flohera egoista, pesimismo steril, tentacion pa aisla su mes y di participa na gueranan continuo entre nos mes, e mentalidad mundano cu ta hiba un hende na ocupa su mes cu loke ta aparente, di manera cu e entusiasmo misionero ta bira menos (4). Kico nos por hasi? Si nos mira den nos mes y rond di nos e señalnan cu mi a describi prome, Iglesia, nos mama y maestra, ademas e remedi tin biaha marga di berdad, ta ofrece den e tempo di Cuaresma aki e remedi dushi di oracion, limosna y ayuno.

E hecho di dedica mas tempo na oracion ta hasi cu nos curazon ta descubri e mentiranan secreto cu cual nos ta gaña nos mes (5) pa busca finalmente e consuelo cerca Dios. E ta nos Tata y ta desea bida pa nos. E practica di limosna ta libera nos di e codicia y ta yuda nos descubri cu e otro ta nos ruman: nunca loke mi tin ta di mi so. Cuanto mi ta desea cu limosna por bira un autentico estilo di bida pa tur. Mescos, como cristian, mi kier pa nos sigui e ehempel di e apostelnan, y nos mira e posibilidad di comparti nos biennan cu otronan un testimonio concreto di e comunion cu nos ta biba den iglesia.

Pa e motibo aki mi ta hasi di mi e exhortation di San Pablo, ora el a invita e corintionan pa participa den e colect pa e comunidad di Jerusalem: “Pa boso mes bon” (2Cor 8,10). Esaki specialmente den Cuaresma, un tempo den cual hopi organismo ta realiza colctnan na fabor di Iglesia y poblacionnan cu ta pasa den dificultad. Y cuanto lo mi tabata kier pa den nos relacionnan di tur dia, na cada ruman cu ta pidi nos yudanza, nos pensa cu ta trata di un yamada di dibino Providencia: cada limosna ta un ocasion pa participa den e Providencia di Dios, na su yiunan; y si ta door di mi, Dios ta yuda un ruman awe, con mañan lo e no bai provee tambe pa mi mes necesidadnan, e cu no ta laga su mes ser gana pa ningun hende den generosidad? (6) Ayuno, por ultimo, ta debilita nos violencia, e ta desarma nos, y ta bira un ocasion importante pa crece. Pa un parti, e ta permiti nos experimenta loke esnan cu tin falta di lo indispensabel ta sinti y conoce e dolor di hamber; di otro un banda e ta expresa e condicion di nos spirito, cu hamber di bondad y cu set di e bida di Dios.

Ayuno ta spierta nos, e ta hasi nos mas atento na Dios y nos prohimo, e ta inflama nos boluntad pa obedece Dios, cu ta e unico cu ta kita nos hamber. Mi tabata kier pa mi strena traspasa e fronteranan di Iglesia Catolico, pa e yega cerca boso tur, homber y muher di bon boluntad, dispuesto pa scucha Dios. Si boso ta sinti boso afligi manera nos, pasobra den mundo inikidad ta extende, si e frialdad cu ta paraliza e curazon y e obranan ta preocupa boso, si boso ta mira cu e sentido di e mesun humanidad ta debilita, uni boso cu nos pa hunto nos invoca Dios, pa yuna hunto y entrega hunto loke nos por como yudanza pa nos rumannan. E candela di Pasco.

Mi ta invita specialmente miembronan di Iglesia pa cuminza cu zelo e caminda di Cuaresma, sostene pa limosna, ayuno y oracion. Si tin biaha, ta parse cu den hopi curazon caridad ta paga, den curazon di Dios e no ta paga. E semper ta duna nos un oportunidad nobo pa nos por cuminza stima atrobe. Un ocasion propicio lo ta e iniciativa “24 ora pa Señor”, cu e aña aki ta invita nos atrobe pa celebra e Sacramento di Reconciliation den un contexto di adoracion eucaristico.

E lo tuma luga Diabierna 9 y Diasabra 10 di Maart, inspira pa e palabranan di Salmo 130,4: “Serca Bo nos por haña pordon”. Den cada Diosesis, por lo menos un misa lo keda habri durante 24 ora sigui, pa permiti oracion y adoracion y confesion sacramental.

Den e anochi di Pasco nos lo rebiba e rito sugestivo di sende e bela di Pascu: e luz cu ta bini di e “candela nobo” poco poco lo kita e scuridad y lo ilumina e asamblea liturgico. “Cu e luz di Cristo, resucita y glorioso, kita e tinieblanan di nos curazon y di nos spirito” (7), pa nos tur por biba e mesun experiencia di e discipulonan di Emaus: despues di scucha e Palabra di Señor y di alimenta nos cu e Pan eucaristico nos curazon lo bolbe kima di fe, speranza y caridad. Mi ta bendiciona boso di henter mi curazon y mi ta reza pa boso. No lubida di resa pa mi.

- Advertisement -

DUNA COMENTARIO

Please enter your comment!
Please enter your name here