Home Gobierno Minister di Husticia hunto cu Minister di Asunto Social studiante dos ley...

Minister di Husticia hunto cu Minister di Asunto Social studiante dos ley social importante

58
0
SHARE
- Advertisement -

Pa contraresta spiral di debe:

ORANJESTAD (AAN) – Minister di Husticia, mr. Andin Bikker, a elabora den conferencia di prensa Diahuebs mainta, tocante dos ley cu ta den estudio hunto cu Minister di Asunto Social.

Na prome lugar e “Ley Schuldhulpverlening” pa yuda personanan cu ta den un spiral di debe y e Ley di Sanacion Financiero.

Minister Bikker a bisa: “Gobierno den su ‘approach’ social pa por atende cu e problemanan social cu tin den nos comunidad, mi persona conhuntamente cu Minister di Asunto Social, sr. Glenbert Croes, ta bezig ta studiante e introduccion di dos ley. Nan ta: 1. e ‘Ley Schuldhulpverlening’ cu ta ayudo pa esnan cu ta den un situacion di spiral di debe, y 2. E Ley di Sanacion Financiero”.

Ley Schuldhulpverlening:

Splicando kico e leynan aki ta encera, e dignatario a indica cu ley pa yuda esnan cu a cay den un spiral di debe ta funcionando perfectamente na Hulanda, y el a defini di kico e ley aki ta consisti.

Ta trata aki di un “help desk” cu lo worde institui pa e personanan aki, cual tin diferente instrument, por ehemplo, nan por contacta instancianan financiero, banconan, pa nan por renegocia e debe, pa wak con por baha e suma cu e persona ta paga tur luna, pa e por haya un tiki mas di espacio.

Y den cierto caso tin, incluso, instrumentnan legal unda por pidi Corte pa un “cool of period” unda den tres pa seis luna maximo e persona por haya espacio pa restructura su debenan, y despues di e lapso aki e por haya un espacio mas pa e por cuminza cu un di dos chens.

Sanacion Financiero:

Esaki ta un ley di indole personal pa casonan unda un ciudadano a yega na un spiral financiero y cu e por bin na remarca pa un fianza bancario pa renegocia su debenan.

Un ehemplo cu el a menciona ta si un persona tin un debe di 30 mil Florin, y e ta haya di banco 20 mil, cu e suma aki e por renegocia su debenan y si den e instancianan cu e debe un ta nenga y e kier manda e persona bancarota, esaki por bay Corte y pidi un amparo of decreto di Corte, pa e haya un di dos oportunidad pa e haya un sanacion financiero.

Tur esaki ta den cuadro di e plan social, por ehemplo locual Minister Presidente a anuncia tocante e yudanza pa bin di forma acelera cu meternan prepago pa e personanan cu no tin coriente na cas, cu ta parti di un maneho integral pa gobierno yuda. Problemanan social Aruba ta enfrentando pa basta aña, pero lamentablemente, e dignatario a subraya, e gobierno anterior no a haci mucho riba dje.

Pero e hecho ta cu tin un gran cantidad di nos forza laboral cu ta ganando menos cu e bestand minimo cu ta 2.600 Florin pa un pareha cu un yiu, mientras cu e salario minimo ta 1.700 fls, y esey ta haci cu tin hopi mayor cu un yiu cu un entrada asina, cu ta luchando y ta un reto pa nan tur luna, pa cumpli cu nan obligacionnan financiero den e economia actual.

“E hecho ta cu hopi di nan ta cay den un spiral di debe, y mester acomoda nan, si no, nos ta keda confronta cu problemanan social y nos ta wak cuanto problema asina ta desembocando den diferente otro tipo di problema, cu mester worde atendi di manera integral”, Minister di Husticia a subraya.

- Advertisement -

DUNA COMENTARIO

Please enter your comment!
Please enter your name here