Home Parlamento Minister Oduber a haya cu hopi tereno entrega pa cas no ta...

Minister Oduber a haya cu hopi tereno entrega pa cas no ta cuadra cu ley di zonificacion

344
0
SHARE
- Advertisement -

Drs. Lopez-Tromp riba tema Infrastructura:

ORANJESTAD (AAN) — Diamars mainta fraccion di Partido Pueblo Orguyoso y Respeta (POR), a tene cu conferencia semanal di prensa. Tabata presenta pa hiba palabra drs. Marisol Lopez-Tromp, lider di fraccion, y sr. Allan Howell, presidente di e Comision di Infrastructura di Staten.

Ambos parlamentario tabata tin como prome punto di agenda e tema di Infrastructura.

Parlamentario drs. Marisol Lopez-Tromp a duna di conoce cu siman cu a pasa, den un reunion den e Comision Fiho di Infrastructura, cual sr. Howell ta presidi, y cu a conta cu presencia di Minister di Infrastructura y Medio Ambiente, ken a duna un relato di kico el a haya durante su prome lunanan di gobernacion.

Na e reunion aki tur fraccion di Parlamento tabata invita, y nan por a haci pregunta al caso riba e maneho cu ta bay tin tocante e diferente temanan, kico ta e contratemponan cu el a topa y con e ta pensa di remedia esakinan.

“Un di e aspectonan cu sigur a resalta den e reunion aki, ta ora cu Minister Oduber a ricibi pregunta riba diferente proyecto cu lo tin canando of pendiente, y tambe riba otorgamento di tereno pa cas, pa nos ciudadanonan”, drs. Lopez- Tromp a indica.

El a agrega cu e dignatario a menciona cu tin un lista di spera basta largo y tambe el a splica kico ta e situacion cu el topa den DIP, entre otro diferente aspecto.

“Loke a resalta ta e hecho unda cu el a bisa cu na e momentonan aki el a haya hopi proyecto, muy en particular di indole comercial pero tambe terenonan entrega pa cas cu no ta cuadra cu e ley di zonificacion, cu Parlamento a aproba tanto aña pasa, y cu cualkier minister, no obstante ki signature politico tin, tin cu tene cuenta cu e ley aki.

Esencia ta, cu e minister a trece padilanti cu e departamento en cuestion no por a dune den e ultimo añanan aki di e gobernacion di AVP, un bista cla di cual ta terenonan cu a wordo otorga y cualnan no.

“En bista cu nan no tabata envolvi como debe ser den e proceso di otorgamento, aparentemente, mayoria uitgifte  tabata sosode sea na Oficina di e Minister of otro caminda of personanan cu no necesariamente tabata e trayecto di e proceso cu, normalmente, un gobernante ta pasa aden, den un procedure di uitgifte”.

E lider di fraccion di POR a sigui bisa cu, normalmente, segun reglanan di bon gobernacion tin un procedure unda cu esaki tin cu haya un conseho riba dje, y e ta wordo poni si tin tereno accesible of no, unda esaki ta y e persona eventual ta haya su reservacion y e tin cu cumpli den tanto siman of luna di tempo, pa e por mustra cu tin un plan, cu ta bay traha un cas y cu e tin e fortaleza financiero of cu e por bay un banco pa asina e por yega na su hogar.

Pues, e meta di uitgifte na final ta pa construi, no pa bende of haci negoshi manera cu a tuma lugar e ultimo añanan, di tal escala cu esaki a culmina del debatenan basta cayente aki den Parlamento, bao presencia di ex-Minister di Infrastructura, sr. Sevinger”, drs. Marisol Lopez-Tromp a subraya.

 

 

 

- Advertisement -

DUNA COMENTARIO

Please enter your comment!
Please enter your name here