Home Hudicial Muher tabatin maleta cu 32 mil Dollar mas 24 mil Euro scondi...

Muher tabatin maleta cu 32 mil Dollar mas 24 mil Euro scondi pa su otro ruman muher

259
0
SHARE
- Advertisement -

Su partner Polis a haci denuncia

ORANJESTAD (AAN) – Ayera mainta e muhernan S.M.B., G.T. y M.H. mester a presenta dilanti Hues pa duna cuenta riba labamento di placa. Ta solamente M.H. a presenta den Corte. E otro dos ta den exterior.

ACUSACIONNAN

Fiscal a bisa cu e acusacionnan ta cu G.T. y M.H. ta wordo sospecha di labamento di placa riba 7 Mei 2015 pa 7 Juni 2015. G.T. ta wordo acusa di a keda sin notifica di placa riba 20 Februari 2016. S.B. ta wordo acusa di viola ley di droga riba 25 Mei 2015. Ta asina cu G.T. ta biba na Hulanda y S.M.B. ta den exterior. M.H. a presenta pero sin abogado.

Ta asina cu M.H. lo tabatin 32 mil Dollar y 24 mil Euro warda den tas cu ta procedente di crimen di droga. E sospechoso S.M.B.  riba 25 Mei 2015 tabatin cocaina cun’e hunto cu otronan. E tabata complice door di yuda pa haci venta di 1 y despues 4 kilo di cocaina. G.T. a bin for di Hulanda cu 40 mil Euro Aruba. E tabata sa cu e placa ta procedente di crimen di droga.

BENDEMENTO DI DROGA

Hues a mustra cu e caso yama “Circo”. Diferente sospechoso ya a keda condena pa Corte. Hues a bisa cu e caso a cuminsa na fin di November 2011, caminda Polis a cuminsa investiga un grupo di persona cu tabata wordo sospecha di ta trafica droga. Cu permiso di Hues Comisario a tap yamadanan y asina a haya diferente nombernan entre otro P., A., G., Na Januari 2015 a cuminsa cu investigacion riba e sospechosonan P. y A. A resulta cu P., A. y S.M.B. tabata keda den un apartamento. Nan tabata hiba droga pa clientenan cu yama pidi pa droga. Hues a mustra cu P. a keda condena na 2016 na 5 aña di prison pa posecion di 4 kilo di cocaine. Na Mei 2016, a condena A. na 4 aña pa bendemento di droga.

Den caso di S.M.B., dia 25 Mei 2015 a scucha combersacionnan. E scucha e homber R.N. kende kier a busca 4 kilo for di P. Polis tabata observa movecionnan. Na cas di R.N. e transaccion a tuma lugar. A detene P. y den su auto a haya 21.800 dollar. Den auto di M. cu a cumpra e droga a haya 4 kilo di cocaina. R.N. tambe a wordo condena na 3 aña di cual 1 aña tabata condicional mientras cu M. a worde condena na 30 luna di prison di cual 4 luna ta condicional.

S.M.B. tabata pareha di P. Na dado momento R.N. a yama y el a contesta cel di P. cu a laga su cel na cas. S.M.B. tabata sa kico tabata pasando. A constata tambe cu S.M.B. tabata atende yamadanan di otronan y despues bisa P.

For di investigacion a sali na cla cu e sospechoso homber D.J. tin contacto cu hendenan cu ta cumpra droga. Na Mei 2015 ora cu detencionnan a cuminsa cay, no tabata scucha D.J. mas. El a huy for di Aruba.  R.J. ta mitar ruman di D.J. R.J. na 2016 a wordo condena na 30 luna di prison di cual 6 luna ta condicional. E amiga di R.J. tambe a wordo condena pa labamento di placa. E amiga aki ta ruman muher di M.H. Den e sentencia a ordena pa confisca 32 mil Dollar y 24 mil Euro. Hues a mustra cu e sospechoso dama aki na 2013 ya caba a wordo deteni na Colombia cu su mama cu cantidad di placa. El a bisa su mama pa bisa cu e placa ta pa operacion.

SCONDE TAS CU PLACA DI DROGA

E pareha di M.H. cu ta un Polis, na Juni 2015 a notifica Polis cu M.H. lo tin placa procedente di droga. Polis a bay na e cas y haya e placanan. M.H. splica cu na Mei 2015 el a haya tas di su ruman muher pa sconde placa. Su pareha Polis no tabata sa di esaki. E tabata sospecha caba cu M.H. su ruman muher tabata meti den droga pa e forma con nan tabata haci. Segun M.H., mas o menos 4 biaha su ruman muher a bay su cas pa hinca placa den e tas. Polis a confisca e tas cu e placanan. A resulta cu e dia ey M.H. no a duna tur e placa. Despues el a hiba e resto. E tabatin duele pa su ruman muher. Segun M.H. e tabata stima su ruman hopi y tabata kens y no a ripara con su ruman tabata use. M.H. a bisa cu el a warda e placa den camber di su yiunan.

EXIGENCIA FISCAL

Fiscal a bisa Hues cu e ta haya legalmente proba cu M.H. a yuda den labamento di placa 32 mil Dollar y 24 mil Euro. E mesun dia M.H. a bay hiba placanan cu el a keda sin entrega na Polis. E mes a declara cu riba peticion di su ruman muher el a warda e tas cu placanan. E tabata sospecha cu su ruman muher tabata meti den droga mirando e forma di luho cu nan tabata biba sin trabou. Fiscal a bisa cu e no ta kere cu M.H. tabata sospecha sino tabata sa. El a bisa cu si M.H. a puntra di unda e placa tabata bin, e lo no a wordo persigui. Pa cu e castigo, Fiscal a bisa cu e ta tene cuenta cu ta promer biaha cu M.H. ta cay deteni y voluntariamente el a entrega placa na Polis. Tambe Fiscal a tene cuenta cu e tempo cu a pasa caba. El a exigi 200 ora di trabou pa comunidad y si no traha 100 dia sera.

SENTENCIA

Hues a sera tratamento di e caso y a dicta sentencia di biaha. Hues ta haya legalmente proba labamento di placa. Na opinion di Hues, ta un caso serio caminda a yuda sconde placa. Pero e ta tene cuenta manera Fiscal a bisa cu M.H. voluntariamente entrega e placa y presenta den Corte pa responsabiliza su mes. Hues a confirma exigencia di Fiscal. Reclasering lo bay tuma contacto cu M.H. pa mira con lo bay traha e 200 oranan.

Fiscal despues a sigui cu S.M.B. y ta haya cu S.M.B. ta complice riba 25 Mei 2015 den bendemento di 4 kilo droga. El a bisa cu S.M.B. tabata deteni 99 dia y cu e caso ta mas cu 2 aña a pasa. Fiscal a exigi 10 luna kitando e 99 dianan y e resto ta keda condicional. Fiscal a exigi 2 aña di prueba. Hues a confirma esaki.

Pa loke ta G.T., Fiscal a bisa cu e tambe culpable labamento di placa. 40 mil Euro. Den pasado na 2009 caba G.T. a wordo condena pa droga. Fiscal a tene cuenta cu mas cu 2 aña a pasa. El a exigi 8 luna di prison condicional y 2 aña di prueba. Hues a confirma esaki.

 

- Advertisement -

DUNA COMENTARIO

Please enter your comment!
Please enter your name here