Home Parlamento “Nos tin e deber di desenmascara acuerdonan Mafioso di Mike de Meza”

“Nos tin e deber di desenmascara acuerdonan Mafioso di Mike de Meza”

172
0
SHARE
- Advertisement -

Endy Croes:

ORANJESTAD   (AAN): Dialuna durante e conferencia di prensa semanal di fraccion di MEP, parlamentario Endy Croes a reacciona riba locual parlamentario di AVP Mike de Meza recientemente a trece dilanti, rond di e desaroyonan rond di CITGO.

Segun Croes, de Meza a resucita, pasobra den e prome 100 dianan di e gobernacion nobo, ta solamente 2 biaha el a yega edificio di Parlamento.

“Mi a ripara cu el a defende e asunto di CITGO, tirando tur culpa riba Prome Minister actual”.

“De Meza a bisa cu el a traha 8 aña duro y cu el a viaha rond mundo incluyendo Trinidad, Saudi Arabia, Mexico, Brazil, Colombia y Hulanda, pa e por a logra un rehabilitacion y reapertura di e refineria”.

“E no a conta pueblo cuanto esaki a costa pueblo, siendo cu tur su viahenan no tabata tin resultado”.

Esaki segun Croes, kende a indica cu na April 2015 despues cu de Meza a viaha tanto, el a dicidi di cuminza desmantela Valero.

E parlamentario a mustra prensa e ‘front page’ di un corant den cual e noticia ey a Sali como prueba.

“Ora cu a bira conoci cu de Meza kier a desmantela e refineria, fraccion di MEP a lanta un accion, caminda cu marduga un grupo di MEP a bay para dilanti di e ‘gate’ di Valero pa manifesta”.

“Banda di esaki a manda cartanan pa e representantenan di Valero na Houston, mientras cu Glenbert Croes a indica un serie di viahe pa Venezuela, pa inicia contactonan riba su propio forza”.

“El a laga un bentana chikito habri y despues cu de Meza a anuncia cu lo desmantela e refineria, na Merca nan a bin den contacto cu representantenan di CITGO”.

Esaki segun Croes, kende a indica cu na Merca, de Meza, Richard Arends y Paul Croes a wine and dine y a core den limousine cu Rincon, despues di cual mayoria di nan amigonan a cay cera.

Ora cu DIARIO a puntra e parlamentario si algun di e contactonan di Glenbert Croes na Venezuela ta inclui den e grupo cu a wordo cera, el a bisa cu esey mester puntra Glenbert.

Croes a bisa tambe cu awor el a haya otro informacion riba un contrato unda cu Valero e tempo ey lo a bay entrega e parti terminal cu ta nan transshipment locual ta regarda e tugboats na pais Aruba, unda cu pais Aruba lo mester a pasa esakinan over pa APA, pa APA por keda cu e negoshi di tow e botonan ey pa e parti di terminal, pa asina genera un entrada extra pa APA.

Segun Croes, de Meza a lidera e proyecto y ora cu Valero a traspasa e tugboats pa pais Aruba, en bez di pasa esakinan pa APA, de Meza a duna e contrato na un grupo di amigo.

“Nos tin e deber pa desenmascara full e acuerdo Mafioso aki, pasobra nos no lo laga nada pasa, tanten nos ta trahando den e posicion aki”, segun Croes.

 

 

- Advertisement -

DUNA COMENTARIO

Please enter your comment!
Please enter your name here