Home Salud Premier a haci bishita di orientacion na Cruz Cora Aruba

Premier a haci bishita di orientacion na Cruz Cora Aruba

11
0
SHARE
- Advertisement -

ORANJESTAD (AAN): Siman pasa, riba invitacion di Cruz Cora Aruba, Prome Minister Evelyn Wever-Croes a haci un bishita di orientacion na dicho instancia unda cu e mandatario a worde bon ricibi pa e representantenan y voluntarionan.

Cruz Cora Aruba ta opera pa 99% pa medio di trabaonan voluntario. E asistencia di Cruz Cora na esnan den necesidad lo no tabata posibel sin su voluntarionan. Pa e motibo aki señor Michel La Haye di Cruz Cora a invita Minister President señora Evelyn Wever-Croes pa un bishita y presentacion.

No solamente esaki a bira un mainta hopi ameno y informativo, sino alavez e tabata uno particular pa motibo cu esaki tabata prome biaha cu Cruz Cora Aruba a ricibi bishita di un Minister. Un parti di e miembronan di bestuur di Cruz Cora cu tabata presente tambe a indica esaki y nan tabata hopi satisfecho y agradecido pa cu e bishita di Minister President Wever-Croes.

Na e ocacion aki tambe Minister President a duna di conoce cu e vision di Cruz Cora y di Gobierno di Aruba ta uno cu mesun principio humanitario. Pa Gobierno di Aruba e bienestar di nos comunidad tin prioridad. Cada persona tin e derecho di ser respeta y valora y esnan den mas necesidad merece pa ser yuda prome sin importa religion, nacionalidad, rasa, origen etnico of opinion politico.

Prome Minister Evelyn Wever-Croes a keda contento cu e invitacion y e presentacion di Cruz Cora Aruba y ta desea di tin otro encuentronan pa asina conoce mas di e trabaonan di Cruz Cora y e parti cu Gobierno por brinda den nan maneho pa nos comunidad.

- Advertisement -

DUNA COMENTARIO

Please enter your comment!
Please enter your name here