ORANJESTAD (AAN); Tanto Diasabra como Diadomingo atardi, por a mira un fenomeno raro specialmente na costa pabao di Aruba. Lama a djis sak bastante! E area panort di Fisherman’s Huts cu semper tabata conoci como “Santana di Tarai”, a bira hopi seco mes.
Kico a ocasiona esaki? E tin di haber cu e situacion astronomico, ta cu solo, tera, y luna ta traha un angulo di 90 grado. Pesey mes, aworaki por ehemplo lama cu ta cerca di equator ta mas abao. Y aki den Caribe bo ta haya e dianan aki cu marea halto ta mainta, y atardi e marea ta abao. Loke adicional a bin acerca, ta e presion di aire cu ta mas fuerte cu normal.
Desde 23 di Februari 2018, e presion di aire ta asina fuerte, cu e ta “primi y pusha” e nivel di lama pa e bay mas abao. Esey a pone di con den fin di siman, e nivel di lama ta basta abao, y cu e beachnan di Aruba a bira ‘mas largo’.
Presion halto di atmosfera tin mas efecto tambe. Por ehemplo ora bo ta horna un bolo, e presion atmosferico ta ‘pushando’ mas duro riba e bolo y e lo no laga e bolo reis mas. Pastry chefs pesey sa, cu ora cu ora awa ta yobiendo y presion atmosferico ta abao, cu bo bolo den forno lo reis mucho mas. Pero ora presion atmosferico ta halto, e ta stroba bo bolo di reis.
Mescos ta pasando cu lama. E presion ta asina halto e dianan aki, cu e ta hasta pusha e lama bay abao, y e nivel ta baha.
