Home Salud Señora di 265 kilo determina pa baha peso

Señora di 265 kilo determina pa baha peso

36
0
SHARE
- Advertisement -

Cu ayudo di expertonan awor e lo cana e caminda pa logra su meta

ORANJESTAD    (AAN): Diabierna mainta, Bomberonan hunto cu un verpleegster y e conocido Rene Wild a presenta na e cas situa na Cadushistraat # 3 na Dakota, pa por pisa un persona. Ey a topa cu Mercelina Thode, kende tin 10 aña caba drumi riba un cama y su peso a alcansa 310 kilo. E tin 10 aña riba un cama, sin cana y sin lanta. El a dicidi cu awor si ta basta y e ta determina pa baha peso cu un plan di alimentacion di Rene Wild.

E caso aki ta uno particular y socialmente lamentabel. E casa ta un pashent diabetico y como tal a perde un pia, cu consecuentemente no por yuda Mercelina, cu tur hende conoce como “Uba”. Su ruman ta asisti’e den e forma cu e por, pasobra dor di su situacion di obeso extremo, e no por move, no ta cana y mester haci tur cos riba e cama.

Verpleegkundige Zulaika Dirks hunto cu Dr. Thuis tin un tempo caba purbando tur forma pa asisti e señora aki. A forma un ekipo di boluntarionan, separa di e Dokter y e nurse, den e caso aki Azriah de Palm, Rita Thode, Merelee Arends, Rudi Carti y Rene Wild pa hunto, uzando e experticio di cada un, purba mehora e calidad di bida di e pashent.

E situacion a yega asina leu debi cu mas o menos 10 aña pasa, Uba a nota cu a forma un bala na su pia. Esey cu tempo a impedi’e di cana y asina el a bay cama y su peso a sigui subi bay. Tur esaki combina cu comemento den forma desbalansa y menos saludabel.

Ora a puntre dicon e no a bay dokter pa e pia, el a contesta cu Dokternan no tabata sa kico pa haci cune y si mester opera of no. Esey a pone cu el a opta e ora pa keda cas y sigui su bida na cama, cu e pia malo y cu un peso subiendo.

Algun tempo atras el a bira malo y no por a hala rosea bon. Probablemente e reto aki ta debi na mesun situacion di peso obeso. Nan a interne pa algun dia den Hospital. Siendo interna, dor di comemento na ora y di un dieet bon balansa, el a baha di 310 kilo pa 275 kilo.

Di eynan a start e reto pa na cas, cu ayudo profesional hunto cu su ruman, pa yude come na ora y come saludabel.

Awo, cu ayudo di Bomberonan, a saca e carga e señora for di su cama pa pafo di su cas. Ey a lage sinta riba un weegschaal grandi y special pa midi peso halto. Contento tur envolvi a bira ora a realisa cu e señora a pisa 265 kilo, pues a baha un otro 10 kilo.

Pa awor no por haci mucho, sino ta un plan di fisiotherapia masha limita cu ta inclui movecion di brasanan solamente riba cama. Esey ta den man di Rudy Carti. Como cu e no ta baha for di cama, pa awor mester logra baha su peso drasticamente prome cu e por cuminsa cana te pa e por cuminsa drenta gym di Rene Wild pa sigui un plan di movecion dirigi pa baha peso. Locual si ta haciendo awor ta come saludabel y na ora.

Como cu e famia ta den necesidad y no tin’e facil, e ekipo di profesionalnan ta aprecia cualkier tipo di ayudo. Pa awor mester placa pa cumpra cuminda saludabel pa e señora y riba dje mester cumpra un cama special pa e drumi riba dje. E cama ta costa riba 10 mil florin. A splica cu asina cu e señora baha peso y no mester e cama mas, lo regale na Wit Gele Kruis pa mas uzo.

E donacionnan pa cuminda mester ta mensual, no mester ta hopi, pero tur tiki ta yuda pa e señora por sali for di e situacion precario cu e ta den. Tur esunnan interesa por haci un transferencia pa e cuenta di banco di RBC Royal Bank, number # 31.35.306 na nomber di Gregorita Thode.

Rene Wild a sigura cu e animo di e Uba ta masha halto y e ta consciente cu si e no baha HOPI peso, cu su calidad di bida lo no drecha. E mes kier biba hopi largo mas y e sa cu e peso cu e tin awe, esey lo no ta posibel. Pues, cu e ekipo di profesionalnan cu ta su tras, cu poco ayudo di comunidad, e por logra.

 

- Advertisement -

DUNA COMENTARIO

Please enter your comment!
Please enter your name here