Home Enseñanza Situacion di Colegio Frere Bonifacius ta riba mesa y awor mester sinta...

Situacion di Colegio Frere Bonifacius ta riba mesa y awor mester sinta cu Minister

17
0
SHARE
- Advertisement -

Cabezante: “Nos kier un edificio adecua pa duna e mucha loke e tin mester”

ORANJESTAD   (AAN):  Josette Daal, Directora di SKOA a expresa su punto di bista relaciona cu e situacion di Colegio Frere Bonifacius.

El a bisa cu ta berdad cu e cabezante y docentenan a dicidi di bay den un accion pasivo cuminzamento di siman.

E preocupacion ta pa loke tin di haber cu enseñanza di e muchanan cu ta bishita e scol.

E docentenan a sinta cu SKOA y a scucha nan. A haci algun afspraak. Un di e afspraaknan ta cu lo sinta cu e minister encarga na mesa y cu representantenan di Directie Onderwijs.

E scol aki tin 6 aña cu nan no ta den nan edificio. Durante varios ocasion a mustra e estado di e scol y e derecho di renobacion. Seis aña a pasa y e edificio a bira asina deplorabel cu aworaki ta casi imposible pa drech’e, Daal a indica.

Mientrastanto, e muchanan y e maestronan a keda den un edificio cu no ta adecua pa ta un scol. “E no ta un school-gebouw. Nos ta gradicido na e doñonan, pero e ta un edificio di oficina”, a remarca.

E muchanan no tin un espacio pa haci gym, pa hunga pafo, klasnan ta chikito, entre otro.

Josette Daal ta kere cu ta costa menos placa basha e edificio abao cu bay drech’e. Pero e decision ey nunca a cay. Aworaki ta bezig ta wak otro opcion cu ta scol banda di Elmar cu ta Tarcisius Scol. Sinembargo a subraya cu e edificio aki tambe ta den un condicion deplorabel.

Esey ta e combersacionnan cu ta tumando lugar aworaki pa wak kico ta e pasonan cu lo wordo tuma, a agrega.

Di su banda, cabezante di e scol, Arline Kock a expresa cu den 6 aña nan no a mira cu tin un solucion na caminda. “Nos no por brinda e muchanan e mihor. Nos ta brinda nan e mihor lesnan cu ta posible si, pero dado momento e muchanan por desaroya nan mes fisicamente tambe. Y nos no tin un speelplaats of un gymzaal.

Ora awa ta yobe e muchanan tin cu keda den un espacio limita pasobra no por pone nan patras pasobra e ta yena cu awa. Tur esaki durante e añanan e ta cuminza pisa, a señala.

Otro scolnan a wordo drecha mientras cu Colegio Frere Bonifacius ainda ta na spera di algo sosode. Pesey e preocupacion, a reitera.

Nan kier un edificio adecua y unda por duna e mucha tur locual e tin mester. No mester ta necesariamente na Indianenweg 5, e por ta otro caminda tambe, Sra. Arline Kock a subraya.

Mester agrega cu recientemente Minister di Enseñanza, Rudy Lampe a duna di conoce cu e edificio aki unda Colegio Frere Bonifacius tabata ubica na Indianenweg lo pasa pa Universidad di Aruba.

Ban spera cu pa e proximo periodo escolar, e muchanan di e scol aki por cuminza cu un lugar drechi, adecua y segun standarnan di e sistema di enseñanza.

 

- Advertisement -

DUNA COMENTARIO

Please enter your comment!
Please enter your name here