Home General Ta bin establece companianan na Seroe Cristal sin tene cuenta cu salud...

Ta bin establece companianan na Seroe Cristal sin tene cuenta cu salud di hende ni naturaleza

247
0
SHARE
- Advertisement -

Miembro di directiva di Fundacion Conserva Sero Cristal

ORANJESTAD   (AAN):   Sr. Alex Arends, miembro di directiva di Fundacion Conserva Sero Cristal a splica di e puntonan y e posicion cu nan tin aworaki como bario.

Arends a bisa cu e bario ta hopi uni. E response pa e bezwaarnan ta echt cu forsa, pasobra cu e habitantenan no por acepta cu asina no mas ta bin pone dos compania pega cu e barionan. Y cada un ta encera dobel compania. Si wak’e bon, ora di tende e peticion pa un betoncentral y un planta di asfalt e ora esaki kiermen cu ta tres compania lo bin opera na Babijn.

Ora di tende di e peticion pa un betoncentral y un planta di asfalt, e ora ta tres compania ta bay opera. P’ariba caba tin un central di beton y tin empresa cu ta coba piedra cu santo. E ora si wak bon, e ta bira 5 compania. Casi casi ta haci e luga un luga pa companianan bin establece nan mes eynan.

Ta bin establece companianan eynan na Seroe Cristal, sin tene cuenta cu salud di hende, sin tene consideracion cu naturalesa. E ta bay pa mas di un bario. Pabou di e rotonde, e dos scolnan di paradera ta sinti e stof.

Ta wordo bisa cu e betoncentral lo no molestia ningun hende, ya cu tur cos ta den canalnan sera. Pero Sr. Arends, cu ta cria bestia, ta hay’e ta cambia e awa dos pa tres biaha pa dia. Departamento Ambiental y Naturalesa a bin haci un investigacion y a traha un rapport over di esaki. Sr. Arends ta spera si cu e rapport a yega su destino, y cu e no a bay perdi den lachi. E rapport a wordo traha na cuminsamento di December, pa cual a bin atencion, pero no accion.

Ultimamente, por a nota den noticieronan, a mira Sra. Lopez- Tromp, a bisa di lo respalda loke ta para den e ROP. Y sr. Arends ta spera cu esaki no keda na palabra so pero pone palabra na hechonan. Como parlamentario bo mester proteha e pueblo. No por laga e pueblo indefenso. Cu promesa nada ta wordo resolvi, y ta un paar di luna caba, cu e minister a bin y a bisa cu e companianan no tin permiso, pero tur cos a sigui mescos. Nada no a cambia.

E fundacion no sa cual caminda nan bay, pasobra nan ta tende puro palabra y nada di hecho, cu por duna señal cu nan ta trahando berdaderamente pa drecha e situacion aki. Nan no sa ken pa kere.

Sr. Alex Arends a sigui bisa cu apart di tur cos, cu e peticion pa e planta di asfalt, a haci un investigacion di e consecuencianan di e asfalt y di tur e daño cu esaki por tin pa salud di hende, ya cu asfalt ta un desecho di petroleo. Esaki ta bin manera e “golpe de gracia” ya cu asfalt ta pio stof. Loke e habitantenan kier, ta paz y nan kier salud, cu nan tin derecho ariba dje.

Den futuro, companianan cu kier habri negoshi mester tene cuenta cu e reglanan. Un ciudadano lo pensa dos pa tres biaha prome cu traha su cas cerca di un zona industrial ya cu e ta baha balor di e cas. Tempo cu e ciudadanonan aki a traha nan cas, nada di esaki no tabata t’ey.

Awo e ciudadanonan aki ta wordo exponi na tur e peligernan aki sin cu nan ta haci nada pa para e peliger aki.

 

- Advertisement -

DUNA COMENTARIO

Please enter your comment!
Please enter your name here