Home Gobierno Ta sumamente importante pa Aruba evita di subi riba ‘black list’ di...

Ta sumamente importante pa Aruba evita di subi riba ‘black list’ di O.E.C.D.

94
0
SHARE
- Advertisement -

Minister President Evelyn Wever-Croes: 

ORANJESTAD  (AAN) — Ultimo dianan ta den discusion e decision di Minister di Finansas pa elimina e regimen fiscal pa San Nicolas. Esaki despues cu OECD a anuncia cu e regimen ey por pone Aruba riba un ‘black list’. Minister President Evelyn Wever-Croes ta duna un splicacion hopi elabora riba esaki.

Kico ta e consecuencia di un ‘black list’?

E consecuencianan ta serio. Si Aruba bay riba un ‘black list’, esaki lo pone cu inversionistanan internacional serio no lo bin Aruba pa haci inversion. Un inversionista serio ta busca un pais serio pa inverti.

Si e pais unda e kier inverti ta riba e ‘black list’ di OECD, e inversionista no ta haya proteccion contra cobransa dobel di belasting. Tampoco e ta haya acceso den su pais na facilidadnan pa deduci e gastonan na Aruba. Un inversionista serio ta scoge e ora pa bay un otro pais cu su inversion.

Mirando cu na Aruba no tin desaroyo economico, ta sumamente importante pa Aruba evita subi riba un ‘black list’. Na e momentonan aki nos mester percura pa atrae desaroyo economico y inversion directo di exterior (foreign direct investment). Sin esaki, nos no por desaroya nos economia. P’esey e decision aki mester a bin.

Dicon Aruba tabata coriendo e riesgo di bay riba e ‘black list’?

Prome Minister ta indica cu desde e momento cu ex Minister Mike de Mesa a anuncia e regimen special pa San Nicolas, el a avis’e cu e ta buscando problema cu OECD. sr. de Mesa a comete eror tras di eror. Su intencion tabata bon talves, pa atrae inversionista inverti den San Nicolas, y asina haya un regimen di paga menos belasting.

Sinembargo e forma con sr. de Mesa a implementa e areglo internacionalmente ta conoci como competencia inhusto y dañino. Sr. de Mesa mester a scucha di consehonan y traha un areglo mas balancea, keto bay cu e enfasis riba inversionnan den San Nicolas.

Lamentablemente e decision di ex minister de Mesa a hala atencion internacional, y despues di algun aña OECD a hala atencion di e Minister di Finansas anterior sr. Bermudez, ken a hay’e obliga di tuma e decision di elimina e regimen.

Finalmente, mirando cu e tambe a laga e trabou na mitar, ta Minister di Finansas actual sra. Xiomara Ruiz-Maduro a hay’e cu e tarea pa formalisa e eliminacion aki. Awor nos mester atende cu e casonan di inversionistanan cu si a aplica na tempo, pa asina respeta e palabracionnan haci cu nan pa un tempo ainda.

Pues no ta asina cu ta elimina e areglo completo awor. Pa esnan cu a haya aprobacion, lo respeta e areglo aki pa algun aña ainda.

Plan pa desaroyo di San Nicolas

“Mientras tanto gobierno ta trahando riba alternativanan pa atrae inversion den San Nicolas, basa riba un plan integral pa desaroyo di San Nicolas; e main street y vecindario. Nos lo crea un luga pa tiendanan chikito cu semper tabata na San Nicolas, y cu a haci San Nicolas grandi.

E lugarnan rond di Zeewijk lo wordo destina pa area di industria liviano, y lo crea empleo.

Lo studia e posibilidad pa establece universidad y nan campus na San Nicolas, pa atrae un otro tipo di bishitante.

Lo evalua establecimento di hotel na Sero Colorado.

E terenonan di refineria cu no ta wordo uza mas, lo bay bek pa pais Aruba. Momento cu elimina e muraya di ‘LAGO’, lo crea acceso pa lama, pa henter comunidad. E intencion ta pa crea un area di ‘Waterfront’ pa haci San Nicolas atractivo pa negoshinan den horeca. Museonan lo wordo traha y finalisa, pa asina atrae e turista cu ta gusta arte, pa e bay San Nicolas. Pues: San Nicolas lo bira e ciudad cu e forsa atractivo caribense, cu ta atrae tur turista.

Gobierno ta lamenta cu mester a elimina e regimen fiscal favorable pa San Nicolas, sinembargo e regimen aki no a trece desaroyo pa San Nicolas y ademas ta causando Aruba hopi problema. Un biaha mas e pueblo di San Nicolas a wordo engaña pa partido AVP.

Pesey nos gobierno ta compromete su mes cu crea otro oportunidadnan pa realmente trece desaroyo den San Nicolas”, segun Prome Ministro Evelyn Wever – Croes

- Advertisement -

DUNA COMENTARIO

Please enter your comment!
Please enter your name here