Home Hudicial 25 aña di prison exigi pa asaltantenan na cas na Wayaca cu...

25 aña di prison exigi pa asaltantenan na cas na Wayaca cu a tira dama mata

576
0
SHARE
- Advertisement -

ORANJESTAD   (AAN) – Ayera atardi e Boneiriano J.P.E. y e Chines P.F. a scucha Fiscal exigi 25 aña di prison pa cada un. Fiscal ta haya nan complice di a haci e asalto arma na e cas na Wayaca y cu intencional a tira mata e dama Chines (Shasha) y tambe tira su casa den schouder.

Tratamento di e caso aki a cuminsa di mainta te den oranan di atardi. Den e articulo aki DIARIO ta publica e exigencia di Fiscal, mientras cu den un otro articulo ta publica kico tur a sosode den Corte. Dia 13 September 2016 e asalto arma a sosode caminda J.P.E. a tira mata e dama Chines y herida su casa. Tambe e lo a tira riba e yiu homber. A bay cu un suma di placa, telefonnan, cadena y un auto. Fiscal ta considera P.F. complice cu a organiza tur cos. Ta asina cu dia 23 di September 2016, Recherche a detene P.F. y J.P.E.

EXIGENCIA DI FISCAL

Den sala di Corte tabata presente hopi familiar di e victima y tambe familiar di e sospechoso. E familiarnan di e victima a sinta den tribuna abou mientras cu e familiar di e sospechosonan a sinta den e tribuna ariba. Fiscal a bisa Hues cu comunidad a keda sacudi riba 13 September 2016 ora cu e asalto arma den cas di famia a sosode den dia cla na Wayaca. E dama a wordo tira mata, su casa a sufri herida di tiro na schouder.

Fiscal a bisa cu tabatin rumornan cu lo ta door cu e yiu homber di e victima ta meti den baho mundo. Na opinion di Fiscal, esaki ta algo cu e sospechoso P.F. a crea pa kita pista riba dje. Miembronan di Recherche a traha duro y un tip valioso di un testigo a logra trece claridad den e caso. A constata e pick up shinishi di P.F. tabata core banda di e cas y a bay busca J.P.E. banda di Sport Boys. A sigui investiga cu a conduci 23 September 2016 na nan detencion. J.P.E. admiti di a haci e asalto arma y riba instruccion di P.F. E otro sospechoso P.F. ta desmenti.

Fiscal a describi con henter e asalto arma a sosode caminda J.P.E. a tira e casa promer y despues e señora. El a bay cu e auto di e señora y na altura di e veld di Sport Boys el a wordo busca pa P.F. E señora victima a sufri tiro na cabez y a fayece mientras cu e casa a keda herida na schouder.

Fiscal ta haya cu tin prueba legal cu P.F. ta envolvi den e asalto arma. Fiscal a bisa Hues cu e ta kere mas e declaracion di J.P.E. cu esun di P.F. Fiscal a mustra cu promer J.P.E. no a basha abou riba P.F. E tabata papia di un tal Maracucho. Despues el a dicidi di papia e berdad. El a bisa cu ta P.F. ta esun cu a bin cu e plan.

Fiscal a mustra cu P.F. a huur auto cu glas getint pa J.P.E. por a vigila e cas. P.F. a facilita placa pa cumpra e arma. El a mustra cu J.P.E. a wordo bisa door di P.F. cu tin un caha fuerte den e baño. Fiscal a bisa cu P.F. tabata biba na e cas pa mas o menos 1 aña. El a bisa cu e no sa cu despues cu a reconstrui e cas, e caha fuerte a wordo cambia. E famia di e cas a bisa corectamente cu e caha fuerte a wordo cambia di lugar.

Fiscal a sigui bisa cu e no ta kere P.F. cu el a wordo menaza y no a bisa Polis nada. Fiscal ta haya cu P.F. tabatin momento cu e por a core bay laga J.P.E. y avisa Polis pero no a haci nada.

El a mustra cu na April 2017 durante nan tabata wordo transporta di Corte pa KIA, a scucha nan papia di e caso. P.F. a bisa J.P.E., kende a bisa cu e no sa con expresa su lamento pa a tira mata su tanta, pa actua manera cu e ta loco.

Fiscal a conclui cu aki por bisa cu P.F. ta complice y cu nan tabata traha hunto pa e asalto. Na opinion di Fiscal, P.F. ta e iniciador di e asalto. Pa mas cu un luna a papia di esaki. A traha plan, a bay vigila pa mira e momento ideal ora e muchanan no tabata na cas.

Fiscal ta haya nan culpable di mata intencional. El a mustra cu J.P.E. a tira cu un arma riba un porta tras di cual e señora tabata para. Esey ta haci cu el a tuma riesgo cu e ta tira mata. El a tira e señora den cabez. Investigacion ta mustra cu J.P.E. a tira hopi serca di e porta. J.P.E. tambe a tira e casa di e señora. Fiscal ta haya cu P.F. tambe a mata intencional. Ora J.P.E. a conta P.F. el a bisa J.P.E. cu mester a tira tur. Segun Fiscal, Ta P.F. a busca arma y balanan y a mustra J.P.E. con mester hinca e balanan den e arma. El a conclui cu intencional J.P.E. y P.F. a mata e señora y kier a mata e casa y e yiu. Fiscal a bisa Hues cu e no ta haya proba asesinato y ta pidi pa declara nan liber di esaki.

CASTIGO

Pa cu e castigo, Fiscal a mustra cu e castigo maximo pa mata intencional ta 30 aña di prison of bida largo. E ta haya cu e duo a tira mata e dama cu e fin di haya e placa. E casa y yiu a keda traumatiza y tambe e famia. E casa lo mester bay realiza cu e no tin su señora mas. E famia awor no tin nan ser keri mas. Fiscal ta haya cu P.F. no a mustra ningun momento di ta lamenta loke a pasa. J.P.E. ningun momento a mustra duele pa loke el a haci. Posiblemente e tin di haci cu e problema mental cu e tin pero e pregunta ta di con. Na opinion di Fiscal, si scucha J.P.E. su combersacion den e bus ora e tabata wordo transporta hunto cu P.F. pa KIA, por constata cu e ta bisa cu e no sa con pa bisa cu e tabatin duele. Esey ta mustra tambe cu e no tin duele.

Fiscal a exigi 25 aña di prison pa cada un, kitando e tempo cu nan ta sera den KIA. Awor Hues ta bay studia e caso y dentro di algun siman lo tin sentencia.

 

- Advertisement -

DUNA COMENTARIO

Please enter your comment!
Please enter your name here