Home Impuesto Actualmente tin 78 mil plachi den circulacion

Actualmente tin 78 mil plachi den circulacion

13
0
SHARE
- Advertisement -

Directora di departamento di Impuesto, Luenne Gomez-Pieters

ORANJESTAD   (AAN): Departamento di Impuesto ta satisfecho cu e empeño di e trahadonan di impuesto. A cuminsa brinda e oportunidad desde fin di November, comienso di December, pa e clientenan cuminsa haci pago di impuesto di vehiculo di motor. Full luna di December y Januari tabata habri pa brinda e servicio aki.

Den luna di Januari a duna espacio pa e clientenan paga den fin di siman. Segun directora di departamento di Impuesto, Luenne Gomez-Pieters, e prome dos weekendnan no tabata mucho bon bishita, den e sentido cu tabata tin 30 pa 70 cliente cu a bin haci pago di impuesto di vehiculo di motor. Despues cu e luna tabata bayendo, yegando su final, caminda cu ta e deadline pa cumpli cu e prome dos kwartaalnan, a ripara cu e diasabranan tabata hopi mas druk, ora cu ta trata pago di impuesto di vehiculo di motor.

Ora cu a drenta e siman di 31 di Januari, naturalmente e ora ey tur hende lo a bin corda cu tin un deadline. A haya confronta toch cu rijnan hopi largo, clientenan cu di berdad tabata frustra, of ta geef aan cu ta dura mucho hopi pa duna servicio.

Tin cu bisa cu a duna diferente comunicado caminda cu a informa na diferente manera pa e clientenan ta conciente y wordo concientisa cu por haci pago di impuesto di vehiculo di motor of cualkier otro pago di impuesto, tambe via e sistema online.

A bay live cu Aruba Bank, caminda cu ta duna e espacio na e cliente, den e comodidad di su cas, pa por haci pagonan di impuesto. Ki tipo di impuesto cu por imagina. Te hasta areglo di pago por wordo hinca den e sistema di pago online.

Loke si a ripara cu poco poco e confiansa den e pago online lo mester bin. Ta mira toch e clientenan ta prefera di bin para den rij pa haci pago cu swipe of cu cash. Pero naturalmente bo ta bay haya cu un rij y si ta warda te delaster momento of riba dia di e deadline pa yega na e departamento di impuesto, naturalmente lo haya un rij hopi largo. Lo mester carga un tiki mas pasenshi e ora ey y no ta tur ora tin pasenshi, ni cu e funcionario di departamento, ni cu nan mes.

Ora cu tin un deadline di pago di impuesto di vehiculo di motor of cualkier otro impuesto, acudi tempran na departamento di impuesto, haci uzo di e oportunidad brinda via pagonan online y paga naturalmente na tempo pa evita cu despues inecesariamente ta causa frustracion cerca bo como cliente of na e departamento di Impuesto.

Si mira e cifranan, tin 78 mil plachi den circulacion. Esey ta un combinacion di tur cos. Plachi A, TX, O, B, etc. y si mira e cifranan cu tin te cu awor, no ta mucho contento cu e comportacion di pago. Si mira plachinan A, tin un 58% di cliente cu no a paga nada. Tur hende sa cu e prome dos kwartaalnan mester wordo paga pa dia 31 di Januari. E di tres y di cuater kwartaal ta bin awor aki dia 30 di Juni y si mira esaki, e ta toch cifranan cu ta un tiki alarmante, cu ta duna di conoce cu e clientenan no a tuma e deadline aki na serio, of no a cumpli ainda cu e pago di vehiculo di motor.

E siguiente pasonan lo ta, pa studia e cifranan aki bon. Naturalmente e ley ta duna espacio pa saca un cobransa cu boet, si tin un cliente cu no a paga, of lo por haci un accion caminda cu ta traha conhuntamente cu KPA, pa asina controla riba caya esnan cu no tin nan impuesto di vehiculo di motor paga.

Segun Gomez-Pieters, ora cu e mes core riba careteranan di Aruba, ta mira un cantidad di sticker poni na su luga. Tin hende ta pone e sticker di aña pasa y e aña anterior. No ta necesario pa tin e sticker di e añanan anterior riba e windshield. E sticker di e aña aki cu ta vigente, color fuscia pa henter aña y shinishi pa mita aña, lo mester wordo poni riba e windshield, caminda cu e ta visibel, pa esnan cu lo haci e trabao di control.

 

 

- Advertisement -

DUNA COMENTARIO

Please enter your comment!
Please enter your name here