Minister Evelyn Wever-Croes:
ORANJESTAD (AAN): Den un solo palabra, el a mustra cu pasonan concreto ya a worde tuma pa transforma e derecho di estado. Esaki lo brinda un base solido pa bon gobernacion den futuro.
Aruba ta preparando pa cuminsa un rumbo nobo. Cu vision y curashi nos lo bay atende nos problemanan. Na e momento aki, Aruba ta pasando door di un situacion hopi dificil. E problemanan por ser mira riba diferente tereno. Problemanan social hopi complica, situacion financiero sumamente insaludabel y un economia cu ta stagna. E probleman aki a conduci cu nos comunidad ta totalmente distorciona y ta exigi solucionnan duradero y structural. Ta e palabranan di Prome Minister Evelyn Wever-Croes.
E mandatario principal di nos pais ta indica cu banda di e problemanan aki, por bisa cu nos estado di derecho ultimo añanan a worde poni na peliger pasobra no tabata tin gobernacion drechi y integro y. Apesar di tur e recomendacionnan di e rapport di WODC na aña 2010/2011, e mayoria di Parlamento cu tabata sostene Gabinete Eman no a sa di ehecuta su tarea pa controla Gobierno manera mester ta.
E institutonan halto di estado, manera Raad van Advies y Algemene Rekenkamer, a duna señalnan alarmante ya di basta tempo. Desde 2011, Raad van Advies tabata indica cu e presupuestonan di Gabinete Eman tabata irealistico. Tambe por mira e cuentanan anual di Algemene Rekenkamer cu a mustra varios biaha riba actuacionnan ilegal di e Gobierno anterior. Un di e señalnan talves mas importante ta e hecho cu e Parlamento no tabata eherce su tarea di controla Gobierno.
Prome Minister ta bisa cu e institutonan di Gobierno a haya rason na 2014 ora cu a bin un Koninglijke Besluit, KB. Y den e KB aki por a ripara cu ta trata di loke na Hulandes ta worde yama “onbehoorlijk financieel beheer”. Un maneho financiero malo. Aki ya tabata bisto cu e interes di e ciudadano di pais Aruba no tabata central.
Despues di e KB aki a bin un protocol pa traha hunto, e “Samenwerkings Protocol di mei 2015 entre Hulanda y Aruba cu a conduci na e CAft. E meta principal di CAft tabata pa durante un periodo temporal di 3 aña yega na un situacion financiero saludabel y pa baha e debe creciente di pais Aruba. E meta aki no a worde yega.
Ya desde e prome rapportnan di CAft por a mira cu nan tabata papia cu Gobierno anterior tabata bin cu hopi cosnan incidental, tabata gasta enormemente demasiado placa y tabata tin hopi cosnan cosmetico den nan presupuestonan.
Ehempelnan di e reservacionnan cosmetico aki tabata entre otro ora di duna dispensacion di debe na SVb y e crecemento economico irealistico cu Gabinete Eman tabata aplica especialmente e proyeccionnan cu nan tabata haci door di e reapertura di refineria na 2016/2017 siendo cu nan tabata na haltura cu e refineria lo no habri.
Apesar di e proyeccionnan cosmetico aki, Prome Minister Wever-Croes a duna di conoce cu toch CAft a permiti Gabinete Eman na 2017 pa cera su presupuesto cu e proyeccionnan irealistico aki. Apesar cu CAft tabata tin un situacion di supervision riba e finanzas publico, e situacion a bira mas pio. Gobierno Hulandes tabata worde informa constantemente di con e situacion aki ta.
“A base di e ley, e ‘Landsverordering Financieel Toezicht Aruba’, CAft por a intermedia y tuma medida ya na varios ocacion sinembargo no a haci esaki.
Awo Aruba ta sinta dilanti di e retonan. Pa nos transforma e mal gobernacion den un bon gobernacion, Gabinete Wever-Croes kier tene cuenta cu e rapportnan di WODC. Den ultimo periodo di gobernacion nos pais a worde azota pa casonan di corupcion y conflicto di interes door di e Ministernan di Gabinete Eman. Un Parlamento cu no a funciona manera mester ta y cu a atacha nos democracia”.
E mandatario ta enfatisa cu Parlamento di Aruba ya a cuminsa tuma pasonan concreto al igual cu Gobierno di Aruba. Ya caba tin un proyecto di ley di screening di Ministernan cu a worde entrega. Ta trahando riba e leynan pa loke ta trata financiamento pa Partidonan Politico, un Camara di Integridad, un Camara di Presupuesto, Ombudsman y un ley di contabilidad nobo. Tur esaki teniendo cuenta cu consehonan di CAft y e consehonan di WODC di e tempo aya.
Banda di esaki, Gobierno di Aruba y Parlamento a cuminsa cu e proceso di independisacion di e institutonan halto di estado cu ta Algemene Rekenkamer, Raad van Advies y Parlamento. Ya caba un comision guia bou di Parlamento a worde lanta, cu participacion di Algemene Rekenkamer, Raad van Advies y Directie Wetgeving en Juridische Zaken pa hunto nan bay traha riba e independisacion aki prome cu fin di aña.
“Si e institutonan di estado traha mas independiente, bo por bin cu mas garantia pa nos tin un base solido pa garantisa un miho funcionamento di nos Gobierno”.
Minister President Evelyn Wever-Croes a conclui ta bisa: “Esakinan ta pasonan concreto cu a worde tuma caba cu lo transforma e derecho di estado y e gobernacion cu nos tin awo pa brinda un base solido pa bon gobernacion den futuro. Ta solamente si nos drecha esaki na un forma structura y integro nos por pone nos pais back riba e bon caminda. Pa Aruba e momento a yega pa nos cambia e rumbo di nos pais. Pa nos cambia di mal gobernacion pa bon gobernacion”.
