Home Turismo ATA a lanza campaña nobo “Ban Serio… Reconoce bo Impacto”

ATA a lanza campaña nobo “Ban Serio… Reconoce bo Impacto”

31
0
SHARE
- Advertisement -

Durante evento anual…

ORANJESTAD (AAN): Disfrutando di un ambiente unico na elugar ‘Flor di Oriente’ den centro di Oranjestad, durante e di 5 edicion di e ‘Business Mixer’ anual, invitadonan a ‘toast’ hunto cu gerencia y personal di A.T.A., pa celebra cooperacion fructifero.

Presente durante e evento aki tabata diferente miembronan di Parlamento, entre otro Presidente di Comite di Turismo di Parlamento, Setty Christiaans-Yarzagaray, Minister di Turismo Dangui Oduber, Minister di Educacion Rudi Lampe, como tambe Grace Koolman Secretario di Conseho di ministronan. Ademas tabata presente CEO di AHATA Jim Hepple, CEO di AAA James Fazzio, Director Di Aruba Ports Authority Jossy Figaroa y naturalmente invitadonan distingui di A.T.A., hunto cu su staff y miembronan di ekipo.

CEO di Aruba Tourism Authority Ronella Tjin Asjoe-Croes a inicia su discurso gradiciendo un y tur presente pa nan cooperacion duna durante e aña cu a pasa cual tabata uno pa celebra e exitonan pero tambe un aña pa refleha e retonan cu a presenta.

Aña 2017 a cera exitosamente na unda e mercado principal pa Aruba –Norte America- a mira e crecimento mas fuerte desde 2004 cu 11%.

E mercado di Latino America a mira e crecemento aki (excluyendo Venezuela), como tambe e mercado di Europa. Esaki a bay man den man cu e rendimiento exitoso di e hotelnan; Aruba tawatin e indice mas halto di crecemento den Caribe den RevPAR. Ademas di e exitonan aki, industria di crucero pa Aruba tambe a mira un incremento significante durante e lunanan cu ta conoci pa ta mas abao den turismo crucero. Tur esaki tabata delinea cu e obhetivonan strategico di A.T.A. pa 2017.

A.T.A. hunto cu otro socionan manera Banco Central di Aruba, AHATA, Aruba Airport Authority y Aruba Ports Authority a aplica un nivel di cautelo durante 2017, considererando e retonan cu e segundo mercado mas grando pa Aruba su turismo, esta Venezuela lo trece cu n’e. Mientras cu Venezuela su bishitantenan pa Aruba a reduci, esaki no a impacta e ingreso pa nos isla.

Alcontrario di esaki, e obhetivonan a sobrepasa e expectativanan, cual ya caba tabata presente prome cu e horcannan –desafortunadamente- a impacta otro destinacionnan den region Caribense. Manera ya ta conoci, esaki a trece aumento di actividadnan comercial pa nos destinacion.

E proposito principal di Aruba Tourism Authority ta pa brinda e prosperidad di Aruba por medio di turismo sostenibel.

A.T.A. ta pone hopi esfuerzo pa cu balansa e necesidadnan di e comunidad, di e bishitantenan, e socionan y tur esaki den e parameter di un desaroyo sostenibel den balans cu e aspectonan economico, social y di nos medioambiente.

Pa asegura beneficionan a largo plazo pa e industria turistico di Aruba, A.T.A. a conduci e demanda di e bishitante cu ta gasta y ta laga mas atras den nos economia, orchestrando asina un desaroyo positivo den nos producto pa aumenta e calidad pero tambe e experiencia cu e turista ta ricibi durante su bishita na nos isla.

Como parti di e enfoke pa cu e desaroyo di nos destinacion, A.T.A. a guia e desaroyo di e plan strategico pa cu nos destinacion, apropiadamente yama ‘Cu Mira Pa Futuro’. Un di e accionnan cu prioridad den e plan aki ta -por medio di un estudio- pa midi loke Aruba por carga como destinacion turistico. E sentimento cu Aruba su densidad ta demasiado halto na cierto luganan na nos isla (entre otro) a percura pa e estudio aki concreta e accion aki pa un investigacion mas profundo.

E pregunta ta si Aruba a yega su top den crecemento turistico of si nos por sigui crece. Como un destinacion madura, con nos por sigui crece, pero alavez manteniendo nos integridad como un isla pero tambe pa salbaguardia nos calidad di bida, proteha nos mediambiente y preserva nos balornan cultural y natural.

Esaki naturalmente no ta preguntanan facil pa contesta pero nan ta critico pa cu e relevancia di nos producto turistico y e bienestar general di nos comunidad.

E fin di siman cu a pasa, dianan 17 y 18 di maart, A.T.A. a conduci un encuesta, bishitando diferente lugar unda tawatin eventonan cultural. E siman aki A.T.A. a colecta casi un total di 5000 encuesta bao di e residentenan y e bishitantenan, pa cual Oficina di Turismo ta gradici e comunidad di Aruba pa nan participacion. Un di e obhetivonan ta pa identifica e impacto positivo/negativo cu e industria di turismo pa nos isla tin riba nos pueblo pero tambe asuntonan y preocupacionnan relata cu turismo unda e publico por a vocifera/expresa esaki.

Adicionalmente na e studio aki, e bishitantenan tambe a ricibi un encuesta, unda diferente localidad riba nos isla a worde bishita, manera Conchi, CasiBari, Alto vista etc. Obhetivo di e encuesta aki ta pa determina y evalua e frecuencia como tambe pa midi e densidad di bishitante cu e lugarnan aki ta atrae. E resultadonan di e estudionan aki lo duna informacion pa aporta na mehora pa un destino sostenibel, crecemento balansa y aumenta e calidad di e experiencia di e bishitantenan.

Otro actividadnan cu a pasa recien ta cu A.T.A. a lansa su website nobo diamars ultimo den e idiomanan Portugues, Italiano, Aleman y Sueco. Otro luna, A.T.A. lo lansa e ultimo 4 website cu ta pendiente.

Por ultimo, a lansa e campaña nobo titula: “Ban Serio…”

E campaña aki tin como meta pa concientisa nos comunidad di e importancia pa preserva nos herencia cultural y natural den ambos manera, terestre y maritimo.

A worde comparti un clip cortico kico comunidad por spera di e campaña aki cu e titulo:  ‘Ban Serio. Reconoce Bo Impacto.’

CEO di A.T.A. a finalisa su discurso unda el a comparti cu Aruba como un destinacion turistico madura ta na un estado critico di e cyclo di turismo. A.T.A. ta dedica pa guia e posicion di Aruba y lansa innovacion y desaroyo di un destinacion sostenibel pa beneficia e comunidad di Aruba y su bishitantenan den colaboracion cu e comunidad di Aruba y su socionan local.

 

- Advertisement -

DUNA COMENTARIO

Please enter your comment!
Please enter your name here