Home Salud Atrobe tin problema di pieu cu muchanan ta pega otro na scol

Atrobe tin problema di pieu cu muchanan ta pega otro na scol

17
0
SHARE
- Advertisement -

Mester revisa cabey di mucha na cas:

ORANJESTAD (AAN) – Matutino DIARIO a ricibi yamada di algun mayor cu ta sumamente disgusta, pasobra nan yiu cu ta bay scol basico, ta bin cas cu su cabey yena cu pieu y ta pega sea otro ruman of su mayor.

Aparte di e incomodidad cu pieu ta causa na esun cu ta carga nan riba nan cabes, scol no ta tuma mucha cu tin pieu den klas y mester keda cas. No tur mayor por keda cas cu un yiu cu tin pieu.

Pero ta parce cu no tur mucha cu sa cu tin pieu ta keha y ta keda den klas gewoon y ta otro muchanan mes ta descubri cu otro mucha di su klas tin pieu.

Na añanan 90 tabata tin un docter na BGD cu a haci un campaña contra pieu y nan a distribui shampoo na scolnan. Nan a hasta tabata investigando si ta debi na e cantidad di paloma cu mayoria di scol tin, of no.

Despues, pa un of otro motibo e campaña a stop. Incluso e tempo ey a traha un foyeto dunando instruccion na e mayornan con pa maneha e situacion aki.

Pero ultimo añanan cada bez cu e situacion aki ta lanta cabes, Salubridad Publico no ta duna ningun tipo di informacion, ni guia e mayornan of maestronan di scol kico por haci.

Mientras tanto un mucha mester keda cas te ora e delaster pieu di su cabes cay morto. Shampoo ta costoso y no tur mayor tin e placa pa cumpre. Incluso tin un lugar cu ta bende un shampoo organico cu ta funciona masha hopi mes y no ta haci e cabey ningun daño, pero como cu e ta costa mas cu 30 florin cu ta mucho placa pa e cartera di hopi mayor, e ta keda descarta como (posible) solucion.

Algun mayor cu a tuma contacto cu nos redaccion kier pidi encarecidamente otro mayornan cu sa cu nan yiu tin pieu, pa laga nan keda na cas for di principio y atende cu nan mas lihe posible.

Y tambe nan ta pidi Departamento di Higiena di Salubridad Publico pa acerca scolnan, wak di unda e problema ta surgi y purba haci algo pa elimina e causa.

- Advertisement -

DUNA COMENTARIO

Please enter your comment!
Please enter your name here