Home Comentario Atrobe un virus di griep pisa ta afectando bon parti di nos...

Atrobe un virus di griep pisa ta afectando bon parti di nos pueblo

24
0
SHARE
- Advertisement -

ORANJESTAD (AAN) – Den e dianan aki un bez mas nos pueblo ta pasando den un mal experiencia cu salud, debi na un griep pisa cu ta afectando gran parti di comunidad, atrobe cu habrimento di barica, sacamento, nanishi congestiona, por haya tosamento y keintura leve pa halto, bashamento di awa di wowo cu iritacion y inflamacion di parpado, pero cu no ta wowitis.

E ta afectando grandi y chikito, y por a compronde cu algun persona ta bay Eerste Hulp pa yudanza pasobra nan tin falta di rosea, y algun ta keda hospitaliza cu sintoma di bronquitis.

Tin indicacion cu tur docter di cas ta haya pacientnan constantemente cu e tipo di virus aki, y no tin mucho remedi pa receta si e persona no tin keintura mucho halto of tin sintoma di bronquitis.

Docternan ta recomenda e pacientnan cu tin e virus pa tuma hopi likido, pasobra ora tin sacamento pisa nan por deshidrata vooral mucha. Por duna nan Pedialite, incluso hende grandi por tume.

Ta recomenda pa den un hogar unda tin mas cu dos persona (mayornan cu yiu por ehemplo) y un ta haye, pa tene e wc hopi limpi y hacie limpi cu clorox cada bez cu e persona (sea mucha of adulto) use si tin habrimento di barica of sacamento, pa asina no sigui plama den e resto di e famia, maske mayoria di biaha un virus un bez cu un persona den cas haye e resto ta den rij. Hopi importante ta pa laba man constantemente y sigur cada bez cu ta uza e baño.

Aparentemente, e cambio di clima cu nos a caba di pasa aden a trece diferente virus cune, y incluso tin hende cu ta kere cu ta dengue, chikungunya of Zika nan tin, pero no ta asina. Mayoria di persona no ta haya dolor di articulacion ni musculo, y no ta presenta problema pa move.

Tambe, segun informacion cu nos a ricibi, personanan cu a haya e vacuna antigripal, of no ta haya e virus aki at all of ta haya masha leve mes. En general e periodo cu e griep aki ta di mas of menos tres pa cuater dia y despues su so ta disparce, si no ta cu un of otro motibo, manera un persona cu tin un malesa cronico, tin algun sorto di complicacion.

Si ta asina cu e griep aki ta strobando mucha pa bay scol y adulto pa traha ya cu alomenos dos dia mester tuma AO.

- Advertisement -

DUNA COMENTARIO

Please enter your comment!
Please enter your name here