Home Parlamento AVP ta kere mira con Parlamento completamente poni un banda door di...

AVP ta kere mira con Parlamento completamente poni un banda door di Gobierno

99
0
SHARE
- Advertisement -

ORANJESTAD(AAN): Durante campaña a pone hopi enfasis riba transparencia y fortificacion di posicion organonan constitucional, manera Parlamento y Raad van Advies. Te dia di awe esakinan no a ricibi e plan financiero (FEM), ni e informe di entradanan mensual di impuesto, ni tampoco e ‘uitvoeringsrapportage’ di e ultimo kwartaal di 2017.

E promesanan di campaña ta worde neglisha y otro instancianan cu ta pafo di nos orden constitucional, si ta ricibi informenan riba maneho financiero y economico. “Mi a haci uso di e derecho cu nos consitucion ta brinda Parlamento y mi a solicita esakinan na Gobierno,” Parlamentario Richard Arends a declara.

Miembro di fraccion di AVP, Parlamentario Richard Arends, ta mustra cu e promesanan aki tabata envano. For di siman pasa por a nota den prensa cu Minister di Finansa, Asuntonan Economico y Cultura a entrega un concepto di su plan financiero (FEM) na e colegio di supervision financiero, esta CAft.

“Mester remarca cu CAft ta un colegio di consulta y conseho pa Parlamento y Gobierno, pero no ta un colegio halto di estado cu un posicion den nos constitucion,” e parlamentario ta splica. “Pa es motibo aki ta di lamenta cu otro instancianan tin e plan financiero di Gobierno prome cu Parlamento mes.” Raad van Advies tampoco a ricibi e plan financiero aki ainda.

Parlamentario Richard Arends a remarca cu segun e ley di supervision financiero, Gobierno mester entrega na Parlamento na final di cada kwartaal un relato di e gastonan y entradanan.

“Esaki no ta keda na discrecion di Gobierno, pero e ta hancra den e ley di supervision financiero temporal,” Parlamentario Arends ta sigui bisa. “Gobierno tin e obligacion, mescos cu nos tur, pa cumpli cu ley. E ‘uitvoeringsrapportage’ di e di cuater kwartaal di aña 2017 mester a yega Parlamento for di dos siman pasa caba y nada ainda.”

Gobierno no ta cumpliendo tampoco cu e obligacion prescribi pa e ley di supervision financiero temporal di publica e consehonan, informacionnan y corespondencia cu CAft riba e website www.overheid.aw.

“Entradanan di Gobierno manera bbo, aduana y e primanan di seguronan medico y social ta indicadornan directo di bo actividadnan economico”, Sr. Arends a splica.

“Pa por monitor e actividadnan economico riba nos isla, mi a manda pidi Gobierno pa e informe mensual di entradanan di Pais Aruba cu ta worde suministra pa Departamento di Impuesto y Departamento di Aduana,” Sr. Arends a indica.

“For di januari cu mi a haci e peticion aki, te dia di awe Parlamento no a ricibi ningun reaccion.”

Nos por conclui cu Gobierno ta dunando mas importancia na un instancia temporal manera CAft y ta exclui e organonan constitucional manera Parlamento y Raad van Aruba di ricibi informacion riba e maneho financiero. Ta un lastima cu durante campaña a haci promesanan pa fortifica posicion di Parlamento door di promove transparencia, mientras cu den realidad lo contrario ta sosode.

“Mi ta spera cu mi coleganan den Parlamento cu ta sostene oposicion ta tene bista skerpi riba esaki, mescos cu nan a bin ta bisa for di un principio,” Parlamentario Richard Arends a conclui.

 

- Advertisement -

DUNA COMENTARIO

Please enter your comment!
Please enter your name here