Home Economia Banco Central a presenta e raport “Innovation Policy Framework 2030” na Gobierno

Banco Central a presenta e raport “Innovation Policy Framework 2030” na Gobierno

23
0
SHARE
- Advertisement -

ORANJESTAD   (AAN) – E siman aki Banco Central di Aruba (BCA) a presenta e raport “Innovation Policy Framework 2030”, na Gobierno di Aruba, cual ta contene diferente recomendacion pa stimula nos economia. Durante e bishita oficial cerca Promer Ministro Wever-Croes, president di BCA, Sra. Jeanette R. Semeleer, a presenta “Isla Innovativo”.

Nos ta contento di por ofrece e raport “Innovation Policy Framework 2030” na gobierno y comunidad di Aruba. E guía y roadmap aki a wordo desaroya a base di un analisis extenso di estudionan economico y diferente plan nacional di innovacion, ademas di diferente reunion, encuentro y ideanan di varios stakeholder den nos comunidad, cu a participa na e encuesta nacional “State of Innovation”, segun sra. Semeleer.

E plan di Isla Innovativo ta identifica oportunidadnan nobo pa Aruba pa innovacion y diversificacion economico, pa asina crea motornan nobo pa crecemento responsabel. Isla Innovativo ta duna contesta riba pregunta manera por ehempel: Con gobierno lo por sirbi nos comunidad y bishitantenan di forma mihor y mas eficiente? Cua inversionan lo mester haci awe pa por crea solucion duradero pa mañan? Con nos lo mester mehora nos productividad y fortalece nos resistencia pa adapta di forma continuo? Con nos por crea oportunidad pa e ingeniero digital of científico di datos cu aki cinco of diez aña tin diferente oportunidad y proyecto aki na Aruba?

Durante e reunion cu Promer Ministro Wever-Croes, Sra. Semeleer a expresa cu Aruba ta para na e crusada di transformacion digital. “Nos ta enfrentando un momento critico den nos desaroyo como un pais joven, y nos tin e oportunidad y responsabilidad pa haci esaki di forma corecto. Nos mester tribi di pensa di forma grandi, y maneha innovacion di manera responsabel, incluso y flexibel. Inversionan den innovacion ya no ta un opcion mas. Innovacion a bira un mester pa por garantisa exito di Aruba den futuro”, segun sra. Semeleer.

Promer Ministro Wever-Croes a duna danki na BCA y presidente Semeleer pa lidera e iniciativa aki di innovacion nacional, sperando asina aki di por traha cu tur sector y instancia publico y priva riba caminda pa un isla innova cu ta basa riba conocimento y tecnología, y ancla den nos balornan.

Banco Central di Aruba ta desea di duna danki na tur hende y instancia cu a colabora riba Isla Innovativo, asina aki aportando nan tempo, conocimiento y experiencia durante varios reunion y tayer. E “Innovation Policy Framework 2030” ta disponibel riba website di BCA (http: //www.cbaruba.org).

 

- Advertisement -

DUNA COMENTARIO

Please enter your comment!
Please enter your name here