Home Hudicial Basilamento entre dos homber a resulta traficacion di droga

Basilamento entre dos homber a resulta traficacion di droga

170
0
SHARE
????????????????????????????????????
- Advertisement -

Un a bin for di New York pa topa cu e otro

ORANJESTAD (AAN): Un Dominicano bibando na New York a bin Aruba pa topa cu un Arubiano. Segun e Dominicano Y.A.(21), e tabata basila cu e Arubiano Y.C. y a bin Aruba pa nan topa otro. A resulta cu Y.A. a worde gara na aeropuerto cu 1.5 kilo di cocaina pega na su curpa.

Fiscal a exigi 18 luna pa Y.A. y 24 luna pa Y.C., kende a yega di cay sera caba na Merca pa transportacion di droga. Hues a bisa cu e ta bay studia e caso y otro luna lo dicta sentencia.

ACUSACION:

E acusacionnan cu Fiscal a presenta den Corte contra Y.A. ta cu riba 27 November 2017, exportacion di cocaine. Y.C. ta worde acusa di posecion di cocaine y entrega entre 1 November 2017 y 27 November 2017. Tambe Y.C. ta worde acusa di prepara exportacion di cocaine.

EXPORTA COCAINA:

Ta asina cu Y.A. ta un taxista na New York. For di declaracion cu el a duna na Polis por compronde cu e ta homosexual y a conoce Y.C. riba un website y a dicidi di bin Aruba pa topa cu Y.C. Dia 27 November 2017 Y.C. a worde deteni na aeropuerto na momento cu e kier a viaha back pa New York. E tabatin droga pega na su pia cu a resulta casi 1.5 kilo di cocaine.

Den Corte Y.A. a bisa Hues cu el a gaña riba Y.C. y cu Y.C. no tin nada di haci cu e caso aki. Y.A. a bisa Hues cu ta duele cu a gaña riba Y.C. pasobra e no kier a papia riba e persona real. Segun Y.C., e persona a bin cun’e for di New York y e tin miedo cu e persona lo tuma represaya contra dje. Pesey el a dicidi di gaña riba Y.C.

Segun Y.A. e persona a bin cun’e, a paga hotel p’e. Na hotel el a topa cu e personanan cu lo duna e droga pa hiba. El a yama Y.C. pa e haya marihuana pa e huma. Y.A. a bisa cu Y.C. a yud’e cu cuminda tambe. Un homber, un tal Fabian, a busk’e y hunto cu un tal Gordo y un muher Venezolano a pega e droganan na su pia.

El a bisa cu el a pidi taxi pa hib’e aeropuerto. E homber Fabian ta di New York y a bin Aruba promer cu Y.A. El a conoce Y.C. door di Gordo pa usa marihuana. Ta Gordo ta esun cu a introduci’e na Fabian cu ta na New York. Y.A. a bisa cu e no kier a papia di Fabian cu Polis pasobra Fabian sa unda e ta biba na New York. Pesey el a papia di Y.C. pa evita cu a detene Fabian. Segun Y.A., e no kier a bisa Y.C. kico tabata pasando.

Y.A. a bisa cu via Gordo, e mester busca placa na Western Union y duna Fabian e placa. Y.A. a bisa Hues cu e lo haya 5 mil Dollar pa su trabao di transporta droga. E palabracion tabata cu ora e yega New York e lo haya e placa.

SOSPECHOSO TA DESMENTI:

Hues a puntra Y.C. kico e sa di e caso aki. Y.C. a bisa cu 24 November 2017 Y.A. a busca contacto cun’e. Gordo a yama Y.C. pa yuda Y.A. pa haya marihuana. Su siguiente dia el a bay cerca Y.A. y hib’e Western Union. Despues a bay den Rancho pa e cumpra marihuana. Dia 27 November 2017, Y.A. a yam’e y puntr’e pa hib’e aeropuerto.

Despues el a pidi pa hib’e na un adress na Ponton. Despues Y.C. a papia cu Y.A. cu el a yega cay sera na Merca pa droga na 2014. El a mira cu Y.A. a bira nervioso y a puntr’e si el a guli. Y.A. a bisa cu no. Y.A. a bis’e cu e kier bay aeropuerto cu taxi. A yama taxi pa busca Y.A. y hib’e aeropuerto. Y.C. a splica Hues cu tempo cu e tabata sera na Merca, el a conoce El Gordo.

EXIGENCIA DI FISCAL:

Fiscal a bisa cu Y.A. a worde haya cu 1.5 kilo di cocaine. Pregunta ta si Y.C. ta esun cu a duna Y.A. e droga pa bay New York. Na opinion di Fiscal, si resulta cu ta Y.C. a duna e droga, e ora Y.C. ta culpable di prepara transporte di droga y posecion di droga.

Fiscal ta haya cu e hecho cu Y.A. a menciona Y.C., ta mustra cu ta Y.C. ta esun cu a duna droga. E hecho tambe cu Y.C. a yuda Y.A. cumpra marihuana. Fiscal a mustra cu ora a bay scucha yamadanan di Y.C., despues cu Y.A. a cay sera, tin yamadanan for di New York ta puntra di Y.A. Fiscal a señala cu Y.C. tambe a yama Y.A. pa mira si el a yega bon New York. E no a haya Y.A. pasobra Y.A. a worde deteni na aeropuerto.

Fiscal a sigui bisa cu Y.C. tabata yuda Y.A. y a bay cumpra cosnan cu Y.A. E ta haya cu tin suficiente indicacion cu ta Y.A. ta esun. Pa loke ta castigo, Fiscal a bisa Hues cu e ta tene cuenta cu tin mula, intermediador cu ta organiza, e grandinan cu ta percura pa e droga. E grandi di droga por ta El Gordo. Fiscal a exigi pa Y.A. 18 luna di prison. Pa Y.C., Fiscal ta haya cu Y.C. tin un funcion mas halto. El a yega di cay sera caba na Merca pa droga. Fiscal a exigi pa Y.C. 24 luna di prison. Tambe Fiscal a bisa pa destrui e droga y cu e cellularnan ta keda confisca.

ABOGADO:

Abogado mr. Mohamed a bisa Hues cu Y.A. a admiti tur cos y ta referi na decision di Hues. Abogado mr. v.d.Biezen a bisa Hues cu e no ta haya cu tin suficiente prueba contra Y.C. El a mustra cu Y.A. a declara na US Custom cu el a conoce Y.C. via site special.

E ta homosexual y a bin Aruba pa pasa bon cu Y.C. y cu ta Y.C. a pone droga na su pia. Den Corte Y.A. ta bisa cu el a gaña riba Y.C. El a pidi Hues pa traha un procesverbaal riba e declaracion di Y.A. den Corte pa asina e por us’e. E abogado a sigui bisa cu na Polis tambe Y.A. despues di e promer declaracion, a bisa cu Y.C. a yud’e cu cuminda pero no cu el a pone droga na su pia. E abogado ta haya e declaracionnan di Y.A. no confiabel y no por us’e como prueba. Na opinion di mr. v.d.Biezen, Y.C. no tabata sa nada cu Y.A. a bin Aruba pa transporta droga.

El a core hiba Y.A. Ponton. E abogado ta kere cu na Ponton, e droga a worde pega na pia di Y.A. El a menciona cu tabatin un persona hunto cu Y.C. den auto riba 27 November 2017 ora cu a hiba Y.A. Ponton y despues cas di Y.C. Despues Y.A. a pidi pa un taxi bay busk’e y hiba aeropuerto. E persona ey no a presenta den Corte pa worde scucha como testigo. El a pidi Hues pa declara Y.C. liber.

Y.C. a cuminsa yora y bisa cu e ta sinti’e hopi malo cu e ta worde envolucra den un caso cu e no tin nada di haci cu esaki.

Hues a bisa cu e ta sera tratamento di e caso y dia 13 April 2018 pa 8.15 lo tin sentencia.

 

- Advertisement -

DUNA COMENTARIO

Please enter your comment!
Please enter your name here