Home Parlamento “Cambionan di leynan actual lo aumenta eficiencia di aparato gubernamental, promove bon...

“Cambionan di leynan actual lo aumenta eficiencia di aparato gubernamental, promove bon gobernacion y mehora control financiero”

43
0
SHARE
- Advertisement -

Lider di fraccion di MEP, sr. Rocco Tjon

ORANJESTAD (AAN): Lider di fraccion di MEP, sr. Rocco Tjon a elabora durante un conferencia di prensa di su partido, riba situacion financiero cu mas trempan den siman, nan a splica bon cla e motibo pakico Aruba ta den situacion financiero actual, como tambe esnan cu tin e responsabilidad riba esaki.

Awe e politica cu nan ta bay para p’e y hiba ta di no solamente critica sino trece solucionnan. Pa por garantiza bon gobernacion y situacion financiero pa practica bon gobernacion ta un aspecto hopi importante. Nan tin un plan completo pa garantiza integridad y e ta enfatiza cu su colega, parlamentario Edgar Vrolijk, a entrega un ley di iniciativa pa asina garantiza integridad pa loke ta trata e screening di candidatonan pa minister y minister plenipotenciario. Y e tambe ta trahando riba un ley di financiamento di partidonan politico.

Pa garantiza cu nos situacion financiero, di berdad, den futuro ta bay bira uno sostenible, nan ta trahando riba un ley di contabilidad. Nan tin un concepto nobo hinca den otro y banda di e ley aki, nan kier trece dilanti un ley di maneho financiero. E motibo ta cu e ley actual di contabilidad ta data di 1989, y manera tur hende sa, mundo ta cambia, tur cos ta bira dinamico, y pesey mester percura pa leynan wordo adapta na e situacion aki.

Sr. Tjon a bisa cu e por papia riba experiencia propio, door di burocracia existente, no solamente bo ta frusta e departamento, ta demotiva e personalnan, pero tambe ta malgasta hopi di e fondonan, door cu departamentonan nan mes no tin e autoridad pa di berdad por actua of cera acuerdonan of cumpra cierto materialnan cu nan tin mester di dje.

Door di adapta y cambia e ley actual, lo aumenta eficiencia di aparato gubernamental, lo promove bon gobernacion y un mihor control, pasobra un di e motibonan primordial y e parlamentario ta enfatiza riba dje, no ta solamente e hecho di un mal maneho a conduci cu ta den situacion actual, pero tambe e hecho cu parlamento no tabata haya tur documentacion pa haci nan trabao y parlamento no tabata eherce nan trabao manera mester ta. Esey no ta su persona ta bisa, pero tur rapport di instancianan imparcial ta bisa. Esaki ta motibonan cu nan ta bay ta pro-activo y percura pa bin cu solucionnan duradero.

Un di e bentaha di e cambio di ley, ta bay duna hefe di departamentonan hopi mas autoridad pa asina nan por actua mas lihe. E ora por papia di un maneho independiente di presupuesto, esey ta nifica cu no solamente nan lo percura pa e maneho traha optimal entre minister y hefenan di departamento, pero esaki lo trece un mihor comunicacion den e departamentonan mes.

Manera e ley wordo introduci, lo iguala politica di presupuesto, pasobra esaki ta mas cu un aña, y parlamento lo controla esaki mucho mas mihor. Kiermen di berdad ta bay wak, si e maneho cu ta wordo presenta, ta wordo cumpli.

Den e ley aki, lo defini cu tres biaha pa aña, gobierno mester presenta un informe di ehecucion di situacion financiero, y esaki lo wordo mara tambe na presupuesto supletorio. E importancia di esaki ta, pasobra den ultimo añanan parlamento ta wordo confronta cu presupuesto supletorio, cada tres luna lo por adapta e presupuesto. Y mester haya aprobacion di parlamento pa esaki. E control lo ta mas riguroso riba maneho y riba recursonan, pero tambe lo aleha di aproba y cambia maneho ‘ad hoc’. Na final di dia, esaki ta cumbini e aparato gubernamental.

E parlamentarionan ya caba a sinta cu Ministerio di Finanza pa asina bin cu un ley nobo of adapta leynan y nan tin e prome concepto. Nan lo sigui cu bishitanan na diferente institutonan di consultorio, y otro siman nan lo sinta cu prome 15 hefe di departamento, pa asina scucha exactamente con nan ta experencia esaki y kico ta e puntonan cu mester pone mas atencion riba dje, specialmente pa loke ta trata maneho di recursonan.

Tjon a bisa cu hopi biaha como hefe di departamentonan, nan ta wordo confronta cu nan tin cierto recursonan riba papel, pero ora nan kier haci uso di e recursonan, minister mester a aloca nan pa otro cos.

E base di e ley, nan a studia diferente ley cu ta reglamenta y ley existente pa yega na uno cu ta fit e situacion di Aruba.

E parlamentario ta kere cu esaki no solamente lo trece solucionnan pa e situacion actual, pero e ta bay ta un solucion duradero cu no solamente ta bay mara e gobierno aki, pero gobiernonan den futuro tambe.

Ora ta papia di un parlamento critico, un parlamento cu ta bay eherce nan funcionnan manera debe ser, bo mester percura pa esaki tuma lugar, no obstante cua gobierno ta na mando. Parlamento su trabao ta pa ta critico y controla gobierno.

Esaki ta pasonan concreto pa soluciona e situacion y percura pa nunca mas nos yega asina leu caminda derechonan fundamental di parlamento ta wordo trapa.

 

- Advertisement -

DUNA COMENTARIO

Please enter your comment!
Please enter your name here