Home Deporte Ciclistanan a competi riba caminda durante Dia di Himno y Bandera

Ciclistanan a competi riba caminda durante Dia di Himno y Bandera

22
0
SHARE
- Advertisement -

ORANJESTAD (AAN): Deporte di ciclismo tambe a luci dia 18 di Maart cu participacion di mas cu 70 coredor.

Riba nos dia nacional, deporte di ciclismo di ruta a haya un tremendo acogida y a luci riba careteranan di Aruba cu e careda Clasico Himno y Bandera 18 Maart. Un peloton grandi di ciclista di ruta, cu participacion di coredornan di Curacao y Bonaire a sali for di Colony San Nicolas, bou guia di unidadnan motorisa di Polis  pa recore 95 KM di nos isla.

Na momento cu e oficialnan di Aruba Wieler Bond (AWB) a duna inicio na e careda, e ciclistanan a ranca sali cu bon velocidad. Un grupo grandi di ciclista a forma e peloton cu a continua cu nan compentencia rumbo pa Arashi.

E ciclistanan a worde acompaña pa e “official LeadCar” di AWB enconhunto cu e unidad di motorcycle cu ta forma pa un grupo voluntario. E recorido di 95 KM a hiba e ciclistanan pa promer biaha, pa pasa riba e green corridor ten a altura di e rotonde di aeropuerto. Di aki a bolbe pa Balashi pa asina desvia pa e careteranan di Santa Cruz y Jaburibari. A continua via Alto Vista y Turibana pa asina yega Arashi y bolbe back via e mesun ruta pa culima riba Sero Colorado. Hopi tabata esnan cu a para banda di caminda pa presencia e careda cu a duna honor na nos dia Nacional.

Mientras cu e adultonan ta competiendo, nos muchanan a keda den Colony pa asina nan tambe participa na un careda riba un ruta mas cortico diseña specialmente pa nan.

Na final di e mainta a otorga e premionan na e ganadornan.

E ganadornan den diferente categoria pa e competencia di e Clasico Himno y Bandera ta manera indica riba e graficonan:

Aruba Wieler Bond ta gradici tur ciclista, adulto y mucha, tur e teamnan, miembronan di AWB, mayornan, coachnan y e comisarionan di careda. Esnan cu a encarga cu road safety: Wim Sommen cu a maneha e AWB official leadcar patrosina pa Print Media, Tri Bike y Techshack hunto cu KPA, y e Motor Unit forma pa motorcycles, ImSan pa e ambulance y Frits como Paramedic. Un palabra di agradecimento na e negoshinan y e organisacion MotiVami cu a pone nan vehiculonan disponibel pa duna asistencia na e coredornan. E transportacion di bus pa e coredornan ta danki na AGW Tours. Un palabra di agradecimento pa e personal di DOW pa nan ayudo.

E siguiente evento di AWB ta tuma lugar diasabra awo dia 24 maart, cu ta e careda di mountain bike pa mucha, y diadomingo 25 maart pa aduto. Tambe AWB tin un bike tour pa henter famia.

- Advertisement -

DUNA COMENTARIO

Please enter your comment!
Please enter your name here