Home Hudicial Como 34 luna di prison exigi pa dos homber cu a viola...

Como 34 luna di prison exigi pa dos homber cu a viola dama hoben

2217
0
SHARE
— Violacion a sosode despues di Parada di Luz na Playa.
- Advertisement -

ORANJESTAD (AAN): Aunke cu e hombernan A. y P. a bisa Hues cu nan no a viola sino a tene relacion sexual boluntario cu e dama hoben, Fiscal no ta kere nan y a exigi 34 luna di prison pa cada un. E lamentable incidente aki a sosode aña pasa durante parada di luz na Oranjestad.

E sospechoso A.(di 28 aña) su abogado tabata mr. Zara y e sospechoso P. (di 23 aña) su abogado tabata mr. Figaroa. Fiscal a acusa nan di a viola un dama hoben riba 18 Februari 2017. E victima tabata presente den sala di Corte y por a ripara cu e tabata hopi emociona y hasta su wowo tabata yena cu awa.

    VIOLA:

Hues a mustra cu e dama a haci denuncia 18 Februari 2017 di a wordo viola. El a bay parada di luz y na dado momento el a perde su amiganan. El a topa cu P. y a puntra si e por haya lift. El a bay busca e dama banda di Biblioteca hunto cu A.

Na dado momento A. a bisa cu e auto lo tin problema y pa bay Pos Chiquito pa cambia auto. E dama a bisa cu no tabatin problema. Nan a pasa cas di P. kende a coy un boter di whisky. Na dado momento nan a bay Mangel Halto. P. a keda pidi e dama pa sali for di auto y a insisti pa e dama huma marihuana y bebe Whisky cu Sprite cu nan. Ora el a bira burachi, nan a bay na un apartamento.

Den e apartamento e dama a insisti cu e no kier tin nada cu nan. Tanto A. y P. a abusa di dje diferente biaha.

Despues den oranan di mainta, nan a bah’e na Paradera y el a dicidi di conta su ruman muher kico a sosode y a bay Polis haci denuncia. Na Polis e mama a haya sa kico a pasa. El a mira su yiu tabata tembla ora a yega cas pero no kier a bisa nada. El a bisa e mama cu e kier bay Polis pa haci denuncia.

   SOSPECHOSONAN TA DESMENTI:

Hues a cuminsa cu e sospechoso P. caminda a puntr’e kico a sosode. Segun P., nan tabatin relacion voluntario. El a bisa Hues cu si tabatin violacion, lo a laga e dama na e apartamento.

Segun P. nan a bisa e dama cu e auto no ta traha bon y cu mester cambia auto te Pos Chiquito. E ta haya cu e dama por a bisa pa bah’e na Paradera promer. P. a bisa cu e no ta corda mucho bon. El a bisa cu e caso ta 8 luna pasa. Hues a haci’e diferente pregunta y e tabata bisa cu e no ta corda bon. Hues e ora ey a mustra kico P. a declara na Polis. Na Polis el a declara cu el a papia cu A. pa bay na apartamento pa tene relacion sexual cu e dama. P. a keda bisa cu ningun momento tabatin violacion. El a bisa cu el a puntra e dama si e kier bebe pero no ta asina cu el a forza e dama pa bebe. El a bisa tambe cu no ta asina cu el a ranca man di e dama pa bay den e apartamento.

El a bisa Hues cu e dama a cana gewoon. El a bisa cu ningun momento e dama a bisa cu e no kier tin relacion sexual. Segun P. el a tene relacion y despues a bay drumi. Hues a remarca cu na Polis, P. a bisa cu e ta corda cu e dama a bisa cu e no kier tin relacion sexual.

Hues a mustra cu A. a declara cu P. a kita e pañanan di e dama y e dama a bisa cu e no kier tin nada cu P. P. a sigui kita paña y a bay drumi riba e dama y a tene relacion sexual cun’e.

Hues a sigui cu A. y a puntra A. kico a pasa. A. a bisa cu e tabata banda di rotonde di Paradera y a puntra cu e auto no ta traha bon y si e dama no tin problema pa bay Pos Chiquito. Hues a remarca cu e no ta compronde pakico no a baha e dama na su cas na Paradera pero a core bay te Pos Chiquito. E accion mas logico tabata baha e daman a Paradera. Hues a puntra si A. no tabatin otro intension. Segun A., nan tur tres a palabra pa bay apartamento.

Hues a remarca cu na Polis, A. a bisa cu ta P. tabatin relacion sexual cu e dama. A. no por a duna un splicacion na Hues e ora ey. Hues a haci serie di preguntanan y A. a bisa cu tur cos a bay voluntario. El a bisa cu el a mira P. y e dama ta kita paña di otro y tene relacion sexual. Hues a mustra cu A. a declara na Polis cu na e apartamento P. a ranca e dama na su man pa baha for di auto y e dama tabata bisa no. E momento ey A., no a preocupa cu e dama. Segun A., por ta Polis a compronde robez pasobra no tabata asina.

Hues a mustra cu doño di e apartamento a bisa cu riba camera di seguridad a mira cu e dama a baha for di e auto y a papia cu e chofer y despues a cana bay tras di e otro homber drenta den e apartamento.

EXIGENCIA DI FISCAL:

Fiscal a bisa cu el a papia cu e victima y su mama riba consecuencianan di e abuso. Ainda e dama ta afecta y ainda ta hayando tratamento. Fiscal ta haya cu tin prueba. El a mustra cu e dama a bisa cu e no kier y e sospechoso A. a bisa cu enberdad e dama a bisa cu e no kier. Fiscal a señala cu siendo na Paradera a dicidi di bay te Pos Chiquito pasobra auto lo no ta traha bon.

E momento ey P. a bay sinta patras den auto banda di e dama. E ta lamenta cu no por a haya imagennan di camera di seguridad. E doño a bisa cu el a mira cu e dama a cana voluntario drenta e apartamento. A. mes a bisa cu P. a ranca e dama for di auto ora cu el a bisa no. Fiscal a bisa Hues cu den Corte tur dos sospechoso ta bisa cu e relacion sexual tabata voluntario. Fiscal ta haya cu A. na dado momento a declara na Polis cu el a mira cu ora cu e dama a bisa no, P. a ranca su paña kita y a tene relacion sexual cun’e.

Fiscal ta haya nan culpable di violacion. Fiscal a bisa cu aki mester reacciona pisa. Fiscal a bay riba e demanda di 25 mil florin di daño inmaterial. Na opinion di Fiscal, ta dificil pa determina e suma pero a pidi un adelanto di 10 mil florin. E ta kere cu e victima lo por haci caso civil.

Pa cu e castigo, el a bisa cu e ta tene cuenta cu A. y P. a keda mas cu 30 dia sera den warda di Polis. Door di esaki e ta desconta 2 luna for di e 36 luna di prison cu e kier exigi. Fiscal a exigi 34 luna di prison pa cada un.

Hues despues di a scucha abogadonan mr. Zara y mr. Figaroa a bisa cu e ta bay studia e caso y cu dia 13 di April lo tin sentencia.

- Advertisement -

DUNA COMENTARIO

Please enter your comment!
Please enter your name here