Home Salud Decision ta na gobierno relaciona cu un bon maneho di sushi na...

Decision ta na gobierno relaciona cu un bon maneho di sushi na Aruba

9
0
SHARE
- Advertisement -

Dr. Wilmer Salazar di DVG:

ORANJESTAD   (AAN): Departamento di Salubridad Publico tabata cana man den man, moviendo pa haci diferente cos riba nivel di Salubridad y sanea e maneho di sushi.

Dr. Wilmer Salazar a conta cu minister di Infrastructura y medio ambiente, a instala un comision multi disciplinario, cu no solamente tabata involucra parti di servicionan di gobierno, pero tambe otro instancianan priva y NGO’s, pa maneha den un forma integral, e maneho di sushi na Aruba.

Minister di Salud, Dangui Oduber y Departamento di Salubridad Publico, a solicita na Organisacion Panamericano di Salud, un experto, un consultor pa hunto cu nan, por wak kico ta pasando na Aruba y con ta e miho forma di maneha e parti di sushi.

No solamente e parti di tratamento, pero tambe e parti di recoleccion, generacion y su disposicion final. A haya respondi di parti di PAHO y a apunta sr. Leandro Sandoval, un experto den e area di maneho di sushi pa bin Aruba. Ta solamente tres dia, pero dianan hopi intensivo. A involucra tur area cu tin cu bishita. No solamente e parti di Parkietenbos, pero tambe hospital, Imsan, dumpnan ilegal y tambe instancianan particular cu ta procesa e parti di sushi.

Esey ta pa bin cu un bista di kico ta pasando na Aruba, con por remedia e situacion y e consultor ta duna su recomendacion. Ta keda parti di gobierno pa tuma un decision pa un disposicion cu ta duna siguridad na medio ambiente, siguridad na salud y bienestar di nos comunidad.

Tin cu corda cu e grupo di trabao a duna un documento na e minister di infrastructura y medio ambiente, tocante e short, medium y long term, pa maneha e parti di sushi. Loke a premira tabata e parti di Parkietenbos cu mester remedia lo mas urgente posibel pa no tira sushi mas eynan. E ta genera cierto emisio di gas y contaminacion di medio ambiente cu ta afecta e comunidad.

Tambe esaki ta un punto cu sr. Sandoval a wak y cu e ta comparti cu Salubridad Publico cu e situacion aki ta insostenibel y tin cu bin un solucion lo mas pronto posibel.

Despues ta bin e solucion a largo plazo, cu lo ta crea un servicio sostenibel pa e tratamento y disposicion final di sushi.

E idea ta pa cera Parkietenbos, busca e manera mas efectivo di disposicion final di sushi y busca otro medio. Un di nan ta e forma di produccion di energia. E otro ta tapa e buraco cu tin basta na Aruba den un forma cu ta genera toxicidad, contaminacion y cu lo por crea un otro problema. E parti di loke ta yama reyeno sanitario, mester ta sanitario, cu no ta crea ningun tipo di problema. Tin otro alternativa, ta e estudio cu e grupo di maneho di sushi ta trahando riba dje. E aporte cu PAHO  a duna ta hopi importante. A tene reunion cu varios instancia, incluyendo hospital, cuminsando con nan por maneha e produccion di sushi peligroso, den un forma cu no ta genera un peliger pa comunidad di medio ambiente en general.

Tin un termino, na nivel mundial cu ta bisa cu e hende cu ta genera sushi, mester paga. Mester haci’e diferente tipo di opcion. Reduccion di sushi, e parti di tratamento y tur e parti aki, pero mester ta sostenibel. No ta haci nada cu crea un sistema cu por dura un aña y no por continua cun’e.

Ta un responsabilidad di nos tur, no solamente di Gobierno. Tambe di comunidad, di industria, di parti comercial. Tur mester aporta algo pa bira sostenibel. Si no, nos lo bay keda cu e mesun problema. Tin cu corda, Aruba ta chikito. Nos mester dispone di un manera eficiente, no contaminante cu no ta crea un problema na nos medio ambiente y salud, cu e parti di sushi cu tambe ta un problema actualmente.

E mentalidad di no paga pa piki sushi ta un mentalidad robes. Segun dr. Salazar, si e ta cumpra sushi, e mester paga pe, pa un disposicion adecua y final. Esaki ta evita e contaminacion di medio ambiente y e consecuencia cu por tin cun’e.

Tin cu corda contaminacion sea den laira, lama, ta produci malesa cu hopi biaha ta laat pa nos por atende. Ta papiando di cancer, problema di pulmon, ta papiando di problema di riñon, di higra y problemanan di cuero. Si nos ta conciente y nos mester duna loke nos tin pa por dispone di un sushi manera debe ser, Salazar ta contento cun’e. E aporte ta asina chikito cu e no ta causa ningun tipo di problema economico pa nos.

 

 

- Advertisement -

DUNA COMENTARIO

Please enter your comment!
Please enter your name here