Home Parlamento Den e asunto di e cambionan den enseñanza cu Minister Lampe kier...

Den e asunto di e cambionan den enseñanza cu Minister Lampe kier introduci, parlamentario Edgar Vrolijk ta para banda di e maestronan

27
0
SHARE
- Advertisement -

ORANJESTAD (AAN): Diaranzon durante un rueda di prensa di e fraccion geel, parlamentario Edgar Vrolijk a papia di e situacion di e trahadornan di Dienst Publieke Scholen (DPS), kendenan ta preocupa pa e decision di Minister di Enseñanza pa hinca tur den un fundacion.

“Mi a bisa e minister bon cla, bo a bin cu algo pues bay busca e ‘draagvlak’ y bisami cu e trahadornan eyfo ta sostene e idea”.

“Na final di dia ta e trahadornan cu ta bay sinti e diferencia y quizas si mayan cos no bay bon, ta nan ta Sali perhudica”.

Esaki segun Vrolijk, kende a sigui bisa cu fraccion di MEP ta bishita school pa school.
“Te ainda di tur e schoolnan cu nos a bishita, ningun di e trahadornan kier e cambio, pues nan no kier bay den e sistema di stichting”.

“Si minister ta buscando draagvlak, nos tambe ta buscando draagvlak, pasobra nos kier cos hasi netjes”.

Esaki segun e parlamentario, kende a sigui bisa cu cos mester cana segun pueblo ta pidi y no segun cu un minister ta lanta mayan y ta hasie.

El a indica cu el a conseha e trahadornan pa bay cerca e minister y puntre preto riba blanco pa tur informacion.

“Nos no ta hunga cu sentimentonan di pueblo”.

“Si pueblo ta bisa cu ta e caminda ey e kier cana, nos ta dune e caminda ey pa e cana, pasobra nos a bin pa sirbi pueblo”, segun Vrolijk.

El a sigui bisa cu e ta sinti manera cu e ta para den zapato di e trahadornan y e ta sinti nan emocion.

“E hendenan aki ta desorienta y nan ta sinti nan mes bruha, pasobra nan no sa unda pa bay y nan no sa kico ta warda nan”.

“Eingelijk mi ta haya cu tin asina hopi cos cu mester wordo atendi cune den enseñanza, pa awor nos crea un cambio y conmocion asina grandi”.

“Ami tin mi pensamento y un otro pensamento pa mehora enseñaza, pero no ta ami ta sinta den e stoel eynan”, segun Vrolijk.

Prensa a puntra Vrolijk si actualmente e ta comodo cu e cambio y el a bisa: “logicamente cu no”.

“Na e momentonan aki ta bon cla cu mi ta para cu e trahadornan”.

“Esey ta mi posicion y mi tin mi mesun dudanan pa loke ta con e cambionan ta bay wordo hasi”, segun e parlamentario.

“Mi ta para te ainda cu e cuerpo di docente, pasobra te ainda mi no a wordo convenci cu e motibo di e cambio”, segun Vrolijk.

 

- Advertisement -

DUNA COMENTARIO

Please enter your comment!
Please enter your name here