Home Suceso Den madruga Polis a logra gara atracadornan vap-vap

Den madruga Polis a logra gara atracadornan vap-vap

879
0
SHARE
— E auto y e pistola usa den e atraco.
- Advertisement -

ORANJESTAD (AAN): E yamada a drenta alrededor di 1:00 am di Diadomingo na Central di Polis, indicando cu riba caminda di Bushiri pa Pos Abao, un atraco a caba di socede.

Inmediatamente unidadnan di Polis a cuminza mobiliza pa e area.  E prome patruya cu a yega banda di Fantastic Garden, a topa cu dos dama hoben ta coriendo, y alavez ta hisando man pa hala atencion di Polis.

Agentenan a yega y para pa asina check si acaso nan ta envolvi.  E dos dama hoben ainda for di rosea, a bisa cu nan mes a caba di wordo atraca.

E dos dama a splica cu nan tabata sinta ta chill riba un piedra cu tin den area di Fantastic Garden, gozando di e dushi Diadomingo madruga ora cu diripiente nan a mira un Toyota Tercel color shinishi pasa, y diripiente e chauffeur a dal un buelta y regresa.

E Toyota Tercel a bin para banda di nan, y mesora porta a dal habri y un homber a baha bin riba nan cu un arma di candela den su man.  Aki el a exigi pa haya nan tas, y tambe placa.

E dos dama hoben a spanta, y a entrega nan tas.  E atracador a core subi bek den e vehiculo, y chauffeur cu velocidad halto a tuma direccion zuid rumbo pa Belgiestraat.

Mientras tanto Polis a transmiti e informe aki pa demas unidadnan riba caya, y e unidad a dicidi na hiba e dos dama hoben rumbo pa Warda di Polis na Playa pa asna wordo atendi pa Atraco Team.  Nan a pidi Slachtoffer Hulp tambe, pa yuda e dos dama aki cu a keda spanta.

Mientras tanto, unidadnan di Polis riba caya a cuminza cu un buskeda di un Toyota Tercel color shinishi.  Como cu despues di aña 1999 ya no ta fabrica e modelo Tercel mas, awendia no ta mira hopi di nan mas riba caya.

Diripiente un unidad di Polis a bin topa cu un Toyota Tercel shinishi na alturadi Rotonde di Driemasterstraat, y den dje tabatin 3 persona.

Polis a obliga e auto pa stop, y a ordena e pasaheronan pa baha uno pa uno di e vehiculo.  Ta trata di dos hende homber, y un hende muher.  A pone boei na nan man, y a cuminza controla e vehiculo.

Aki Polis a canta “Bingo”, como cu a bin haya un arma di candela den dje.  Esey a pone cu tur tres ocupante a keda deteni.  Ta trata di dos Arubiano y un Venezolano.

Tur tres persona a wordo deteni y hiba Warda di Polis . Fiscal a duna ordo pa e auto wordo tuma den beslag pa mas investigacion.   DIARIO kier a felicita Cuerpo di Polis y e agentenan di Playa, pa e bon trabao aki!

- Advertisement -

DUNA COMENTARIO

Please enter your comment!
Please enter your name here