Despues di a keda posponi varios biaha
ORANJESTAD (AAN): Despues cu na December 2017 e caso a bolbe keda posponi, mayan porfin Corte den Promer Instancia ta bay trata e lamentable caso di asalto arma fatal den Wayaca, caminda a tira un dama Chines mata, mientras cu su casa tambe a worde tira y herida.
E Boneiriano J.P.E. y e Chines P.F. ta e sospechosonan. Diferente biaha e caso a keda posponi pa motibo cu e Chines P.F., kende por cierto ta familiar di e victima, no a keda cla cu abogado.
E acusacion contra e duo aki ta cu riba 13 September 2016, a tira mata e dama Chines y herida su casa. Tambe tira riba e yiu homber. A bay cu un suma di placa, telefonnan, cadena y un auto.
Na October 2017, e caso a worde posponi, pasobra e sospechoso P.F. a cambia di abogado mr. C.Lejuez pa abogado mr. Spong di Hulanda pero e tempo ey ainda P.F. no a keda cla cu e areglo pa e abogado represent’e aki na Aruba hunto cu abogado mr. Ruiz.
Na October 2017, e yiu muher di e victima a presenta cu e demandanan di daño di e tata y yiu homber.
Na December 2017 atrobe e caso a worde posponi pasobra ainda P.F. no a keda cla cu abogado. A resulta cu mr. Spong a desisti di ta abogado pa P.F. E dia ey e sospechoso P.F. a bisa cu awor ta negociando cu mr. Mohamed.
Fiscal a bisa Hues cu P.F. den pasado caba a mustra di ta inconfiabel pa cu abogado y no por sigui asina. Esaki ta perhudica famia di e victima y e otro sospechoso. Fiscal a propone pa dia 12 Januari 2018, e sospechoso P.F. presenta den Corte y confirma cu e tin abogado y dia 2 Maart 2018 lo bay trata e caso mes pa 9’or di mainta.
Na Januari 2018, P.F. a presenta den Corte cu mr. Mohamed como abogado y Diabierna porfin tratamento di e caso lo tuma lugar.
Tratamento lo bira interesante pasobra parce cu e sospechoso J.P.E. a bisa cu ta P.F. a bin cu henter e plan. Si resulta cu ta asina, esey ta nifica cu P.F. a planea un asalto arma contra su mesun famia cu a causa e lamentable morto di e dama, mientras cu e casa a resulta herida.
DIARIO lo informa lectornan kico ta pasa den sala di Corte.
