Home Hudicial Dos aña di prison exigi pa acusado kende a menaza dos homber...

Dos aña di prison exigi pa acusado kende a menaza dos homber cu revolver

52
0
SHARE
????????????????????????????????????
- Advertisement -

ORANJESTAD (AAN): E acusado T.M.P., ta para riba cu e no a menaza hende cu arma y cu e arma cu a haya na su cas no ta di dje sino di otro hende. Fiscal a exigi 2 aña di prison. Abogado mr. Edwards ta haya cu no por proba cu realmente T.M.P. a menaza.

E acusacionnan cu Fiscal a presenta contra T.M.P. ta cu dia 6 December 2017, el a menaza dos persona cu arma. Tambe cu entre 6 December y 8 December 2017 a investiga na su cas y a haya diferente balanan y revolver. Fiscal ta acusa T.M.P. cu na Mei 2017 el a horta auto, 7 Juni 2017 horta for di un auto.

MENAZA CU ARMA:

Hues a bisa cu tin dos persona cu a declara cu nan a worde menaza den Village door di T.M.P. Nan tabata den auto y na dado momento un hende a bati na bentana di auto. Esun cu dread logs a bati na e bentana y a cuminsa papia cu A.K. cu tabata na stuur. El a saca revolver. Segun A.K., e homber a bisa cu nan ta bende droga y pa e move di eynan. E homber F.P. tabata sinta den auto y a bisa A.K. pa bay di eynan. Nan a bay Polis haci denuncia. Nan a duna discripcion y mustra na unda e cos a sosode. Polis a mustra potret riba facebook y F.P. a reconoce T.M.P.

ACUSADO TA DESMENTI:

Polis a bay cas di T.M.P. y a haya arma. T.M.P. ta para riba cu nan ta gaña riba dje y cu ningun momento el a menaza nan. T.M.P. cu documento di declaracion den man, a bisa Hues cu nan a declara diferente. Hues a bisa pakico nan tin cu gaña riba T.M.P.

El a bisa cu e arma cu a haya na su cas e tabata warda pa un persona pero no kier a menciona nomber.

HORTA AUTO:

Pa loke ta e ladronicia di auto y ladronicia for di auto, T.M.P. a admiti pero a bisa Hues cu el a keda 10 dia sera pa esakinan. T.M.P. a bisa cu el a bay cu e auto pero no a pluma e auto. E doño a haya e auto cu falta hopi cos.

Ta asina cu T.M.P. tin un bala di tiro den su curpa cu no a worde saca. Desde 8 December 2017 e ta sera pa e caso di menaza cu arma.

EXIGENCIA DI FISCAL:

Fiscal a bisa cu e ta haya legalmente proba e menaza cu arma y tambe e ladronicianan di auto. Fiscal a sigui bisa cu a haya e revolver cu balanan. E sospechoso mes a admiti di tabatin e revolver cu balanan wanta pa un persona. A admiti di a horta e autonan. Pa cu e castigo Fiscal a bisa cu e ta tene cuenta cu e sospechoso ta un hoben. Fiscal a exigi 24 luna di prison.

DEFENSA

Abogado mr. Faarup a mustra cu T.M.P. no a horta intencional bateria di auto sino cu e mecanico a bis’e pa bay busca esey y esey el a bay haci. E sospechoso mes a bisa cu e mecanico sa manda mas hende busca pieza na e auto. Den dia cla el a bay cu yabi pa los e bateria. E mecanico mes a bisa cu el a cambia e bateria. Su siguiente dia e auto atrobe no a start. E mecanico a bisa cu ta alternator. El a bay atrobe na e auto y kita e alternator. E otro auto ta cuestion cu e doño lo debe T.M.P. y pesey el a coy e auto. E abogado ta kere cu ta e supuesto mecanico ta tras di tur e asuntonan aki.

Hues a mustra cu e mecanico a declara cu el a bisa T.M.P. pa bay wak e auto cu e persona ta bende pero ningun momento el a bisa pa coy bateria y alternator.

Abogado mr. Edwards a bisa Hues cu T.M.P. ta desmenti di a menaza cu arma. E abogado ta haya cu e declaracion di esnan cu a haci denuncia no ta confiabel. El a mustra cu un ta menciona cu e persona tin dread log y e otro ta bisa cu e no tin dreadlocks.

Esun ta bisa cu e sospechoso tabatin un flanel biña bisti y e otro ta bisa cu e persona tabata lomba sunu. Na opinion di e abogado, aki no por bisa cu tin prueba convicente cu ta T.M.P. El a señala con por ta posibel cu esnan menaza a dicidi di bay busca e mama hiba na cas y despues a bay Polis. E abogado ta conclui cu ta un storia nan a bin cun’e cu nan a bay hiba nan mama cerca un persona di bishita.

E abogado a bisa Hues cu e ta haya straño cu nan no a bay bishita tambe. E abogado a remarca cu Polis ta papia di a mustra potret pero no tin ningun potret den documentonan cu ta mustra cual potret e personanan a reconoce. Abogado ta haya cu no por prueba cu T.M.P. a menaza.

Hues a sera tratamento di e caso y bisa cu dia 6 April venidero pa 8:15 am lo dicta sentencia.

 

- Advertisement -

DUNA COMENTARIO

Please enter your comment!
Please enter your name here