Home Hudicial Dos Dominicano gara cu mas di 9 kilo di cocaina den maleta...

Dos Dominicano gara cu mas di 9 kilo di cocaina den maleta pa hiba Hulanda

120
0
SHARE
- Advertisement -

Hues no a kere e storia cu nan a wordo menaza pa hiba droga

ORANJESTAD (AAN) – E homber Dominicano J.A. (28) biba na Hulanda y e Dominicano J.B.P. (23) tambe biba na Hulanda, ayera mainta a scucha Fiscal baha pisa riba nan. Fiscal a bisa cu e no ta kere nada di e storia cu nan lo a wordo menaza cu pistol pa hiba e droga.

El a exigi 48 luna di prison pa J.A. y 42 luna di prison pa J.B.P.  Hues a dicta sentencia di biaha y a condena J.B.P. na 24 luna di prison y J.A. na 30 luna di prison. Nan a wordo gara na aeropuerto cu 4 maleta yen di cocaine. A confisca 9.3 kilo cu tabata destina pa Hulanda.

MENAZA PA HIBA DROGA?

Durante tratamento di e caso a sali na cla cu tanto J.A. como J.B.P. ta bibando na Rotterdam. Dia 7 October 2017, miembronan di Douane a detene nan na aeropuerto despues cu e cacho anti droga a reacciona riba nan maletanan y a bin haya 9.3 kilo di cocaina den bom falso di e maletanan.

Ta asina cu J.A. y J.B.P. a bay for di Hulanda pa Santo Domingo pa bishita famia y despues a bin Aruba. Nan a bin cu pa 1 siman. Den Corte nan a bisa Hues cu nan a wordo acerca pa un persona y segun nan, na dado momento nan a wordo obliga pa hiba e droga.

Tur cos a cuminsa cu cumpramento di marihuana. Nan a bisa Hues cu un tal Pepe y Cali, for di kendenan nan lo a cumpra marihuana pa propio uso, a puntra nan si nan ta durf di transporta droga pa Hulanda. Segun nan, nan no a wordo ofreci nada pa transporta e droga. Nan a bisa Hues cu e homber lo tabatin arma. E duo aki a bisa Hues cu un diamars un persona a bay bati na porta di e camber di hotel unda nan tabata keda y a bisa nan pa percura transporta e droga sino lo tin problema grandi. Nan mester a viaha diasabra bek pa Hulanda.

Fiscal a mustra cu Pepe y Cali a puntra nan si nan ta durf di transporta droga pa Hulanda. E momento ey nan lo a nenga. Su siguiente dia nan a bay na mesun lugar. Hues a haya esaki hopi straño cu ta bay na e mesun lugar atrobe. Nan a bisa cu e di dos dia nan a wordo menaza cu pistol door di Pepe y Cali ariba caya. Tur dos tabata arma. Tambe J.A. a wordo maltrata y a kita placa for di nan.

Hues a haci un serie di pregunta pa saca afor kico realmente a pasa. Nan a bisa cu nan tabata sinti den trans. Hues a remarca cu por ta door di e uso di marihuana? El a remarca pakico nan no a bay Polis. Nan a bisa cu nan a spanta.

E maleta grandi di nan a wordo busca door di Pepe y Cali y nan a trece 4 maleta chikito pa nan viaha pa Hulanda. Hues a remarca cu ta masha straño cu ta puntra nan pa hiba droga y awor ta resulta cu ta kita placa for di nan. Normal ta ofrece placa pa transporta droga.

Hues a mustra cu J.A. no ta desconoci den asunto di droga. Segun registro di Ministerio Publico di Hulanda, na 2013 y 2014, J.A. a wordo condena caba pa droga. J.B.P. no tin carchi di castigo. J.B.P. a bisa Hues cu e ta sufri di curazon. El a nace cu buraco den curazon y a haci operacion. Ainda e tin problema. De vez en cuando e tin problema cu halamento di rosea. E abogado mr. Thielman a bisa Hues cu el a purba haya document di cardiologo di Hulanda, pero nan ta haci hopi dificil.

FISCAL

Fiscal a bisa cu e ta haya legalmente proba e transporte di 9.3 kilo di cocaine. Na opinion di Fiscal, e duo J.A. y J.B.P. tabata sa cu nan tabata transporta droga. Nan tabatin 4 maleta. Esey ta haci cu nan ta complice di transporte di droga. Nan a bin hunto Aruba y a keda hunto den camber di hotel y nan a bin cu e mesun storia cu nan a wordo menaza. Fiscal ta haya cu nan mester por tabata sa cu tin droga den e maletanan. E maletanan tabata mas pisa cu normal.

Fiscal a bisa cu e ta comparti punto di bista di Hues, cu si a wordo menaza por a yama Polis. Fiscal a bisa Hues cu e no ta kere e storianan. E ta haya cu e sospechosonan a bin cu diferente storia y e no ta kere ningun. Fiscal a bisa cu e no ta kere tampoco cu nan a wordo menaza.

El a mustra cu e sospechosonan tabata sa cu nan a bin Aruba pa transporta droga. Pa cu castigo el a bisa cu e ta tene cuenta cu J.A. dos biaha caba a wordo condena pa droga y J.B.P. no. Fiscal a sigui bisa cu e no ta bay tene cuenta cu situacion di salud di J.B.P. E ta kere cu den KIA lo por duna e atencion medico necesario.

SOSPECHOSO A RABIA CU FISCAL

J.A. tabata blo reclama y tabata zwaai man. Guardianan di CEA a bay bis’e cu e mester keda keto. Hues a puntr’e kico ta e problema. J.A. hopi rabia a bisa Hues cu Fiscal ta bin cu su mesun storia. Fiscal a bis’e cu Fiscal ta papia a base di loke nan a bisa. J.A. a rabia asina hopi cu el a bisa cu e kier bay for di sala di Corte. Miembro di CEA a boei su man y hib’e mientras cu J.B.P. si a keda trankil.

FISCAL A EXIGI CASTIGO

Fiscal e ora ey a sigui bisa cu Ministerio Publico tin un maneho pa cu droga. E ta haya cu Aruba ta wordo mal usa como trampoline pa hiba droga Hulanda. Teniendo cuenta cu e 9.3 kilo di cocaine, el a exigi 3 aña y 6 luna (42 luna) di prison pa J.B.P.

Fiscal a bisa cu pa J.A. ta otro. E ta haya cu mester considera J.A. un residivista mirando cu dos biaha caba el a haya castigo pa caso di droga na Hulanda. Fiscal a exigi 4 aña (48 luna) di prison pa J.A.

DEFFENSA ABOGADO

Mr. Thielman a bisa cu e sospechosonan a admiti cu nan mester a hiba droga. E abogado a bisa Hues cu e pregunta ta si por papia aki di complice. El a mustra cu recien Hof di Corte Superior tabatin sentencia den un caso caminda mas droga a wordo haya pa hiba Hulanda y sigui pa Inglatera. Aki ta trata di 10 kilo di cocaine. Segun e abogado, Hof ta haya cu no por prueba complice. No por papia cu tabatin suficiente cooperacion. Na opinion di e abogado, Hof ta mustra cu solamente e sospechosonan tabata sa cu ta transporta droga y esey no ta suficiente. Hof tambe a mustra cu tampoco e hecho cu nan tabata keda den mesun hotel y tabata haya cosnan paga, no tabata suficiente.

E abogado a bisa cu den e caso di e dos sospechosonan J.A. y J.B.P., nan a bin for di Santo Domingo pa despues bay Hulanda. Segun e abogado, e ta kere cu si nan intension real tabata pa transporta droga, nan lo por a haci esaki via Santo Domingo y no bin Aruba. Na Aruba nan a wordo puntra pa hiba droga.

Na opinion di e abogado, e hecho cu nan no tabata sa cuanto droga tin den e maletanan y no a haya oferta di placa, no por papia cu complice. El a mustra cu Hof den e caso cu el a referi na dje, a condena pa 10 kilo, 3 aña di prison y no por compronde cu Fiscal a exigi 3 aña y 6 luna di prison y 4 aña di prison. E castigo ta demasiado halto.

SENTENCIA

Hues a sera tratamento di e caso y a bisa cu e ta dicta sentencia di biaha. Hues ta haya legalmente proba cu nan a transporta droga. Hues a bisa cu e no ta kere e storianan di e duo aki. El a mustra cu nan a bin hunto Aruba y hunto a bay papia cu e hendenan. Hues a bisa cu e ta kere cu henter e viahe pa Aruba tin di haci cu transporte di droga. El a splica tambe cu e maneho di Ministerio Publico ta diferente cu maneho di Corte di Husticia. Fiscal a exigi 3 aña y 6 luna pa J.B.P. y 4 aña pa J.A. Sinembargo segun maneho di Corte di Husticia, Hues a condena J.B.P. na 2 aña (24 luna) di prison. Esaki pasobra ta promer biaha cu e ta cay sera pa droga. Pa J.A., Hues ta considera otra. E ta haya cu J.A. ya a wordo condena dos biaha y a conden’e na 2 aña y 6 luna (30) luna di prison.

 

- Advertisement -

DUNA COMENTARIO

Please enter your comment!
Please enter your name here