Home Comercio Dos franchise nobo di Panda Express y Freshii a habri na Aeropuerto

Dos franchise nobo di Panda Express y Freshii a habri na Aeropuerto

27
0
SHARE
- Advertisement -

Aeropuerto tin un area pa pasaheronan sinta come cu ta fenomenal

ORANJESTAD (AAN): E siman aki, DIARIO tabata hunto cu demas prensa local na Aeropuerto di Aruba, ora cu Aruba Airport Authority N.V. (AAA) hunto cu Airport Hospitality Industry N.V. (AHI) a presenta tres opcion nobo pa cuminda y bebida cu pasaheronan por disfruta di dje.

Entre Gate 4 y 5 di Aeropuerto, awor tin e famoso “Panda Express”, tambe un bar di salada cu yama “Freshii” y un lounge unico den su estilo cu yama “Wineport”.

E area nobo a wordo completamente renoba y el a hasta bira tiki ‘apart’ compara cu e resto di e area di Gates.  Endy Croes, relacionista publico di Aeropuerto a splica DIARIO cu e area nobo di cuminda y bebida di 323.50 meter cuadra di grandura, y a worde traha pa acomoda e demanda creciente pa opcionnan di calidad pa cuminda y bebida y tambe areanan di asiento adicional pa pasaheronan cu ta bishita Aeropuerto di Aruba, specialmente durante “peak hours”.

Ta pa e motibo aki cu Aeropuerto di Aruba a dicidi pa inverti $1,100,000 den e area entre salanan di salida 4 y 5.

Panda Express ta un restaurant di cuminda rapido cu ta brinda platonan Chines Americano. Panda Express ta un restaurant cu tradicionalmente bo lo encontra den un shopping mall, pero e restaurant awo ta opera den varios formato nobo, incluyendo den aeropuerto.

Pasaheronan tipicamente ta bishita Panda Express pa pidi Kung Pao chicken, Orange Chicken, chow mein, fried rice y/of berduranan steamed.  Na Aruba tin hopi hende cu ta encanta e Orange Chicken, y e manager Amparo a duna prensa un trato sublime.

Freshii ta un restaurant Canades cu ta sirbi burrito, wrap, soppi, salada y frozen yogurt. Freshii tin 370 sucursal na Merca y Europa. Pasaheronan ta hopi contento cu e opcionnan mas saludabel cu tin awo na aeropuerto.

Wineport ta un bar unico cu ta specialisa den biña cu a worde diseña specialmente pa e pasaheronan cu kier sinta, relaha y disfruta di e bista di avionnan cu ta sali y yega riba e plataforma di aeropuerto.

Wineport ta ofrece un variedad grandi di biñanan extraordinario, premium cocktails y un seleccion special di craft beer hunto cu “hors d’oeuvres” cu ta complimenta cada bebida.

“Nos ta hopi contento cu e opcionnan nobo di cuminda y bebida na aeropuerto, paso awo nos biaheronan tin 3 opcion adicional pa scohe for di nan ora cu nan ta warda pa nan buelo di salida.

Ademas di e opcionnan di cuminda y bebida, nos a inverti tambe den bañonan nobo y moderno cu ta situa net banda di e 3 lugarnan nobo. E trabaonan di construccion cu a inicia na December 2014 awo a keda completamente cla y nos ta feliz cu esey.

“Pa loke ta ganashi pa aeropuerto, nos ta mira na un $200.000 adicional pa aña,” asina AAA su CEO Sr. James Fazio a expresa durante e evento pa prensa cu a worde teni na aeropuerto.

Lamentablemente ta solamente pasaheronan por disfruta di e lugarnan nobo aki.  Publico en general no por yega te na Gate.

- Advertisement -

DUNA COMENTARIO

Please enter your comment!
Please enter your name here