Home Parlamento Endy Croes di MEP mustrando cu pueblo tin di sali y celebra...

Endy Croes di MEP mustrando cu pueblo tin di sali y celebra Himno y Bandera

13
0
SHARE
- Advertisement -

ORANJESTAD (AAN): Parlamentario Endy Croes ta pidi pueblo pa sali celebra engrande dia di nos “Himno y Bandera.” 42 aña pasa pa ta exacto 18 Maart 1976 nos Himno a resona y nos bandera a wordo hisa pa prome biaha den un manifestacion na Wilhelmina Stadion awe yama Guillermo Prospero Trinidad Stadion.

Libertador di e pueblo aki Sr. Betico Croes (q.e.p.d.) den añanan 70 a sinti e necesidad pa unifica e pueblo pa hunto nos por logra y realisa nos Status Aparte. Den cuadro di uni e pueblo a lanta un comision cu e tarea pa sondea y traha riba un Himno y un Bandera.

Himno “Aruba Dushi Tera”:

Un cancion popular cu a wordo traha pa Rufo Wever (q.e.p.d) y Padu Lampe, “Aruba Dushi Tera”, desde aña 1951 cu palabranan profundo di amor pa nos patria Aruba, cual cancion tabata wordo toca pa Frere Alexius den klasnan di school y tabata wordo toca na radio a bira e escogencia di e comision.

Hubert “Lio” Booi a traha un couplet extra y asina e cancion aki a wordo recomenda pa bira nos himno y finalmente a bira nos Himno Aruba Dushi Tera.

Bandera di Aruba:

Pa locual ta trata nos bandera e comision a encarga un competencia na henter pueblo di Aruba pa pinta algo riba papel. Un total di 693 pintura casi tur di muchanan di school a keda entrega y locual a resalta cu tabata Strea, Lama, color cora etc. a wordo manda pa “Flag Institution USA” kendenan a diseña e bandera final.

Color blauw ta identifica nos lama cu tin rond di nos isla. Color cora ta e sanger di indjan kendenan a bataya pa nan libertad den Rooi Frances pero tambe  e cariño inmenso di hendenan y e amor pa nos isla.

Cuater punta di e strea ta e posicion di Aruba den lama Caribe y tambe ta simbolisa e cuater direccion di e compas indicando e diferente paisnan di unda hendenan a bin Aruba pa biba den harmonia cu otro. E rand blanco rond di e strea ta e santo blanco sin mancha di nos playanan y alaves e puresa di curason di nos hendenan. E color geel ta color di abundancia y ta simbolisa nos ingreso di antaño cu ta industria di Aloë, Industria di oro y Guamo (fosfaat).  E strepi ta nifica e solides y duracion largo. Tambe e ta simbolo di palo y mata manera Kibrahacha, Brasil, Boonchi di strena, curahao, tuturututo, aloë, wanglo.

Terminando Endy Croes ta pidi pueblo pa sali diadomingo awor, 18 di Maart  y celebra nos dia Nacional, esta nos dia di Himno y Bandera manera nunca antes. Sinti Bo orguyoso di Bo Himno y Bandera. Pabien Aruba.

- Advertisement -

DUNA COMENTARIO

Please enter your comment!
Please enter your name here