Home Parlamento Esnan di AVP ta sorprendi cu Premier Wever-Croes papiando di cultivo di...

Esnan di AVP ta sorprendi cu Premier Wever-Croes papiando di cultivo di Marihuana como pilar economico

66
0
SHARE
- Advertisement -

ORANJESTAD (AAN): Durante di un reunion cu Minister Presidente Wever Croes, a bin dilanti un  pregunta  y cu  Prome Minister a contesta cla, esta cu si por bin cu plantacion di hemp si acaso e refineria no habri back, Parlamentario pa fraccion di AVP, sr Robert Candelaria a trece dilanti.

“Pa esunnan cu no sa, hemp ta un nomber mas bunita na Ingles pa loke nos conoce den boca di pueblo como e mata for di cua ta produci marihuana.

Prome minister a bisa cu tin un comision ta evaluando esaki y pa uzo medicinal. El a indica cu e mesun comision aki por wak tambe si mester importa e producto aki of si mester cultiva e producto aki localmente.

Prome Minister a papia di esaki como un pilar economico nobo pa Aruba y mi no por compronde e contesta duna riba esaki.

Na prome luga e ta bay contra logica pa compara loke un refineria ta produci na empleo, impuesto, divisa pa un pais compara cu un plantacion di marihuana. No por compara esaki, of mester uza terenonan sumamente grandi di pais Aruba pa produci asina hopi marihuana pa papia di e mesun cantidad di empleo, impuesto y divisa.

Tin tanto manera pa diversifica nos economia y pa pensa cu nos ta considera cultivacion di marihuana pa reemplasa refineria,  ta preocupa nos masha hopi. Pues no cu a haci’e, pero cu ta hasta consider’e ta algo hopi preocupante.
Si kier papia di cultiva, ban stimula cultivacion di loke nos por come. Nos tin problema cu importacion di fruta y berdura, pero nos tin agricultornan local cu nos por yuda pa produci cuminda pa consumo local y exporta.

Ta imposibel pa compronde cu nos kier hasta considera marihuana como un pilar economico.

Pa uza cannabis medicinalmente, no mester cultiva esaki na Aruba, ya cu remedinan cu nos ta cumpra na botica awendia no ta worde produci aki.

Pues e argumento pa cultiva cannabis aki pa por produci remedi di dje no ta valido at all y lo bo mester tin di laboratorio completo pa logra saca e zeta pa medicina.

Loke nos impresion ta cu si mester cultiva esaki localmente, no ta pa remedi, pero ta pa huma esaki y tin cu puntra si henter e gobierno ta para tras di esaki.

Minister di Husticia, kico ta bo opinion?   Aruba, nos no por ta desea aki y mester mustra riba  Jamaica cu ta cerca di nos,  a caba di haya un anuncio di IMF, cu nan criminalidad ta caba cu nan economia. Turistanan no ta safe aya mas. Aruba, nos no por permiti esaki y mester traha riba prevencion di criminalidad y di adiccion y no stimula esaki door di planta e cos aki mes, y despues bisa pueblo y nos hobennan, pa corda no bay hum’e pasobra e ta malo pa bo. Aki mi tin un flyer di Fada cu ta papia di e riesgonan y laga nos scucha di nos profesionalnan.

Como gobierno di un pais, bo mester traha pa cuida un pueblo y no pa hundi un pueblo. Marihuana keto bay ta un droga prohibi y ora papia cu cualkier profesional den field y puntra con hende adicto a cuminsa na nan adiccion y ta bin resulta cu adiccion ta algo progresivo.

E ta cuminsa un caminda, pero e kier sigui destrui e persona y ta keda ranca bo abou poco poco te ora e caba cu bo. Tur profesional cu mi a papia cu’ne y ex adicto a bisa cu nan a cuminsa uza droga cu marihuana. Despues e no tabata duna e ‘high’ desea mas y nan a bay test otro droga mas pisa y a keda pega den dje. Awendia e edad cu hobennan ta experimenta cu e droga ta birando mas y mas tempran den nan edad.

Gobierno, por fabor traha riba e problema social grandi cu nos tin na Aruba y no empeora esaki. Ta berdad cu no ta tur hende cu uza marihuana recreaccionalmente y ta bira adicto cu lo sigui den e circulo vicioso di adiccion, mescos cu no ta tur hende cu bebe un cerbes ta bira un alcoholico. Pero nos mester cuida nos pueblo y no planta marihuana y asina expone pueblo na un droga y spera despues cu nan no bay hum’e y bira adicto,” Parlamentario Robert Candelaria ta declara.

 

 

- Advertisement -

DUNA COMENTARIO

Please enter your comment!
Please enter your name here